أتلم موكوس على متعوس

لقيت الفانوس مره ودعكته طلعلى العفريت شبيك لبيك
قلت انا للذل باى باى وللعفريت ههريك ههريك

قالى هأوأو يابن الانسان دا انا عفريت مارد بن جان
مايهمنى مكانولازمان واطلب وانا عندى البرهان

أنا عاوز زرع قمح فى مصر ومرتب يكفى لأخر الشهر
وحكومه متعصرنيش عصر ومسئولين يبطلوا فشر

وعاوز عيش من غير طوابير وانفاق حكومه من غير تبذير
وانتخابات من غير تزوير ورئيس سابق أشوفه كتير

عايز فى بيتى شيكارة دقيق وتبرير مقنع لأى حريق
ومجلس شعب بدون تصفيق وفى كاس العالم لينا فريق

وأكلة كباب مشوى عالسيخ مع عيالى فى شرم الشيخ
واشرب فى القسم عصير بطيخ واخرج من غير تلطيخ

ونفسى الضحكه ترجع تانى ورصيف للمشى انا وخلانى
وجنيه مصرى زى البرانى يشترى حتة لحمه ضانى

رد العقريت عليا بغشم وقالى يامصرى مكانش العشم
بص أنا ممكن أشيلك الهرو وأسدلك الاوزون اللى اتخرم
وارجعلك الأكل اللى اتهضم وتمأمأ البقره كأنها غنم

أبنيلك قصر من العدم وأقولك معنى شرم برم
ده تخطيط يابنى ومدروس انك تعيش على طول موكوس
واحنا بناخد منكوا دروس ازاى يبقى الجن متعوس
وياريت ترجعنى تانى الفانوس أنا راضى أعيش محبوس
بدل ما اخرج واتبهدل زيك ويتلم موكوس على متعوس

جاااااااااااامده بجد

تسلم إيدك ..

ميرسى بجد ليكى

منوره دايما