ازى تبقى ملكه جمال ؟؟؟؟؟؟

والصلاه والسلام على اشرف المرسلين سيدنا محمد وعلى اله واصحابه اجمعين

يلا نبتدى

كيف تصبحين امراه جذابه ... ؟؟ سؤال يطرح نفسه

كل واحده حتموت وتبقي ملكه جمال العالم حتى لو كانت شايفه شمبانزى في المرايا بس حنعمل ايه ... امها بقي منها لله ... اصل القرد في عين امه غزال ومش عايز واحده تنكر كلامى وتقاطعنى عشان انا فهمكوا كويس اوى وخلوا الليله دى تكمل وتعدى على خير

وطبعا عشان تبقي مميزه وجذابه لازم عده طرق وخطوات لازم تعمليها سيادتك عشان نظبطوا ام الموضوع ده لان كده مينفعش

احب انوه عن حاجه ومحدش يسالنى يعنى ايه انوه لانى انا شخصيا مش عارف .. ان ممكن سيادتك تكونى جذابه وتحافظى على انوثتك الطاغيه وجاذبيتك مع احترام الاخرين .. يعنى الواحد يحس انه بيتعامل مع بنى ادمه وده ممكن يتحقق سيدتى باقل تكلفه ... يعنى مش لازم المصاريف اللى خرمه جيبك وجيب اللى خلفوكى عشان المكياج والميك اب .. لا .. براحه شويه عشان حرام .. نبتدى بقي في النصايح

1-اصنعى لنفسك اسلوب خاص بكي

يعنى لمو اخذه طريقه الكلام ... طريقه حركه الايدين وانتى بتتكلمى .. لازم تكون متلائمه مع شخصيتك ولازم تحافظى على تطويرها باستمرار .. يعنى الواحد مننا يحب يتكلم مع واحده اسلوبها في الكلام يشده مش واحده عماله تتفتف وهى بتتكلم وتخليكي تحلفي مليون يمين انك مستحميه قبل ما تيجي ... لا برضه لازم يكون في اصول واسلوب حلو متلائم مش الشخصيه

طبعا لبس الملابس الرياضيه وربط شعرك مش اسلوب ابدا .. لكن حاولى تفتحى وتتصفحى مجلات الموضه واختارى صور مناسبه ليكي ولافكار بتحبيها موجوده في دماغك ... خدى اللى يناسبك ويناسب المجتمع اللى انتى عايشه فيه ( احنا عايزينك متميزه .. وليس شاذه )

2-انتبهي للتفاصيل الصغيره

يعنى مثلا تغيري لون شعرك اذا لزم الامر ... البسي الوان غير اللى بتلبسيها في العاده .. اكسسورات لزوم الدلع والمنجهه .. ومكياج خفيف ابوس ايديكوا

ملاقيش يعنى واحده زرعه ملوخيه فوق عنيها ... اه مانا بشوف عاهات عندى في الكليه .. كميه خضار فظيع فوق العين ... متعرفيش ده ملوخيه ولا برسيم ولا ايه بالظبط ... واحمر الشفاه يا سلام على اللى بيحصل فيه ... الواحده من دول تقولك كل ما تحط اكتر كل ما تبقي حلوه اكتر ... وتلاقي واحده تانيه هابله حاطه احمر شفاه في شفايفها وبره شفايفها تحس ان شفتها فردتين كوتش كبار باللون الاحمر اللى هى حطاه .. المكياج يبقي خفيف ومعقول ابوس ايديكوا عشان ربنا يكرمنا في الليله السوده دى

الكالم ده لو حتحطوا مكياج يعنى .. لانه اساسا حرااااااااااااااااااااااام
عشان ابقي خلصت ذمتى من ربنا ...

يخربيت ابو ده موضوع مش حنخلص النهارده

3-حافظى على مشيتك

والنبي خلى الطابق مستور لانى بشوف معوقين ماشيين ... يا جماعه المشيه بتاعه البنت لازم تكون مهذبه واكيد انا واثق في بنات المنتدى دى كلهم على اعلى مستوى من التربيه بس انا بتكلم عموما ... يعنى مش لازم الاستيك اللى انا بشوفه والمشيه الغريبه اللى بتبحطر رز يمين وشمال دى

والجزمه يا انسات ... الجزمه لازم تكون معقوله .. يعنى مش لازم كعب20 سم عشان تبقي انيقه وجذابه وتطقطقي طول مانتى ماشيه

البنت الجذابه مش اللى تطقطق وتجر رجليها وراها
البنت الجذابه اللى تمشي في هدوء وثقه
يا مسهل

4-لا تنسي نظافه اسنانك

يعنى الواحد مننا يحب يشوف صفين لولى .. مش صفين موز .. السنان الصفراء مش جذابه خالص .. الاسنان البيضاء دايما بتبقي جميله

غير كده الاهتمام بنظافه الفم بيخليه دايما ذو رائحه طيبه ... يعنى لم اجى اتكلم مع اى حد سواء ولد او بنت .. يكون رائحه فمه طيبه مش تخلينى اشم في صفيحه المحترمه ارحم

ويا ريت تندغى لبانه او مستيكه بالنعناع لضمان الرائحه الطيبه ... وطبعا ندغ اللبانه باصول ... يعنى مش طرقعه وبلالين والكلام الفاضي ده .. لا في هدوء وبوقك مقفول او مورباه

5- حافظى على نظافه شعرك

بصراحه ... الشعر المأمل والهرش والجرب والاسلوب ده كله انا مبحبهوش ... لازم نحافظ على نظافه الشعر ونقوم بتسريحه مريحه وجميله ... يعنى فككوا من القصات الغريبه اللى بشوفها دى ... ميزنبليه ... وكاريه وتسريحه برج الحمام الزاجل

لالالا خالص ... مش لازم تكتفي نفسك يعنى وتخلى شعرك داخل في بعضه وتروحى البيت تقعدى ساعه تسلكى فيه ... لا يكون بسيط وطبيعي ... طبيعي ها ... يعنى لو واحده قرعه مش لازم باروكه بقي ولا الكلام ده عشان لو حد من زميلاتها هزر معاها هزار بايخ وشدتها من شعرها ... حيبقي موقفها محترمه اوى ... فتتحجب ارحم ونخلص

ويا بنات بلاش الاسبراي اللى بيخلى الشعر شبه سلك المتريال ده .. بقي موضه قديمه ملهوش لازمه ... خليه طبيعي والتسريحه تبقي بسيطه
الكلام ده للمش محجبات
للمحجبات بقي يا ريت تخاروا طرحه شيك وتناسب لون هدومك وتمشي عليه ... يعنى متلبسيش بلوزه او بادى اخضر والطرحه تبقي فوشيه
يعنى راعوا الناس والتلوث البصري
وبلاش التعقيد في اللفه والسبانيش مش لازم يعنى ... وخلى اللوان الطرحه معقوله لان كل ما الالوان تقل وبسط التصميم كلما كان اكثر جاذبيه

6-ارتدى دائما ما يناسبك

يعنى اختارى هدومك بعنايه ... هدوم تناسبك وتناسب جسمك ... يعنى لو كنتى طويله متلبسليش كعب ... لا في حاجات حلوه تانيه وبلاش الهدوم المقلمه بالطول كده حتبانى نخله ماشيه في الشارع

ولو كنتى قصيره البسي هدوم مقلمه بالطول عشان تعوضي النقص اللى عندك وربنا يزيدنا ويزيدك

لو كنتى تخينه بلاش الحاجات الفاتحه ... عشان متعرضيهاش اكتر ... الغامق بيلم وبيدارى بلاوى سوده
ولو كنتى رفيعه يبقي العكس ... هدوم فاتحه عشان تظبطى الكلمات

7-شخصيتك يجب ان تكون مقبوله

عشان تعرفوا حاجه يا بنات .. مهما كنتى جميله وشخصيتك مش مقبوله اجتماعيا ... تفي في وشي لو نجحتى في انك تحصلي على اعجاب الاخرين ... يا بنات الجمال جمال الروح والشخصيه اللى تبقي مقبوله احتماعيا هى اللى تتقال عليها جميله وعشان كده ... اتعلمى اللياقه في التحدث وادابه .. خليكي متواضعه على قد ما تقدرى ومرحه لكن بحدود طبعا ... يعنى متفتحيهاش على البحرى وتبقي سداح مداح يلاااااااااااااااااا ... اللى عايز يهزر يجي يهزر معايا مانا شخصيه مميزه بقي لولولولولييييي ... لالالالا اهدى يا ماما وخليكي كلاكس ... لازم المرح يبقي ليه طريقه وحدود تحطيها لنفسك بحيث تكونى محبوبه وسط الناس

8-تخلى عن العجرفه والغرور

خلى تصرفاتك مع الناس خاليه تماما من العجرفه والغرور ... بلاش بابي ومامى بياكلوا مربه يوماتى

وبلاش عندى عربيتين وطياره هليكوبتر 4 ريشه وفيليتين في الساحل الشمالى واحده ليها بسين والتانيه فوق الميه اساسا ... اللى جابلك يخليلك مقولناش حاجه ... بس بلاش الكلام ده لانه ممكن يجرح بعض الناس وممكن يصيبك انتى بداء الغرور ... خليكي طيبه وخلوقه وهاديه في طباعك

9-انتبهى لطريقه وقوفك

سؤال ومحيرنى ... ليه فيه بعض البنات بيموتوا في رقم اتنين لما يجيي يقفوا ؟؟؟ ماله رقم واحد مهو زى الفل ده حتى حطينه قبل اتنين ولا غيروه في المقرر السنه دى ؟؟

الوقفه يا بنات تبقي عدله ومستقيمه ... بلاش حرف الاتنين ده ممكن يقلل من قيمتك كبنت محترمه ... رجعى كتفك لورا ومترخيهومش .. لا عادى خليهم على طبيعتهم ... وخلى ضهرك مفرود ومستقيم وعشان تتعودى على الوقفه دى ... وانتى في البيت كده اقفي وضهرك مسنود ومفرود على الحيطه لمده خمس دقايق كل يوم عشان تاخدى على الوقفه الصحيحه والصحيه ... عايز اشوف بنت بقي تيجي تقولى الحيطه سقعه عشان اجرى وراها في الشقه كلها

10-اهتمى بنبره صوتك

مبقولش تصنعى نبره صوت رقيقه وكده لالالا مش حينفع صدقيني ... لما تيجي تتكلمى اتكلمى بصوت واضح وهاديء ومنخفض ...مش منخفض جدا يعنى .. يعنى متهمسليش وانتى بتتكلمى وافضل احللك كلمات متقاطعه طول مانا واقف ... حتشل كده ... لا الصوت يبقي مسموع بس يبقي منخفض يا رب تكونوا فهمتوا الحته دى .. انا عارف حتبوظوا الدنيا وحتقولولى انت السبب .. ابوس ايديكوا افهمونى ... وبلاش تتكلمى كان في حد بيجري وراكى ... لا اتكلمى في تأنى عشان اللى حواليكي يلحق يسمع ويستوعب ويفسر ... مش على طول ايه ايه ايه ؟؟ ده حتى ممكن تبقي بتتكلمى يسيبك ويمشي بالطريقه دى

لا يبقي صوتك هادى وواضح ومنخفض ومسموع

مش حقول اكتر من كده وانتوا حريين وحاولوا تمرنوا وتدربوا صوتكوا على الوضع ده دائما حتى في البيت
يعنى متبقيش في الكليه او المدرسه بالطريقه دى وفي البيت ان انكر الاصوات لصوت الحمير
لا ده لنفسك مش لاصحابك في الكليه فلازم تاخدى على كده جوه وبره

11-لا تكثري من الضحك بل حافظى على جاذبيتك

سيدتى الجميله الانيقه ... ابوس ايد اللى خلفوكى

بلاش الضحك والقهقهه والهيهيهييييييييييي دى

لانى الصراحه بشوف بنات عندنا بتضحك بسم الله ما شاء الله ... عالمه بتضحك مش بنت انا اسف في الكلمه ... في بنات بتبقي ضحكتهم الطبيعيه بتبقي عاليه وفضيحه انا عارف بس نصيحه منى ليكوا ... لما تضحكوا حطوا ايديكوا على بقوكوا ... عشان متطولش منكوا وتفقدوا جاذبيتكم واناقتكم
يعنى احنا مش حنعمل كل ده وتيجي نكته محترمه تبوظ ام اللى احنا عملناه ده كله ... الضحك يبقي بحذر وصوت على قد ما تقدرى يبقي واطى
ومتطوليش في الضحكه اوى ... لا ... خليها تاخد حقها وخلاص عديها بقي ... ده بالنسبه للضحكه نفسها
في حاجه كمان وانتى بتضحكى وهى شكلك وانتى بتضحكى ... بلاش ترجعى راسك وتديها هاهاهاهاها ... لالالا حافظى على وقفتك او قاعدتك الطبيعيه وانتى بتضحكى
وبلاش تضربي الارض برجليكي وانتى بتضحكى
ابوس ايديكي مش ناقصه هبل

واحنا بكده حزمنا الموضوع من كل جوانبه بالصلاه على النبي .. وبكده حتكونى فتاه جذابه ومميزه شخصيه متميزه وسط اصحابك واحبابك في المجتمع اللى انتى عايشه فيه ... وتبطلى حقد على البنات التانيه بقي

انا كده خلصت ذمتى من ربنا وسلمتلكم العلم اللى حتنتفعوا بيه في الدنيا

على الله يطمر بس

مستنى ردودكوا يا بنات

تعبتوا قلبي وصدعتونى
ههههههههههههههه الصراحه انا قريت الموضوع و عجبنى اوى هههههههه حبيت اضحكوا و افيدكو هههههههههههههه

ههههههههههههههههههههههههههههه
مبطلتش ضحك
بس توبيك مهم جدا
ومفيد لكل البنات

وبلاش تضربي الارض برجليكي وانتى بتضحكى
ابوس ايديكي مش ناقصه هبل

هههههههههههههههههههههههههههه

عثوووووووله يا نونى

تسلمى يا قمر على الموضوع

بالرغم انه بصيغه فكاهه بس كلامه مظبوط
ولازم كل البنات يتعلموا منه

تسلمى يا سكره

ههههههههههههههههههههههههههههه
ايه التوبيكـ الفكاهى دهـ هههههههههههههههههه
كلهـ يضحك بس بجد مهم هههههههههه
واكيد هنستفيد منهـ
ميرسى جـدا يا نونى ..

العفو يا بنانيت هههههههههههههههههههههههه
منورين يا احلى قمرات يلا اى خدمه هههههههههه

» ملكه جمال الجنه , هل قرأتم أو رأيتم أو عرفتم عن ملكة جمال الجنة
» ~ْْ~ْ~ْ~ْ بالصور و الله جمال يفوق الحد * جمال ربانى من صنع الله ...!!!!!
» نفسى تبقى قريب
» أزاى تفدر تبقى تبـــــــــــــــــــــــــــــــــــــت.......... ...................................
» ازاى تبقى رومانسى ....