ياترى .. هان على مصر فهانت علينا ؟؟!!

زائر

حوار مع اسرائيلى كااااان مصرى

جاى فى اجازه؟؟؟؟

ايوه جاى اشوف اهلى اسبوعين وراجع ...

انتا فعلا هاجرت لاسرائيل؟؟؟

ايوه...هاجرت لاسرائيل

عادى يعنى كده ؟؟؟؟

ايوه عادى كده ...عاوز اشتغل واكون مستقبلى اشحت يعنى فى مصر ...

ما كانش فيه فرص عمل شغل خالص فى مصر ...بلدك ؟؟؟

كان عندى تاكسى جيبته بالتقسيط والفوايد واستلفت فلوسه مقدم ...اولا كل بتوع المروم ما وراهومش حاجه الا سواقين التاكسيات مخالفات قد كده كل سنه ...

بيشبلو من البهوات بتوع الملاكى ويحطوها علينا احنا .وضريبه قد كده فى التجديد ومع ذلك كنت مستحمل
عملت حادثه بالتاكسى ما قدرتش اصلحه ...راح...رجعته لصاحبه واتداينت عشان اسدد باقى اقساطه بس وبقيت على فيض الكريم ...

تعالا بقا فى اسرائيل هاتلاقى نظام وتامين وقانون كل واحد واخد حقو ...يعنى لما يحصل حادثه وعربيتى تتدغدغ ما اترميش فى الشارع والبوليس يحقق ويشوف مين الغلطان والتامين يدفع

ما هو فيه شركات تامين فى مصر ما امنتش ليه على التاكسى بتاعك؟؟؟

منين ؟منين ؟هو انا قادر ادفع اقساط عربيه حتى انا كنت عايش يوم بيوم حضرتك لما عملت الحادثه بالعربيه ذراعى اتكسرت صرفت خمس تلاف جنيه عشان اعمل عمليه فى مستشفى حكومى

ازاى بقا المستشفيات الحكومى ببلاش؟؟؟

انتا مش عايش فى مصر ولا ايه؟السرير بس سيادتك اللى مجانا ولو عاوز له ملايه هاتدفع فلوس ...الشرايح والمسامير وحتى الحقن البلاستيك على حسابى ...أبويا وامى استلفوا من الناس ...مدوا ايديهم عشان اعمل العمليه

ما سفرتش ليه دوله عربيه ؟؟؟؟

سافرت طبعا...روحت ليبيا وقعدت سنه فلوسى كانت تروح على البنك ...جيت اقبضهم الحكومه صادرتهم ورجعت ايد ورا وايد قدام

صادرت فلوسك ليه؟؟؟

هما هناك كده بغزاله مره يقلبوا على المصريين وياخدو فلوسهم وشقاهم ومره لا ...وكل واحد وحظو بقا

طب ما سافرتش السعوديه او الخليج عموما ؟؟؟

اخويا راح السعوديه ...لازم تبقا تحت رحمه الكفيل ياخد منه نسبه من مرتبه ولو غضب عليه ولا استقل دمه يرحله
احنا خدامين الكفيل وروحنا فى ايده ولعلمك مافيش عربى من اى بلد له كفيل غير المصريين
عبوديه وبهدله ...الخليج خلاص ما بقاش فيه شغل والاجور بقت قليله جدا ..ابن عمى راح سكن مع اصحابه 15 واحد فى اوضه واحده عشان الشقق غاليه وقعد 5 سنين ما طلعش بحاجه عليه القيمه ...
المصرى فى الخليج اخر واحد بيشتغل ...دلوقتى بيفضلو الهندى والباكستانى والماليزى على المصرى

ما تسافر اوربا طيب زى اللى بيسافرو ؟؟؟

ابن خالتى سافر هربان على مركب وما نعرفش عنه حاجه لغايه دلوقتى ولا نعرف عايش ولا مات ...وخالتى بتسدد فى فلوس سفره لغايه النهارده

يعنى مفيش غير اسرائيل ؟؟؟

ايوه ما فيش غير اسرائيل وانا مستريح وباخد حقى وفيه قانون والدنيا متظبطه

اتجوزت اسرائيليه؟؟؟

ايوه

خلفت منها؟؟؟؟

لسه ..بس هاخلف ان شاء الله

انتا عارف انهم حايبقو على دين امهم؟؟؟

هى اسلمت وولادى هايبقو مسلمين

هاتعلمهم عربى عشان يعرفو يقروا القران الكريم ويصلو ؟؟؟؟

هاحاول...

ماحدش فى عليتك حارب فى 1967؟؟؟؟

عمى الكبير مات شهيد فى 1967

عرفت مات ازاى؟؟؟

لا هو راح مارجعش

مش يمكن اتدفن وهو حى زى الاسرى المصريين ؟؟؟

حضرتك ده تاريخ وانقضى من اربعين سنه ...ما هو خال امى حارب فى 1973 ورجع معوق ذراعه ورجله اتقطعو ...ولاحد بيسال فيه ...مش دول الناس اللى حطو العلم على ارض سيناء تعرفى حد منهم حضرتك...

بمناسبه التاريخ ما تعرفش اى معلومات عن دوله اسرائيل نشات ازاى ؟.اتزرعت فى المنطقه ازاى؟

لا طبعا ما اعرفش ...اعرف منين ؟؟؟

ما درستش ده فى التاريخ؟

لا

ما قريتش حاجه عن المذابح اللى عملها اليهود زمان ...سمعت عن دير ياسين ؟؟؟

سمعت الاسم ده فى الاغانى

ما بتشوفش اللى بيحصل عندك ؟ الفلسطينين اللى بيموتوا والاطفال اللى بيتقتلو؟ شفت حصل ايه فى لبنان من سنتين؟

شفت وسمعت لكن الفلسطينين نفسهم عايشين مع اليهود اخر انسجام

فاكر الولد الصغير اللى اسمه محمد الدره ؟اللى مات فى حضن ابوه؟؟؟؟

ايوه طبعا ..ابوه نفسو بيشتغل عند اليهود ولغايه دلوقتى عادى جدا ...وبعدين حضرتك فاتحه معايا محضر هو مش فيه معاهده سلام وتطبيع
ما تشوف حضرتك كام رجل اعمال فى مصر بيشتغل معاهم
وهما مالين مصر سياحه والحكومه بتصدر لهم غاز طبيعى
والكل بيستودر منهم بضاعه ماليه السوق
ما تتشطر على الحكومه جات على شغلى انا واكل عيشى وبقيت متعاون مع الاعداء وخاين للوطن

انا سمعت قريب ان فيه قانون هايصدر قريب يحرمك من الجنسيه المصريه ؟

ولا تفرق معايا...الجنسيه الاسرائيليه هاتريحنى لما اجى مصر اكتر ...ساعه ما اطلع الباسبور الاسرائيلى الكل هايحترمنى ويعمل لى الف حساب وهايعملونى احسن منك

انت درست ايه؟؟

دبلوم صنايع كهرباء ومعهد متوسط سنتين

اشتغلت كهربانى ؟؟؟

عمرى انا طلعت من المعهد ده ما اعرفش اركب فيشه كهربا ما اتعملتش حاجه

كنت بتقف فى طابور الصباح؟؟؟

طابور ايه ؟ اهوه شويه هرجله وهلفطه وشتيمه من الناظر وكل واحد يطلع على الفصل وبعد ساعه نزوع وننط من على السور ونلعب كوره فى الشارع

كنت بتحيى العلم ؟؟؟

اه كنا بنحى العلم ...يضحك بسخريه

بتضحك على ايه ؟؟؟

اصل احنا كنا بنقول كلام تانى ..شبه تحيه جمهوريه مصر العربيه

مش كنتو بتغنو بلادى بلادى لكى حبى وفؤادى ؟

دى بقا كنا بنالف عليها كلام تانى

يعنى ايه قصدك كلام قبيح ؟؟؟

من ده على ده

ومبروك عليك اسرائيل

............... ............... ............... ..... ...............

المقاله نشرت فى مجله عين المصريه بتاريخ

22-11-2007

للكاتبه ...د.لميس جابر

تفتكروا مهما كانت الضغوط دا مبرر لسفره اسرائيل وكمان تغيير الجنسيه؟؟

وهل النعيم اللى هو حاسس بيه دا هيدوم؟؟

وهل كفايه ان زوجته تسلم علشان ولاده يكونوا مسلمين بحق؟؟

هل اختار البيئة الصالحه لتنشئة اولاده بالفلوس والعيشه المرتاحه؟؟

هل انت لو كنت مكانه وفى نفس ظروفه هتسافر وتبرر موقفك زيه؟؟

واخيرا ... هل فعلا احنا هنا على مصر عشان كده هانت علينا ؟؟!!

بجد لا استتطيع الا قول لا حول ولا قوة الا بالله

انا افتخر ان بطاقتي الشخصية مكتوب فبها في خاننة الجنسية
...مصري
تقبل مروري

زائر

تقبلته يامعلم

شكرا لمروك

لا حول ولا قوة الا بالله

بجد مش عارفه لى كده
ازاى واحد مسلم مصرى يعيش فى اسرائيل ويقبل اكل عيشه منهم
مفيش غير ربنا يهدى الجمييييييييييييييييع
مشكوووووووور كتير لمجهودك

دة راااااجل مريض واللهى حد يسيب مصر ويرووح بلد اليهوود
ربنا يهدى الجميع فعلا
توبيك اكثر من روعة تسلم مصطفى

دا ميبقاش مصرى
او معندوش انتماء
انتا او كلنا بنحب امنا علشان هيا امى
غصب عنى
هحبها
لا وهعشقها
ومصر اجمل واجدع
ام

وفى النهاية
ربنا يسامح كل مصرى يسيب
بلدة

زائر

شكرا لمروكم يامصرين ياوطنين

شكرا لطرح الموضوع يا مصطفى

وماعنديش تعليق
أفضل الاحتفاظ بيه
بس مصر كبيرة قوى
وهو اللى خسر

زائر

شكرا لمرورك

المصري دمه حامي

اكيد دا مش مبرر للعمله
واكيد فى ناس كتير فى ظروفه
ومعملوش كدا
كان لازم يعرف ان الدول دى عارفه نقط ضعفنا وبتستغلها
وبعدين ازاى يعيش مع ناس مفيش بينا وبنهم اى حاجه كويسه

مرسى على الموضوع
وارجو تقبل كلامى

زائر

شكرا لمروكم الكريم

» ياترى عيد ميلااااااااااااااااااااد مين ؟؟؟؟؟؟؟؟؟؟؟؟
» ياترى هتنزل ولااااااااااااااااااااااااا..........؟؟؟
» ياترى الحياه شكلها ايه من غير بنات
» هل انت صديقى ام اخى فى الله ياترى ايه الفرق
» Icon26 ياترى ماهو السر...........؟؟؟؟؟؟؟؟؟؟؟؟؟