ايه رايك فى مسابة Mr Egypt ؟

لا أعرف هل ستتهمونني بأني رجعي ومتخلف ودقة قديمة ومش عصري أم سأجد من يناصرني الرأي والدماغ؟

*********

شوف ياسيدي.. "اللمبي" قال إيه عن الرجولة؟
قال إنها أدب ومش هز أكتاف.. تمام؟

وسواء بقى اتفقت أو اختلفت مع المفكر الكبير "اللمبي" في وجهة نظره الرجولية!!.. فالأكيد برضه إن الرجولة مش ضربة رمش ولا عيون دباحة ولا تمشية بالمايوه ولا ضحكة مش ولابد.. لاحظ إننا بنتكلم عن مواصفات الرجل هنا وليس عن مواصفات بنت من إياهم ولا مؤاخذة

فما قولك بقى سيدي العزيز إذا اكتشفت أن مقاييس الرجولة في مصر أصبحت هكذا؟! وأنه حتى تنال اللقب السامي الكبير
"Mr. Egypt"
أو ملك جمال مصر فعليك أن تقوم بكل ما سبق ذكره أعلاه
آه والله
عليك -وإنت راجل كبير كده ملو هدومه- أن ترتضي بأن تقلع هدومك -ما عدا ما يستر عورتك طبعا.. لأ يا أخي مش للدرجة دي.. احنا عيلة محافظة برضه!- ثم أن تتمشى بثقة كبيرة وأنت في كامل عزتك بنفسك وفي كامل فخرك "برجولتك" أمام لجنة التحكيم المكونة من الفنانة اللبنانية الكبيرة "دوللي شاهين" والفنانة المصرية العظيمة "مي سليم" واتنين "رجالة" تانيين حتى يقوموا بمعاينة البضاعة ويختاروا اسم النبي حارسه ملك جمال مصر

***

هل يحدث هذا في مصر؟

يعني أنا هاكدب عليك ليه يا أخي؟ وبعدين ده حتى الجريدة اللي نشرت الخبر -مدعومة بصور تشرح القلب الحزين- هي جريدة روز اليوسف الحكومية.. والأجمل بقى أن منظمو الحفل الذين أقاموه في فندق فاخر جدا بالقطامية، كانوا سعداء جدا بأنهم نجحوا في أن يكرروا المسابقة التي عقدت مرة واحدة فقط عام 1997 –وفاز بها آنذاك الفنان "هاني سلامة"- ثم وقفت قوى الشر والظلام - !!! - أمامهم طوال هذه السنوات فمنعتهم من تنظيم هذا السباق "الرجولي" المحترم حتى نجحوا أخيرا في التغلب على هؤلاء المتخلفين وأقاموا المسابقة برعاية عدد كبير من الشركات

طبعا كلكم منتظرين تعرفوا مين الأمور اللي فاز بالمسابقة.. احفظوا اسمه كويس لأنه راجل هيطلع من ضهره رجالة شداد.. ملك جمال مصر -ربنا يحرسه من العين- هو الأخ "إبراهيم عبد الجواد" عمره 24 سنة بس

ويعمل موظفا بإحدى شركات الشحن

أكيد وظيفة إدارية.. ماهو مش ممكن يكون ملك جمال مصر وقادر يشيل حاجات ويشحنها

طبعا "إبراهيم" بدت عليه كل ملامح السعادة بعد أن فاز باللقب الفخر -واضحة ملامح السعادة في الصورة- وصدقوني كنت على استعداد أن أدفع كل ما أملك –لا يزيد بأي حال من الأحوال عن 73 جنيه!- حتى أقابل المستر بتاع مصر وأسأله عن خططه الطموحة لتعميم مفهوم الرجولة الذي فاز بسببه بالمسابقة في ربوع مصر المحروسة.. أيوه ما البلد ناقصة "........" ولا مؤاخذة

*********

طيب سيبونا بقى من الهزار ونتكلم جد

بذمتك ياجدع ده اسمه كلام؟ يعني الأمة بتعاني في لبنان وفلسطين والبلد والعة في مشـاكل اقتصادية وسياسية كبيرة.. والقضاة بيتحولوا للتحقيق.. والبطالة وصلت لمستويات كبيرة "9% رسميا و 24 % غير رسمي".. والمصريين اللي عايشين تحت خط الفقر "يعني أقل من دولارين في اليوم الواحد" وصلت نسبتهم إلى 44%.. ومستوى التعليم لا يزال يعاني من أزمة منتصف العمر فلا هو مراهق ولا هو رجل ناضج.. وأخلاق المصريين في تدني مستمر "امش في الشارع واحسب كام مرة هتسمع ألفاظ تسب الدين".. ونسبة العنوسة في مصر وصلت إلى 9 ملايين ولد وبنت ,يعني 12.5% من تعداد السكان و22% من عدد شباب مصر

وتيجي تسيب كل الحقائق والأرقام دي اللي تسد نفس أمة كاملة، وتتجاهل مشاعر البني آدمين اللي عايشين في البلد ومش لاقيين فرصة إنهم يشموا هوا نضيف، وبعدين تقوم جامع شوية رجالة "مشّيها رجالة" وتقول لهم تعالوا يا ولاد نشوف أجمل واحد فيكم.. أجمل.. مش أرجل ولا أجدع ولا أكثرهم ذكاء ولا أفضلهم خلقا ولا أكثرهم علما.. وبعدين تيجوا تسألوا الإرهاب والتطرف بيجي منين؟

*********

بعد نكسة حرب 1967 وقع المجتمع المصري في غيبوبة عميقة، بعد أن فقد الثقة في النظام وفي نفسه وفي قدرته على تحويل الهزيمة إلى نصر، الأمر الذي مهد لمثل هذه التقاليع المستفزة أن تظهر، وأوراق التاريخ تذكر أن أول مسابقة مشابهة لاختيار أجمل ما فيك يا مصر من رجالة حدثت مباشرة بعد الهزيمة الموجعة من إسرائيل في يونيو 1967،وامتـلأت المجـلات بصـور الشبـاب ذوي العيـون المسبسبة والمسمسمة ,ويوم أن عرف الرئيس الراحل "جمال عبد الناصر" هذا الخبر المستفز أمر أن يتم إلحاق كل الرجالة "تقريبا" اللي شاركوا في هذه المسابقة بالجيش حتى يتربوا ويعرفوا المعنى الحقيقي لكلمة رجل التي لا تقاس باحمرار الخدين أو نعومة البشرة أو رقة الشفاه أو تناسق الجسد وإنما تقاس بقدرة التحمل والصبر على الشدائد والقدرة على الإنجاز في الظروف الصعبة، وحنكة التصرف وذكاء الفعل

ترى هل عدنا إلى فترة ما بعد النكسة، أم أن البلد ماعادتش فيها رجالة أصلا؟

وعــمــار يــامــصــر

يادى النيلة وهم الشباب ناقصين خيبة
اللى لابس لو ويست والتيشيرت اللى بيلمع
والشعر اللى نازل على عينة ,واللى واللى......
كمان يجيبوا مسابقة مستر ايجيبت تانى

للاسف دوووووووول مش رجاله وناااااس فاضيه ورجاله اى كلام

والبلد مش ناقصه الرجاله الفافى دووووووووووول

ربنا يهدى ويصلح الامور

للاسف الرجاله بقوا قليلين الايام دى

وعمار يا بلد العجايب يا مصر

fadl shaker كتب:: يادى النيلة وهم الشباب ناقصين خيبة
اللى لابس لو ويست والتيشيرت اللى بيلمع
والشعر اللى نازل على عينة ,واللى واللى......
كمان يجيبوا مسابقة مستر ايجيبت تانى

للاسف دوووووووول مش رجاله وناااااس فاضيه ورجاله اى كلام

والبلد مش ناقصه الرجاله الفافى دووووووووووول

ربنا يهدى ويصلح الامور

للاسف الرجاله بقوا قليلين الايام دى

وعمار يا بلد العجايب يا مصر

عندك حق والله بس تقول لمين منورني بجد

ههههههههههههههههههههههههههه
تسلمى ع الطرح ولا تعليق

حنفى الابهة كتب:: ههههههههههههههههههههههههههه
تسلمى ع الطرح ولا تعليق

ميرسي لمرورك

» Egypt (International friendly) [Egypt vs Benin goals]
» قول رايك فى تلك العبارة .........................بصراحة ....................
» || تقديـــم مبــاراة Egypt Vs. England ||
» رئيس الجمهوريه اللى جاى (قول رايك)
» ممكن اعرف رايك؟؟؟