انا هعمل كده ،وانتوا هتعملوا ايه ايه

eagreen]]السلام عليكم
ازيكم جميعا يارب تكونوا بخير
[/size]

الموضوع وما فيه ان لسا حوالى شهر على الامتحانات بتاعتنا ولازم نكون بدأنا نزاكر بجد
و بما ان نظام الجامعه كلو ضرب مفيش شتيمه فا افترض ان معظمنا ان مكانش كلنا مزاكر اي مادة مذاكرة تذكر

وعشان كده انا حابه اننا نتشارك ف عرض افضل الطرق اللى نزاكر بيها كل مادة بحيث اننا نحقق افضل نتيجه باقل جهد و اقل وقت

فى ناس بتقعد ف الصفحه الواحده ساعتين و تلاته تحفظ فيها من غير فهم و تشتكي انها بعد دا كله مش فاهمه و مش حافظه و دا _مع احترامى للجميع _لانهم بيذاكروا بطريقة غبيه
الجامعه مش عايزه حفظ زي الثانوي و مش عايزه كلام بالنص اللى مكتوب ف الكتاب الجامعه عايزانا نفهم و نعبر و عشان كده فى ناس بتدخل طب و هندسة و صيدلة و بتسقط فيهم
لانهم حفظوا ف الثانوى من غير ما يكون عندهم مستوي ذكاء عالى ياهلهم للكليات دي

و فى ناس بتطنش الكليه و المحاضرات و تتجه للكورسات و المذكرات اللى خسارة دفع الفلوس فيها
الدكاترة بتوعنا و الحمد لله بيعملوا اللى عليهم و ان كانوا حتي مش بيعملوا اللى عليهم فا هما مش هيطالبونا باكتر من اللى عملوه
يعني تحضر المحاضرة و تسمع للدكتور و تكتب وراه و تعرف هو دماغه عايزه ايه احسن من اى مذكرة او اى كورس
الورق و الكورسات عشان تبقي صح و مفيده لازم تكون بتقول اللى الدكتور بيقوله مش اكتر ولا اقل
اما بقي الناس اللى بتحب تعمل للطلبه المهملين البحر طحينه و تعيشهم ف الوهم فا دول بيضيعوهم ف الاخر
حد فيكم شاف زميل ليه ف كليتنا على وجه التحديد اخد كورسات و مشي ورا الورق و جاب تقدير عالى ؟؟؟؟ من واقع الحياه اللى بيعملوا كده يا ايما بيجيبوا مقبول او ينجحوا بالرفع او يسقطوا ، صح ولا انا غلطانه
اديكوا مثال واقعي جدا
اختى الكبيره ف رابعه اداب انجليش و اختى للعلم داخله اداب بمجموع 93.5%من علمى علوم يعني بتاعة كيميا و فيزيا و احياء
اختى الشطان لعب بمفك صليبه ف دماغه و خلها تصور مذكرات من زميلتها اللى ماشيه بالدروس و بتنجح بالعافيه بمقبول
الترم اللى فات ركزت على الورق و تجاهلت المحاضرات و ملقتش وقت تزاكر اللى الدكاتره قالوا عليه
لانها حست ان الورق فيه الكفايه و زيادة لان الورق دا كان منقول بالنص و نراعي كلمة بالنص دى من الكتاب ، و دا طبيعي لانهم مش هيجيبوا حاجه من عندهم
المهم راحت تمتحن لقت الحشو اللطيف اللى ف الورق مفيش منه حاجه ف الامتحان و اللى الدكاتره محددينه و مش موجود ف الورق جاى منه نص الامتحان و مفيش داعى اقول انها جابت مقبول بالعافيه و كانت على وشك انها تسقط ف المجموع

فا ياريت نفكر بعقل
انا جربت مذكرات علاء الدين التيرم اللى فات ف مادة التربية و قضايا العصر
ولاحظت اد ايه هو مكبر الخط عشان يدينا الاحساس ان المذكره كبيره و فيها كلام
وكمان لاحظت انه بيلك كتير بزياده يعني مذكره 12 صفحة فيها حوالى 4 صفح او اكتر رغي
ولاحظت كمان اخطاء لغويه و اسلوبيه و مطبعيه كتير لدرجة انها ممكن تكون مضلله و تخليك تجاوب غلط ناهيك عن السطحيه ف الاسلوب و انه بيخاطب الناس اللى عايزه تنجح بالعافيه دا ان ورقه نجحهم

و نقطة كمان بخصوص الابحاث و الشيتات
معظم الطلبه بيروحوا يجيبوها على الجاهز و الحاجات دى و الله العظيم بتبقي بتتكلم ف حاجه غير المطلوبه تماما
يعني مثلا مادة علم نفس النمو الترم دا الشيت كان عبارة عن تلت اسئله اول اتنين منهم موجودين بالنص ف الكتاب واحد ف الفصل الاول و التانى ف الفصل الاخير ،و مع كده لقيت كتير من زمايلنا راحوا جابوا الاجابه جاهزه !!!!!!!!!!
و البحث انا مش هنكر انه كان صعب شويتين او حتى تلت شويات بس كان ممكن نتعب شويتين فيه
انا مثلا استعرت كتاب من مكتبة الكلية و اخدت منه حاجات نفعتنى و جبت حاجات من على النت و اضفت جزء من كلام احد الزملاء كان منزله هنا على المنتدى و غلب حماري و مع عدم اقتناعى باللى انا كاتبا ه بشكل كامل بس خلاص جبت اخري
انا شوفت بقي زميله عزيزه جايبه اكتر مني بيجي 4% ف الثانويه العامه راحت جابت بحث جاهز من مكان ما و فتحته من باب الفضول لقيت العنوان اساسا مش هو المطلوب ما بالكم باللى جوا البحث و من المعروف علميا ان البحث بيبان من عنوانه
فا انا بنصحكم نصيحة اخت انكم تبعدوا عن الحاجات دى كلها لانها مش اكتر من خساير بالجملة خسارة فلوس و وقت و تحصيل دراسي و البديل هو اننا نساعد بعض و اى حد محتاج لاى حاجه يطلبها من زميله اللى ممكن يفيدوه

عندك حق والله احنا بقي يعني انا واصحابي بنعمل ايه اللي مش فاهم حاجه التاني يفهمه وبنحاول نلم المناهج وربنا يستر ونعدي علي خير

رغيت كتير ندخل بقي ف المفيد

اولا
مادة حقوق الانسان مش ناويه اضيع وقت فيها هقرأها قراءة جرايد و هبدء ف الكلام دا يوم 1_6 لانها مش هتتضاف للمجموع و ان شلتها مش هزعل و ان شاء الله نظام الامتحان اللى هتيجي بيه هيسهل علينا الامور لانك لما تشوف الاجابات قدامك هتميز الصح بينهم بسهوله عن انك تدور ف دماغك عن الاجابه

ثانيا
مادة المعلم و مهنة التعليم (طبل ف المطبل)جملة الدكتور اللى بيديلنا المادة
واضح جدا ان الدكتور دماغه ف السحاب و بما ان الدكتور دماغه ف السحاب يبقي لازم الطالب دماغه بقي ف السحاب
انا ناويه اسمع كلام الدكتور ولو انه مش عاجبني
هحفظ العناوين و اقرء الشرح مره ولا اتنين كده و هنعدى على خير ان شاء الله خصوصا انه لغي تقريبا اكتر من نص الكتاب

ثالثا
مادة علم نفس النمو ، الصراحه انا بعز المادة دى جدا بحس انى بستفيد منها و عشان كده ههتم بمذاكرتها لانها بتمثلى استفادة عامة مش لمجرد الامتحان
هعمل ايه بقي هبدأ بالحاجات التقيله اللى مزاكرتهاش بالنسبالى نظرية بياجيه و المنهج التجريبي و الوصفى
مش لازم نمشي بالترتيب بس مهم اننا نزاكر الحاجات المرتبطه ببعضها مع بعض
مثلا
الامتحان اللى الدكتورة عملته انا اول ما بدءت ازاكر بدءت بالعاشر و الحداشر لانهم بيتكلموا عن المراهقه

و طريقة المزاكره كالاتى
هقرء الجزء اللى ناويه اذاكره قراءه سريعه ، يعد كده هجيب ورقه و قلم واقرء و اكتب ف وقت واحد و الحاجه اللى احس ان فيها مشاكل اكتبها مرتين بس منزودش عن تلاته بعد كده اقرء الجزء قراء هاديه عشان اثبته
و قبل ما ادخل على حاجه تانيه اقوم اعمل اى حاجه عشان ادي دماغى ريست و الكلام ميدخلش ف بعضه

ثالثا
مادة الجرامر
انا شايفه انها صاعبه شويه على الاقل عليا لانها كبيره بس هي بسيطه ف التعامل معاها
هنقرء الشرح و اللى على فكرة بسيط جدا و مباشر جدا و لو حاجه لقيناها صعبة نكررها كام مره و بعد كده نحل الاسئله شفوى و الحاجات اللى نلاقيها صعبة او غلطنا فيها قبل كده نكتبها على جمب

رابعا
الترجمة
انا طول عمرى بحب الترجمه من يوم ما قابلتها يعني و واضح جدا انها تختلف و بشدة عن ترجمة الثانوي اللى كانت سطرين و اقلب
الترجمه بتعتمد على تلت حاجات اساسيه
انك تكون حافظ كلمات كتير و انك تكون عارف قواعد كويس و انك يكون عندك اسلوب سليم وراقى
الترجمة مهاره بتتحسن مع التدريب
بس دلوقتى احنا قدامنا منهج و شهر و امتحان هنعمل ايه؟؟؟
اولا هنحفظ الكلمات الصعبة و الجديدة ف القطع اللى ترجمناها ف المحاضره قدر الامكان _دا مبدئيا انا لسا معرفش الدكتوره هتقول ايه_محدش يحفظ تراجم دا قمة الغباء و انا بقول لكل واحد هيحفظ ترجمه انت انسان غبي انت جبت مجموعك دا ازاى..........
بالنسبة للجزء النظري
انا قرءت اول 50 صفحة و هما مليانيين رغي ملوش لازمه و بدءت اللخصهم باسلوبي _و اللى حابب يشوف تلخيصي دا انا تحت امره_و دا انا بدءته امبارح بس عشان اقبل الامتحان مبصش ف الكتاب و اركز ف الورق دا_اللى انا عاملاه بعد قراءه وفهم مش بتاع سمسم و توتو_

خامسا الشعر
انا مش داخل دماغى المادة دى الصراحه
انا شايفه ان الشعر مينفعش يكون الا عربي و مش قادرة اتذوق الشعر الانجليزي خالص و مش لاقيه فيه اى فايده لينا من دراسته لا لغويا ولا فكريا و عمليا
بس المضطر يذاكر شعر انجليزي

هنعمل ايه بقي
اولا هنحفظ حفظ جيد جدا الكلام اللى الدكتوره بتمليه ليه اللى هو التعريقات مش تحليل القصائد ولما نحفظ الكلام دا هنعرف نحلل اتخنها قصيدة تجيلنا ف الامتحان بشرط ان يكون حفظ مقترن بالفهم
بالنسبة للسبع قصائد اللى الدكتورة حددتهم و حللتهم معانا فا هنعرف عنوان كل واحدة و اسم الكاتب بتاعها و العصر اللى بتنتمى ليه ، قولوا معايا تانى هنعرف عن كل قصيدة ايه؟؟؟
العنوان اسم الكاتب و العصر الادبي اللى بتنتمى ليه و بس
اى حاجه تانيه ممكن نستنتجها من القصيدة نفسها
بالنسبه ليا شخصيا انا عندى مشكله مع الرايم سكيم و تحديد المقاطع الاستريسد و الانستريسد فا هضطر اسفه انى احفظ دول كمان لانى مش هعرف اعملهم

و كده كفايه عشان الساعه 8 و تلت وانا لسا مجهزتش خاااااااااالص للخروج
اكمل لما نرجع من الكلية
اشوفكم على ارض الواقع كمان ساعه وشويه كده

ايوة
علشان كدة دخلتي المحاضرة متاخر
وانا قلت مواصلات يا حرام
اتاريكي كنتي قاعدة علي المنتدي
تسلمي يا نايل
كلام سليم مية في المية

كلام جميل كلام معقول مقدرش اقول حاجة عنه
هي فكرة كويسة جداا يا نايل كوين وتنظيم رائع عن المواد صراحة

فعلا هي دي المشاركة والتعاون مع بعض

اشكرك واتمنالك التوقيق في حياتك العلمية والعملية

مشكورة بجد
نايس توبيك
و ربنا ينجحنا كلنا و كلامك صح مية فى المية

خير الناس انفعهم للناس شكرا ليكى كلام جميل ولكن يحتاج لاكتر من شهر عند بعض الناس وكمان انتى قولتى بعض المواد ونسيتى الكل وبالنسبة للشعر انا معاكى انه مافيهوش اىمعنى ولا تحساس زى الشعر العربى بس انا مش شايف اى مشكلة اطلاقا لا فى الرايم سكيم ولا البحر الشعرى بس اقرئى اول محاضرتين بتركيز بعد قراءة اى سورة من القران ودعاء المذاكرة قال تعالى (واتقوا الله ويعلمكم الله) وانتى هاتفهميهم عالطول من غير حفظ وحشو لان الحفظ مبدا اصحاب العقول الضعيفة : ( بسم الله الرحمن الرحيم ،
دعاء المذاكرة والنجاح ـ بإذن الله ـ قال الله تعالى : (وَإِذَا سَأَلَكَ
عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا
دَعَانِي فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ
يَرْشُدُونَ) البقرة/186 وقال عمر بن الخطاب رضي الله عنه : (لا أحمل هم
الإجابة ولكني أحمل هم الدعاء ، فإذا وفقت في الدعاء أعطيت الإجابة) ونحن
على أبواب الامتحان هداني الله لجميع هذه الأدعية والتوجه بها إلى الله في
أوقات المذاكرة ، وعند الامتحان ، وفي حال النسيان . دعاء قبل المذاكرة :
اللهم إني أسألك فهم النبيين وحفظ المرسلين والملائكة المقربين ،اللهم اجعل
ألسنتنا عامرة بذكرك ، وقلوبنا بخشيتك ، وأسرارنا بطاعتك ، إنك على كل شيء
قدير ، وحسبنا الله ونعم الوكيل . عند دخول الامتحان : رب أدخلني مدخل صدق
وأخرجني مخرج صدق واجعل لي من لدنك سلطاناً نصيرا . دعاء بعد المذاكرة :
اللهم إني استودعك ما قرأت وما حفظت وما تعلمت فرده عند حاجتي إنك على كل
شيء قدير . عند بداية الإجابة : رب اشرح لي صدري ويسر لي أمري واحلل عقدة
من لساني يفقهوا قولي ، باسم الله الفتاح ، اللهم لا سهل إلا ما جعلته
سهلاً يا أرحم الراحمين . عند التوجه للامتحانات : اللهم إني توكلت عليك
وفوضت أمري إليك ولا ملجأ ولا منجى إلا إليك . عند تعسر الإجابة : لا إله
إلا أنت سبحانك إني كنت من الظالمين ، يا حي يا قيوم برحمتك استغيث ، رب
إني مسني الضر وأنت أرحم الراحمين . عند النسيان : اللهم جامع الناس ليوم
لا ريب فيه اجمع علي ضالتي . بعد أن ينتهي من الإجابة يقول : الحمد لله
الذي هدانا لهذا وما كنا نهتدي لولا أن هدانا الله .تقبلى مرورى وانا اسف عاى الاطالة وشكرا

الله عليك يا سيد وعلي كلامك اللي زي الفل بس ربنا يهديني ويهدي الجميع ونعمل بالكلام ده

اللهم قوي ايمانك يا سيد يا ابني
وربنا يوفقنا جميعا لما فيه الخير لنا جميعا

يسلام عليك يابو السيد

جزاك الله خير يابنى

thanks nice topic

انا جيه بعد م الامتحانات خلصت و خلاص كده بقى فركش يننجح يا لاء ف السنه لاجيه ان شاء الله قولوا يارب وننفذ الكلام ده

» موضوع متجدد: اطلب أى أغنية وشوف انا هعمل ايه
» كل سنه وانتوا طيبين
» كل سنة وانتوا طيبين
» كل سنة وانتوا طيبين
» كل سنه وانتوا طيبين يا...؟؟؟