(زوجي مازال حبيبي) بقلم الكاتبه ساره درويش

فى البدايه فى اهداء كده صغير فى اول الكتاب يهمنى اوى انكم تقروه


اهداء...........
اليك يامن لن يكتمل عالمى الا بك
اليك يانصفى الذى سينصفنى الله به على الدنيا
اليك ياطعم الحياة
مع خالص عشقى
ساره



[ندعوك للتسجيل في المنتدى أو التعريف بنفسك لمعاينة هذا الرابط]

قبل مانحكى الحواديت
من الرائع ان تشعر المرأه ان لها رجل ما..رجل تستطيعان تلجأ اليه اذا ضاقت بها الدنيا
رجل تثق انه لن يقابل شكواها بالضجر او بالتشفى او بالقسوة
لكن الاروع من كل هذا ان يكون هو اختار بنفسه ان يكون هو هذا الرجل اختار بكل حب ان يكون هو ملاذها ..حصنها..وامانها
ملاذى الحبيب وحصنى الذى لم اشعر قبله بامان..اشكرك ..اشكرك لانك دائما هنا..تمنحنى الضوء فى اكثر ليالى حياتى عتمة وتمنحنى الدفء حين يشتد السقيع شكرا..لانك تتحملنى بكل الحب..بكل الرضا..بكل الحنان
زوجى الحبيب
شكرا
ساره
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــ

ممكن تحطى الفيشه؟؟ّ!!

"ممكن تقعد بقى؟؟خيلتنى؟؟!!"دى انا كنت متنرفزه اوى منك...علشان رايح جاى كل شويه قدام مكتبى..وأنا مش عارفه اركز خالص بسببك
بصيتلى وكنت متوقعة مناقرة تانى زى كل يومبس الغريب انك كنت طيب جدا وقلتلى حاضر.
استغربت جدا وقلت فى سرى"مش عوايده يعنى"بس بردو مافيش فايده..زلقيتك قمت من على مكتبك وجاى ناحيتى تانى فبصيتلك البصة المفتريةبتاعتى وعينى بتقولك"وبعديييييين بقى"..وقبل مااتكلم فاجئتنى بأغرب طلب فى الدنيا..
"احم:::ساره:::ساره:::ممكن تحطى الفيشه؟"
"افندم..احط ايه؟"
"فيشة تليفون البيت ..انا عارف انك دايما فاصله الفيشه..
ممكن تحطيها النهارده بس حتى؟؟!!"
من صدمتى من طلبك ماعرفتش ارد ..ولقيت نفسى غصب عنى بقولك حاضر وقعدت دماغى تودى وتجيب خاصة لما لقيتك استأذنت من الشغل ومشيت.
قعدت افكر فى طلبك الغريب وقلت طب لو عايز يرخم عليا على تليفون البيت كده هاعغرف انه هو!
وبعدين اصلا يعنى انا مااديتهوش تليفون البيت!!
وبعدين قلت لنفسى يمكن جابه من الدليل ..بس دى تبقى قلة ذوق يعنى لما يتصل بيا وانا مااديتهوش الرقم..اوف بقى
ونويت بصراحه انى اتخانق معاك لو عملتها ونويت اقعد جنب التليفون علشان اول ماتتصل اوريكشغلك بقى.
بس لما روحت البيت كنت نسيت ونمت..ولقيت ماما بتصحينى وتقولى بابا عاوزك..قلقت اوى..خير ايه حصل..ليه بابا بيصحينى علشان عايزنى؟!الموضوع ضرورى للدرجه دى؟؟
دخلت على بابا لقيته بيقولى :
"هو انتى معاكى حد فى الشغل اسمه........؟"
قولت اوووووووووووووووبا يبقى عملها المجنون واستعديت علشان ادافع عن نفسى
وقولت له ايوه يابابا... بس انا مااعرفش جاب رقم التليفون منين والله؟وكنت ناويه..
ابتسامة بابا خليتنى اقطع كلامى واستغربت وقلت له: هوا ايه اللى حصل يابابا؟؟
فقال لى..........)عايز يخطبك
-.........؟!
ذهلت شويه مش شويه ذهلت اوى بصراحة وفتحت فى نوبة ضحك هستيرى
بابا أكيييييييييييييد بتهزر معايا صح؟؟؟!!
"بهزر؟!!انا اعرف منين اسمه؟ هو فى هزار فى الحاجات دى يابنت؟"
انا فجاة سكتتوقعدت افتكر كل حاجه حصلت بينناواحاول استوعب..لالالا صعب....لالالالا مستحيل ده احنا ناقر ونقير!!!
بابا سابنى ونزل تقريبا افتكر انى مكسوفه بس انا كنت مذهوله....وساعتهابس فهمت سر طلبك الغريب.
يتبع
ــــــــــــــــــــــــــــــــــــــــــــــــــ ــــــــــــــــــــــــــــــــــــــــ

عريس فى اليد ..خير من عريس بعد سنتين

"يابنتى عريس فى اليد خير من عشره على الشجره وياختى دول مش عشره على الشجره....ده واااااااااااااحد وبعد سنتين انتى بتفكرى ازاى؟"
دا كان رأى ماما وتقريبا كل اللى يعرفوا الحكاية..الكل شايف انى المفروض اقبل العريس الجاهز اللى هياخدنى من ايدى على عش الزوجيه فى اقل من شهرين خاصة انى مش بحب العريس رقم(2) اللى هو انت ولا فى بينا قصة حب تخلينى اعمل كده
بس مش عارفه ليه كنت مرتحالك اوى.... يمكن علشان زميلى فى الشغل...يمكن علشان حاسه انننا فاهمين بعض لأننا ياما اتكلمنا واتناقشنا واتخانقنا فى الشغل؟؟
مش عارفه بس كل اللى اعرفه انى حاسة انك انت الاسنان اللى عايزة اكمل معاه حياتى
الاولانى كويس وكل حاجه لكن...مافيش بينا اى حاجه مشتركه دا زائد انه حاسس بنفسه اوى ويمكن دا العيب الوحيد اللى فيه يعنى حاسس ومتاكد انه مايترفضش وبينى وبينك حسيت انى محتاجه السنتين اللى انت محتاجهم عقبال مانتجوز محتاجه اخطط لحياتى بروقان..ومحتاجه اكبر شويه عن كده لانى حاسه انى لسه طفله...
اتسخرت ربنا كتيييييييير اوى وبصراحه كانت هيا دى حجتى اللى بتلكع بيها..لانى عارفه ان الاخ الواثق مستعجل عايز يتم الموضوع قبل مايسافر.
ايوه...الاستاذ مسافر بره...ومنمر على هجرة...وانا مش مرتاحه لكل ده..ورغم انى مش دايبه فى دباديب مصر اوى لكن بردو مااحبش اسيبها...مستقبلى هنا...وحياتى هنا واحلامى هنا.
اتوكلت على الله ورفضته واصريت على الرفض ورفضتك انت كمان وقلت لو ليا فيك نصيب هترجع تانى..وكنت بصراحه بدعى ربنا يكون ليا فيك نصيب.
وفعلا....رجعت بعد شهرين وماتتخيلش فرحتى باصرارك كانت قد ايه وكمان اهلى حسوا قد ايه انت باقى عليا ... ولما صليت استخارة تانى حسيت انى لسه مصره عليك.
واخيرااااااااااااااااااااااااااااا
"شبكنا بدبلته...وقرينا فتحته........وعرفنا نيته وغلاوته عندنا"
لووووووووووووووووووووووووووووولوووووووووووووووى

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــ
دى مش دبلة
زمان...كنت بستغرب اوى لما اشوف واحده مخطوبه او متحوزة وطايقه الدبله ومش بتخلعها من ايديها ابدا وكنت بقول ياربى....ازاى هستحمل دبلهسنه واتنين وعشره ويمكن اكتر فى ايدى؟؟
بس دلوقتى فهمت....من ساعه دبلتك ماحاوطت صوباعى وانا حاسه انى لابسه تاج...حاسه انى بقيت اميرة بجد...لا اميرة مين! ده انا ملكة..كفايه انى انا اللى انت اخترتها كفايه انك قولت لى نفسى اجمع كل بنات الدنيا وامسك ايدك واقول لهم
"هى دى حبيبتى......هى دى مراتى"
من يوم ماحاوط اسمك صوباعى وانا حاسه انى متطمنه وهادية ورايقه......كأن دبلتك تميمه سحرية ضد الحزن وكل شويه ابص لها واسرح فيها.....اشوف فيها كل حاجه حلوة بيننا....اشوف اول يوم شوفنا بعض فيه....اشوف هزارنا وعنادنا ودماغنا الناشفه.... اشوف تلاكيكنا لبعض اللى كنا بنتحجج بيها من غير مانحس علشان نتكلم مع بعض بشوف فيها يوم خطوبتنا ...وبتخيل انها بلورة سحريه....هتورينى اللى هيحصل بكره وفرحتى بيك وسعادتى معاك.
وبعد ماكنت زمان شايفة الدبله "قيد" دلوقتى شايفاها "طوق نجاة" ايوة طبعا طوق نجاة....لأن حياتى مع اى حد غيرك ماكانتش هتبقى حياة.

لها اسمى..خاتم سيضىء
حين يحيط اصبعها
وأن اصغى الى قلبى
اذا صمتت...لأسمعها
لها ان تبدأ الاحلام ..بى
لأتمها معها
للشاعر"احمد بخيت"
ــــــــــــــــــــــــــــــــــــــــــــــــــ ـــــــــــــــــــــــــــــــ

والله بحبك....بس بستهبل

برغم انى وافقت على الخطوبه من غير مايكون فى بينا اى ارتباط الا انى بعد مااتخطبنا اكتشفت ان قلبى كان بيحبك من ورايا..ولما عرفتك اكتر لما عرفت احلامك لما شوفت ازاى بتعبر عن مشاعرك صدقك مع الناس وحتى رخامتك وهزارك....بدأ كل يوم عن يوم حبى ليك يزيد عن اللى قبله...وكل يوم عن يوم احس اننا بنقرب من بعض اكتر.
لكن...كتير بحس انك زعلان منى او على الاقل قلقان وحاسس انى مش بحبك قد مابتحبنى علشان انت دايما بتعبر عن حبك ليا وكتير اوى بتقول لى كلام من روعته مش بقدر أرد...وكتير اوى بيبان عليك انك بتحبنى وانا شايفه خوفك عليا وشايفاك عايز تحمينى من كل حاجه واى حاجه....حتى لو كانت لسعة كبريت ...او وانت قاعد عندنا فى البيت وغصب عنك بتسرح فيا.
والله انت لو تعرف انا بحبك اد ايه هتفرح اوى....انا بحبك وبفهم معنى كل كلمه وكل تصرف بتتصرفه بيبين اد يه انت بتحبنى لكن بستهبل وبعمل عبيطه ولو ركزت شوية فى تصرفاتى هتعرف انى بجد بحبك.
لو شوفت اد ايه بتوحشنى....وقد ايه بتكلم عنك مع اصحابى....ومع اخواتى فى البيت...كل كلمه بتقولها بتدخل قلبى ومش بتطلع...كل حاجه بتقول انك بتحبها من غير مااحس بلاقيها حبيبتى....كل حاجه بتكرهها بلاقى حاجه بتنفرنى منها....اكيد ده مالوش معنى غير انى فعلا بحبك....لكن خايفه افتح قلبى...مش خايفه منك ابدا لأ...لكن خايفة ربنا يكتب علينا الفراق لأى سبب وكل حرف نطقناه يبقى ذكرى-رغم حلاوتها- بتعذبنا.
خايفه فى يوم نندم اننا حبينا أوى كده واننا ماعملناش حساب الفراق...لكن ماتخافش..بكره نتجمع فى بيت واحد وصدقنى...هبطل استهبال
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــ

مصر بتاعتنا

أى مكان مامشتش فيه معاك باعتبره مش موجود على الخريطه...معاك رسمت خريطه جديدة للعالم..خريطه مافيهاش غير مصر...ومش اى مصر كمان.....دى مصر بتاعتنا.
مصر بتاعتنا مافيهاش غير كل شارع توهنا فيه وكل مكان روحنا اشتغلنا فيه وكل شقة روحنا اتفرجنا عليها وكل مطعم اكلنا فيه.
مصر بتاعتنا عاصمتها"هنادى"ومركز الاذاعه والتلفزيون فيها "برج القاهره" اللى قلت فوقه بعلو صوتك انك بتحبنى.
مصر بتاعتنا بحبها أوى...بشوفها بعين تانيه خالص...بشوف البيوت طيبه اوى علشان بتضلل علينا...بشوف الشوارع هاديه جدا مهما كانت زحمة...لانك وانت معايا مش بشوف غيرك فى الدنيا .
مصر بتاعتنا المواصلات فيها عدوتى اللدودة لانها بتسرق الوقت وبتسرق كتير من خطاوينا سوا واحنا كل خطوه لينا مع بعض بفرحه وضحكه وذكرى حلوة...معاك وبس بحس انى من قلبى عايزة اغنى.....حلوة يابلدى

ــــــــــــــــــــــــــــــــــــــــــــــــــ ـــــــــــــــــــــــــــــ
مفتاح بكره

احساسى لما مسكت فى ايدى مفتاح شقتنا مايتوصفش....شقتنا...الى هيا بيتنا....بيتى انا وانت.......اول حاجه تبقى بتاعتنا .....انا وانت.
حسيت كأنى ماسكة مفتاح الجنه.....اى نعم الجنه دى كانت مش كبيرة اوى...وكانت لسه محتاجه توضيب كتير اوى......بس كفاية انها بتاعتنا....كفايه اننا هتعيش هنا...وأحلام عمرى هتكبر وتتحقق هنا ...كفاية انى هتولد من جديد هنا.
ماعرفتش انى هاحبها كده من أول نظره دا حتى المفاتيح كنت بعاملها كأنها جواهر نادرة كنت كتير أوى بحضن المفاتيح وكأنى بحضن أحلامى .....بحضن بكرة
ــــــــــــــــــــــــــــــــــــــــــــــــــ ــــــــــــــــــــــــــــــــــ

عارف يعنى ايه اكون مراتك؟!

بكره كتب كتابنا..... كتاب حياتنا اللى جايه....بكره هتنكتب شهادة ميلادى اللى بجد...من بكره هابقى مراتك....عارف يعنى ايه مراتك؟!
ده مش بس معناه انى هاعيش مع انسان اخترته واختارنى...مع انسان هيستحمل عصبيتى....تعبى...فشلى....مع انسانى هيفرح بكل حاجه حلوة اعملها مهما كانت صغيرة ....انسان احس معاه انى "معايا" مش مع حد تانى ......
لما أكون مراتك ده معناه انى من حقى اناديك فى اخر لحظه من عمرى واطلب منك انك تقعد معايا شوية لأنى خلاص بموت....علشان عايزة اشبع منك......وانت تقولى "لا....ماتقوليش كده"
وتزعل منى....واشوف فى عينيك لحظتها كل حاجه حبيتها فيك.....المح خوفك عليا.....حبك ليا....زعلك منى....وابتسامتك وانت بتحاول تطمنى.
وافضل باصه لك لحد ماروحى تروح لربنا...والمح ملامحى فى ملامحك واتطمن...لانى هاتطمن انى هافضل عايشه فيك وبيك زى ماكنت طول عمرى عايشه بيك وليك.
ياااااااااااااااااه يارب مااتحرم انى اعيش معاك اللحظه دى....يااااااااارب لما اموت اكون مراتك. ويكون اسمى جنب اسمك لحد مانتقابل تانى.........فى الجنه ان شاء الله
ــــــــــــــــــــــــــــــــــــــــــــــــــ ـــــــــــــــــــــــــــ

الفرق بين اول وتانى شخطه

اول مره تشخط فيا رحت اووووووووووى..........لأسباب كتيره اولها انك شخطت فيا واتنرفزت علشان كنت قلقان عليا فحسيت قد ايه انت بتحبنى بجد وتانى سبب علشان حسيت اننا خلاص مابقاش بينا فرق مابقتش تتعامل معايا بأسلوب المخطوبين اللى هو رقه بقى ومش عارف ايه وتالت سبب علشان كان نفسى اشوفك وانت بتشخط علشان مااتخضش منك بعد كده.
لكن تانى مره شخطت فيا .....زعلت اوى وعيطت.....مش زعلت منك.....لأ......انا اصلا مابعرفش ازعل منك لكن.....زعلت من الشخطه حسيت انى مابقتش اميرتك........مافيش حد بيشخط فى اميرته
وكمان زعلت علشان ماكانش ليا ذنب...... انا عارفه ومقدره انك تعبان ومتضايق وعليك ضغوط كتيره لكن.....كان نفسى تبقى زيى لما اتضايق او الدنيا تخنقنى اوى اجرى عليك واعيط لك واقولك شفت حصلى ايه؟؟؟
انا لو زعلانه من الدنيا كلها اول مااسمع صوتك او اشوفك باهدى وبتطمن ومش بقدر اكشر.
بس ياسيدى...ده الفرق بين اول شخطه وتانى واخر شخطه زى ماوعدتنى.....
وانا مصدقاك مش بس علشان بحبك.....لأ علشان انا واثقه انى مش هاهون عليك....وواثقه انى هافضل طول عمرى فى نظرك اميرتك وحبيبتك......لو حتى فات على جوازنا مليووووووووووون سنه

ــــــــــــــــــــــــــــــــــــــــــــــــــ ـــــــــــــــــــــــــــــــــــــــ


فستان الفرح

فستان الفرح.....مش فستان"زفاف"وبس ....لأ....دا فعلا فستان الفرح........فستان الفرح يعنى كل الفرحه متلخصه فى توب ابيض وطرحه..
فستان الفرح يعنى الحاجه اللى بتحلم بيها كل بنت من اول ما تعرف تمسك الورقة والقلم,...... وترسم.....وتعبر بافستان عن احلام كتيييييييييره اوى..حلم انها تكون اميره زى اللى بيحكو عنهم فى الحواديت حلم ان يكون لها زوج وحبيب.....حلم ان يكون ليها اولاد.......حلم بزغاريد وطبول ونور...احلام كتيره اوى بتختصرها البنت فى فستان وطرحه...
النهارده كنت بقيس فستان الفرح....رغم انى شوفته قبل كده لما اخترناه سوا.........لكن النهارده كان احساسى مختلف.كنت حاسه كأنى اول مره بشوفه....وحاسه برهبه وفرحة ومليون احساس مختلف وأنا بقيسه وبدأت احس بجد انى عروسه...والموضوع بجد بقى.
وغصب عنى عينيى دمعت لما عينى جات فى عين ماما أول مالبست الفستان.....عينها كانت بتقولى ياااااه كبرتى يابنتى....وكانت بتقولى الحمد لله شفتك عروسه...كانت بتقولى هتوحشينى وحاجات كتير اوووووووى وانا كمان فجأه حسيت انى كبييييييييره بقى ...انا عروسه!!
كلمة عروسه اللى ياما اتقالت لى من وانا صغيرة مختلفه اوى النهارده..... انا فاضل لى كام يوم وابدأ حياه تانيه مع انسان بحبه بس باردو....هفارق ناس كتيره بحبها......أنا هابقى عروسه بقى واقعد على الكوشه....الكوشه اللى كنت بتكسف اطلع عليها علشان ابارك لعروسه قريبتى او صاحبتى والناس هتقعد تبحلق فيا وتجبنى من ساسى لراسى...وياسلام بقى على البنات اللى كانت حاطه عينها عليك..هتطلع فيا القطط الفاطسه وتقول فى الاخر مالقاش غير دى؟؟حتى لو انا ملكة جمال الكون
احم...بقولك ايه؟هوا احنا لازم نعمل فرح؟؟!!
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــ

رقصة سلو
كل مااسمع اغنيه رقيقة وهاديه اقعد اقول هنرقص على الاغنيه دى سلو فى فرحنا واقعد اتخيلك وانت بالبدله وزى القمر....مكسوف وفرحان وقلقان واتخيلينى وانا فى فستان الفرح...اميرة بجد..لانى بقيت ملكك...وأنا قلبى هيقف من الفرحة ومش مصدقة انى بعد شويه هبقى معاك طول سنينى...وكل لحظه فى عمرى...وأقعد أفكر...هوا أنا ياترى هبقى سامعه حاجه؟!!
مأظنش ...هابقى فى دنيا تانية...هابقى بس سامعه صوتك بيتردد فى ودنى وانت بتقول:"وأنا قبلت زواجها على سنة الله ورسوله وأشهد أن أراعى فيها حدود الله............." وهبقى بس سامعه صوتك يوم ماجيت تتقدملى..وانت بتكلم بابا وانت بتقوله"ياعمى" لأول مره صوت اول زغروطة رنت فى ودنى....صوت بابا وهو بيسألنى موافقه ولا لأ وانا قلبى جوايا بيقول....."هى محتاجه سؤال؟ هو انا عمرى اتمنيت غيره فى الدنيا ؟؟!!"
ولما المأذون سألنى موافقه ولا لأ.........وكان على طرف لسانى اقول له"وأنا ازاى اصلا اوافق اعيش من غيره؟؟"
تفتكر وانا سامعه كل ده فى ودنى وحاسة بكل الفرحه دى هتفرق معايا الاغنيه

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــ


بكره فرحى ياجدعاااااااااااان

ياترى عمر فكرت فى احساس الجنين ليلة ميلاده؟؟
متهيألى أنا دلوقتى عارفة احساسه....هوا بيكون مرتاح جوا بطن مامته....ومطمن....بس مشتاق يتولد..... مشتاق للنور....للحياه.....الحياه المختلفه عن حياته جوا.....مشتاق يبدأ حياة حقيقيه.....بكل فرحتها ولذتها وشقاها وتعبها ومشاكلها.
أنا دلوقتى كده ....حاسة انى هتولد بكره..........وهبدأ حياة جديده ومختلفة حياة اخترت فيها حاجات كتير اوى وبحب فيها حاجات كتير أوى.
وخايفة فيها من حاجات كتير أوى....خايفة من المسئوليه وخايفة لأنى بردو مهما عرفتك حاسه انى لسه مااعرفكش او لسه مااتعودتش عليك أوى لدرجة اننا نعيش اربعه وعشرينن ساعه مع بعض.
وقلقانه مش عارفه الفرح هيكون ازاى؟؟ ياترى هتحصل مشكله تبوظ عليا اليوم اللى مستنياه طول عمرى؟؟ولاهيعدى على خير؟؟
ومش عارفه ازاى بجد بعد ماالفرح مايخلص مش هاروح مع بابا وماما واخواتى!!!
وفى نفس الوقت فرحاااااااااااااانه اوى اننا اخيرا هيكون بيتنا واحد ولما نكون بره البيت مع بعض ونقول هنروح يبقى ده معناه اننا بردو هنفضل مع بعض....مش كل واحد هيروح فى طريق.
ياربى....انا مش عارفه انام ولاعارفه اصحى.....ومش عارفه افرح ولا اعيط...........عايزة افرح .........ومحتاجة اعيط!!
عارف احساسى بالظبط يتوصف ازاى؟؟عارف اغنيه اغدا القاك؟؟
هى دى ادق وصف لحالتى:
"أغدا ألقاك ....ياخوف فؤادى من غدى......يالـــــــــ شوقى واحتراقى........فى انتظار الموعد"
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــ

النهارده..انا عروسه

صحيت من النوم باحساس العروسهحاسه انى مختلفه رغم انى مش متغيره حاسه انى مختلفه رغم انى مش متغيره حاسه انى فرحانه وقلقانه....ومكسوفه أوى من كتر ماالناس عماله تقولى ياعروسة وايه الحلاوة دى....رغم انى ماكنتش لسه احلويت ولا روحت الكوافير وكده!
حاولت افطر وماعرفتش.....أنا اساسا لما بفرح مابعرفش اكل وأنا عمرى مافرحت قد النهارده...ولما باكون قلقانه مابعرفش اكل...وانا عمرى ماكنت قلقانه قد النهارده..
وكمان لما بزعل مابعرفش اكل.....وأنا زعلانه الى حد ما النهارده...مش عارفه ازاى هاعيش فى بيت ماما مش عايشه فيه ...وانا اللى كنت لما ماما تسافر مابعرفش اكل ولا اشرب ولا انام ولا اعمل اى حاجه.كمان مش متخيله انى بكره لما اصحى من النوم مش هلاقى نفسى فى اوضتى...وانى اصلا المفروض ابطل اعتبرها اوضتى.
ولما جينا ماشيين انا واصحابى علشان اروح الكوافير...حاولت على قد مااقدر ماابصش فى عين ماما علشان مااعيطش...بس بمجرد ماخدتنى فى حضنها ماقدرتش...عيطنا أوى وماكنتش عايزه اسيب حضنها لحد ما ماما ضحكت بالعافيه وقالتلى:"يخرب عقلك الناس هتفتكرنا غاصبينك على الجوازة هههههههههههه"...ضحكت وسيبتها ورايحه اسلم على بابا عمل نفسه مشغول وانه بينده للسواق علشان يقرب العربيه قدام الباب وحاول على قد مايقدر مايبصليش علشان خايف دموعه تغلبه....
هيوحشونى أوى...هيوحشنى احساس انى بينتهم وانى اخر العنقود...رغم انى هافضل بنتهم ورغم انى هاشوفهم تانى كمان شويه فى الفرح وبعد الفرح وبعد كده كمان هاشوفهم وازورهم دايما...بس هابقى بزورهم...مش عايشه معاهم....هبقى كبرت خلاص..
اصحابى طول المشوار قعدوا يتريقوا عليا ويضحكونى....قعدوا يرغو يرغو يرغو.... مابيسكتوش لحظه مش مدينى فرصه اتكلم خالص...علشان عارفين انهم لو سكتو انا هسرح فى ماما وبابا وهاعيط وعارفين انهم لو سابونى اتكلم هاعيطهم هم نفسهم|.
وصلنا الكوافير والست الكوافيره قعدت تحطلى ماسكات غريبه على وشى وانا اضحـــــــك...كل مااتخيل شكلك لو شوفتنى بالمنظر ده هتقول ايه....من كتر ما ببتسم وبضحك الست قلقت منى....فخفت تفتكرنى مجنونه وتبطل تعملى حاجه فقلت لاصحابى علشان تسمعنى اللى انا بفكر فيه..... كلهم فطسوا من الضحك وقعدت كل واحده تتوقع تعليقك...وفى الاخر صورونى والاندال هددونى انهم يبعتولك الصوره دى على الكوشه..
بعد اما شيلت الحاجات الغريبه دى من على وشى ولبست فستان الفرح....ساعتها بجد رجعلى الاحساس المرعب بانى عروسه!
يالهوى...انا هالبس الفستان ده!....وهاقف بيه قدام الناس!!
وكلهم هيقعدوا يقولولى ايه الحلاوة دى؟_حتى لو انا مش حلوه هيقولوا بردو_ياخراشى...انا بنكسف يانااااااااااااس.
بدأت بقى تحطلى الميك اب وتحاول تلعب فى دماغى انها تحطه اتقل من كده شويه بس مييييين انا دماغى صعيديه اخر مازهقت قلتلها:" بصى من الاخر انا عايزة ميك اب لما اشيله مايتخض ويقول ماليش دعوه رجعوها انا عايز اللى كانت فى الفرح"
الست ضحكت وهيا بتحطلى حاجه مااعرفهاش فى عينى وعينى كانت هتروح وفى الاخر اقتنعت.........يااما بوجهة نظرى....يااما بانى مجنونة ولازم تاخدنى على قد عقلى
غمضت عينى علشان تكمل اللى هيا بتعمله.....سرحت....مافوقتش غير على صوت اصحابى وهما بيقولوا:"ماشاء الله ايه الجمال ده يااروبه؟!" فبصيت فى المرايه لقيتها خلصت...اول ماشوفت قلت ايه ده؟؟مين دى؟ايه الخدع السينمائيه دى؟
وقعدت اتخيل نظراتك اول ماعينك تقع عليا......وياترى ايه اول حاجه هتقولهالى...وكالعاده...كل ماافكر فيك بالاقيك...لقيتك بتتصل بيا بتقولى اكم وصلتوا.......خلاص ينفع تدخلوا ولا لسه؟
ورغم انى مخلصه...وهاموت واشوف نظراتك ورد فعلك......قولتلك:"لأ لسه شويه" اصحابى استغربواافتكروا ان فى حاجه فى الفستان او الميكب.... والكوافيره اتخضت بس لما قلتلهم انكل العرايس بتتاخر اشمعنى انا؟؟!1
كانوا هيضربونى لولا انى عروسه هههههههههههههه
بس الحقيقه انى ماكنتش مستعده نفسيا لاى حاجه فى اى حاجه...اعصابى بايظه جدا...ومكسوفه جدا وحاسه ان الموضوع هيدخل فىالجد بقى لما اخرج من هنا.
قعدت حوالى ساعه.الكوافيره تقولى يابنتى ماينفعش المكان هنا مش مكيف الميك اب كله هيسيح.......
وانا ماااافيش...واصحابى يقنعونى اخرج.....وانت وبابا واخويا عمالين تتصلوا بيا......وانا مش قادره كل مااشوف استعجالكم اتوتر زياده!
فى الاخر واحده من اصحابى استندلت وطلبت ماما من وراياوقالت لها اننا مخلصين..........كنت عايزه اقتلها .......لولا انى عروسه بردو...........
ماما مارضيتش تدخل علشان ماتعيطش تانى....وبابا واخويا دخلوا بقى ياخدونى ليكانت اول مالمحتنى من بعيد شويه عينك لمعت ودمعت..
لما قربت بقى ماشوفتش لانى من تعبيرات وشك لانى من كسوفى ماقدرتش ابص فى وشك....مسكت ايدى وقولت لى براحه..."اكتر حاجه بموت فيها فيكى من زمان هيا كسوفك"
انا:.......................
"عارفه انا طول عمرى شايفك حلوة.....بس النهارده انتى احلى........مش علشان الفستان اللى هياكل منك حته ولا علشان الميك اب اللى مبين جمالك اوى...انا شايفك حلوة اوى النهارده..علشان انتى النهارده حلالى."
لحد كده بقى وكفايه ماقدرتش....قوتلك خلاص هيغمى علياوالنبى اسكت بقى
قعدت تضحك عليا بردو لحد ماوصلنا للعربيه..رغم ان المسافه بين قاعة الفرح والكوافيره كبيره نوعا ماالا انى حسيت ان الوقت عدى بسرعه....بسرعه دخلنا القاعه.بسرعه اتزفينا.........بسرعه قعدنا فى الكوشه..وبسرعه بردو قمنا رقصنا سلو....وبسرعه قعدنا وناس جات تهنى وناس كانت بتغنى وبترقص و.............حاجات كتيير اوىحصلت وانا مش فاكره اى حاجه.....كل اللى فاكراه انى كنت مش مصدقه وانى قلتلك:"هوا ده فرحنا بجد؟!ولا انا بحلم!"فضحكت
وشويه تانى قلت لك هو انت مصدق؟فضحكت بردو..وبس مش فاكره اى حاجه حصلت بعد كده
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـ


يتبع.......

حرم الاستاذ(................)

زمان ماكانش فى أحب على من ان حد يعرفنى (أنا)..وان حد يقدمنى ك(أنا)مش بتهمنى القاب ولا حاجه لكن بتهمنى كينونتى
لكن النهارده لما زميل ليك كان بيقدمنى لمراته ويقولها:"حرم الاستاذ............"
ياااااااااه انا ماحسيتش بحاجه ببعدها..انا توهت فى الكلمه....انا حرمك ....انا فى حمايتك!!انا منك..
حسيت انى فخووووووووووره اوى بيك رغم انك يعنى مش اشهر من توم كروز ولا اغنى من بيل جايتس لكن فخورة جدا بيك"انت"....انت اللى اعرفه اكتر من اى حد فى الدنيا...انت اللى عارفه قد ايه طيب...وقد ايه نفسك تعمل حاجات كويسه اوى فى الدنيا..وقد ايه قلبك مش بيقدر يشيل حقد ولا كراهيه...قد ايه صريح ومش بتحب تكون منافق ولا مخادع انت اللى حبيته وبجد جدير بالحب وجدير بانى افتخر بانى انتمى اليك.
ربنا مايحرمنى من وجودك فى حياتى ....ولا يحرمنى منكاكيد مش هتلاقى حديحس بكل الامان ده جنبك غيرى...ده طبعا غير ان مافيش حد بتواضعى
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــ




لما لقيتك

لما لقيتك عرفت يعنى ايه"وحشتنى"ويعنى ايه "محتاجه اشوفك"ويعنى ايه"ب ح ب ك" يعنى ايه اتولد فى كل مره ابص فيها فى عينيك عرفت ازاى ممكن اكون مستعدة ادفع لك عمرى بجد.
عرفت ان الحب الحاجه الوحيده اللى ممكن تخلينى ادعى ربنا ياخد من عمرى ويديلك وادعى ربنا يخف عنك ويبتلينى...ولو لازم حد فينا يتألم ِيبقى انا وهبقى مبسوطه
عرفت ازاى لما افرح يبقى انت اول حد يخطر فى بالى ولما الدنيا تضيق عليا تبقى انت البراح فهمت ازاى الحب بيخلى العشاق مجانين واطفال وكمان بيخليهم زى الانبياء....قلبهم ابيسض وجواهم غفران وتسامح للكون كله.
عرفت طعم ومعنى الدنيا والفرحه والضحكه والشوق والوحشه والوجع.......عرفت معنى الخوف والامان والحب اللى بجد..............كل ده حصلى لما لقيتك.........لأنى عمرى ماحبيت بجد الا لما لقيتك.
ربنا مايحرمنى منك

ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــ
لذة طاعتك
تعرف انى قبل مااعرفك كان عندى الموت اهون من انى اقول كلمه حاضر؟اه والله وكنت بقعد الف وادور حوالين اى امر اى حد امرنى بيه علشان احسس نفسى انى بعمله من دماغى مش بسمع كلامه.
لكن معاك بقيت بستمتع بجد بانى اسمع كلامك....عارف لما تبقى حاسس بلذة وانت بتسجد لربنا وبتطيعه؟؟
انا بحس كده......بفرح اوى لما احسك راضى عن حاجه عملتها او فرحان بيها......بفرح اوى لما تطلب منى اى حاجه......لو حتى كوباية ميه....بفرح اوى لما تطلب منى اساعدك فى شغلك او اعمل حاجه فيه بدالك.
وياسلاااااااااام بقى لما اقترح عليك اقتراح وتعمل بيه.......... حتى لو كان حاجه صغيرة...يااااااااااااه ببقى هاطير فى السما من الفرحه........
طب انت فاكر لما اقترحت عليك لون معين لبدله والجرافته يوم فرح محمد اخوك واشتريتهم فعلا؟
يااااااااااااه كنت مظأطاطه اووووووووى....وكنت حاسه قد ايه انت واثق فى ذوقى وقد ايه حابب تسعدنى وانى اشوفك زى مابحب
بحبك أوى...وبحب نفسى كل مااحس انك راضى عنى.......يااااااارب اموت وانت راضى عنى يارب

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـ


كنت صغيره .......وكبرت

كنت صغيره...قبل مااحبك.........كنت صغيره فعلا............عقلى صغير..قلبى صغير مابعرفش اسامح مابعرفش اعذر حد........مابعرفش احب حد بجد.
لحد ماعرفتك.....وكبرت بيك اوى......مش بس بأخلاقك الحلوة...كبرت بثقتك فيا.....بانك بتقولى ...لأ..ساره حببيبتى ماتعملش كده دا مش من أخلاق الاميرات ياسمو الاميرة.
بيك اتعلمت اسامح وبيك اتعلمت اغفر لأى حد أى حاجهبمجرد مااشوفك وبيك اتعلمت اكون اكبر واقوى من الهم والحزن.
حتى فى شغلى بردو كبرت...كبرت بتشجيعك ليا كبرت وانت ماسك بايدى وبتاخد بايدى من خطوة لخطوة تانيه قدام...وانت بتقولى انا معاكى وماتخافيش وماتتردديش...ومايهمكيش من اى حاجه.
كنت صغيره فعلا...ودلوقتى كبرت...وبكبر وهاكبر...طول ماانا معاك.

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـ

عندي ثقة فيك
عارفه انك مخنوق من غيرتى وبتتضايق منها وكذا مرة لمحت لى انى المفروض اثق فيك. وانا والله بثق فيك...لو مش بثق فيك مش هاحط عمرى بين ايديك لكن...بصراحه ماعرفش ليه عفريت بيركبنى لو شوفت ست او بنت بتكلمك ...مهما كانت قد ولادك ولا قد مامتك ولاحتى من سننا...بحس انى من كتر حبى فيك عايزة اخبيك عن كل العالم.
علشان عارفه قد ايه انت انسان روعه وممكن اوى اى حد يحبك...وانا واثقه فيك لكن ماحبش حد يحبك ولا يبقى مجنون بيك غيرى.
واثقه فيك بس مش بحب حد غيرى يكون حلو فى عينيك ولو للحظه واثقه فيك ولكن احب انى اكون اقرب واحده لقلبك كزوجه وحبيبه وصديقه.
انا اصلا بغير عليك حتى من اصحابك الشباب لو حسيتهم هيقربوا ليك اكتر منى و والله بحاول اكتم وماابينش وبحاول مااخنقكش والله بدارى فى قلبى غيرة اضعااااااااااااااااااااف اللى ببينها ليك بس مابقدرش....غصب عنى بغير عليك.

ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــ


شوف حل بقى كده مش نافع

بجد كده مش نافع...وصلت فى حبك لدرجة انى مش شايفه فى الدنيا غيرك كل الدنيا عندى انت...كل حاجه حلوه اشوفها عايزاها تبقى بس ليك.
كل زمايلى فى الشغل بتلغبط واناديهم باسمك وطول مانا قاعده لوحدى ....بحس انك معايا وبنسى وبكلمك وبعدين افتكر انك لسه ماجيتش ...او انى فى الشغل وانك مش معايا.
ومابقيتش اعرف اكل الامعاك ..ولا اتفرج على التلفزيون الا معاك مابستمتعش بالشاى بتاعى الا على ريحة قهوتك وبقيت بغير عليك لدرجة مرضية..انت عارف؟
اسمك على موبايلى بفضل اغير فيه لحد مايبقى بعيد عن اى اسم بنت!!بغير من كل حاجه تشوفها وتعجبك ومااكونش انا اللى عملتها.
يالهوى انا شكلى بقيت مجنونه بيك...لأ ده أنا مش شكلى اتجننت.....دا اكيييييييييييييييييييييد.

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــ


هتطلقنى؟؟

من كام يوم وانا كل شويه تتحكى قدامى حكاية واحده جوزها طلقها من كتر الغيرة وشوفت فيلم عربى بتاع نجلاء فتحى وحسن يوسف النهارده لما كانت نجلاء فتحى مبهدلاااااااااااااااااااااااه بالغيرة.
وكملت بمكالمة فى برنامج اسامة منير واحده اتطلقت بعد جوازها ب6 شهور بسبب الغيرة.
فحاسة انها رسايلةربنا بيبعتهالى علشان الم نفسى شويه وابطل اغير عليك بالشكل المرضى دا..والله بحااااااااااااااااول ..بحاول استعبط على نفسى واقنع نفسى ان الستات مش هتاكلك يعنى بس مش قادره.
بس سيبك من ده كله...هو انت بجد ممكن تطلقنى ؟؟ايا كان السبب ممكن بعد ماروحنا طلعت علشان نتجوز ونعمل البيت ده نتطلق؟؟ ببساطه كدا!!
المصيبه انى قريت فى كتاب ان الطلاق بالنسبه للاتنين المتجوزين عن حب عبارة عن شكلل جديد من اشكال الحب وممكن يحصل....انا مش متخيلة ان مهما حصل ممكن تفرط فيا ...مش متخيله انك بكل بساطه تقولى انتى طالق وكأنك بتقولى ببساطه انا مش عايزك ولا عايز بيتنا ولا عايز اكمل عمر معاكى
وكمان مش عايز تبقى ليا فى الجنه وبكل بساطه متصور انك تكونى مرات حد غيرى وتعيشى معاه الاحلام اللى حلمناها سوا....بأحفادنا وببيتنا لما نعجز والحب اللى العالم كله هيحلف بيه...بجد مش متصوره ان دا ممكن يحصل.
وعلشان كده كنت هاصحيك من النوم واقولك انت ممكن تطلقنى...
بس افتكرت..انت مسافر فى شغل ومش جنبى فمسكت التليفون ولسه هاطلبك بعدين افتكرت ان الساعه دلوقتى 3 الفجر وافتكرت ان ده اللى بالظبط حصل للى اتطلقت بعد جوازها ب6 شهور
فلميت نفسى بصراحه

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــ


يتبع.......

مافيش وكيل نيابه

شكيت فيك لما لقيتك معتز اوى بالقلم دا...وكذا مرة اسألك اشمعنى يعنى؟؟!!فأنت تبتسم وتقول"مالكيش دعوة"طبعا انت عارفنى موسوسة وبشك من أى حاجه قعدت بقى اضرب اخماس فى اسداس وشكيت فى كل الاحتمالات الممكنه:
"اكيد حبيبته الاولانيه ولا حاجه هى اللى اديته القلم دا"
"ولايمكن واحده معجب بيها مسكته فهو معتز بيها"
بصراحه بقى...انت غلطان علشان انت اللى ماريحتنيش وانت اللى اضطرتنى اعمل كده...اخدت القلم من على مكتبك وخبيته علشان تسال عليه ولما تسال عليه وانت متنرفز طبعا اقولك انت متنرفز ليه؟
وانا لازم اعرف حكاية القلم دا ايه؟
وقد كاااااان ...وانت اتجننت لما مالقيتش القلم وانا زيدت الطينه بله وقلتلك يمكن رميته وانا بروق المكتب زعقت لى للمره التالته فى حياتنا رغم انك وعدتنى قبل كده عمرك ماتزعق لى بس بصراحه كان معاك حق ..انا مستفزة انا عارفة لما لقيتك اتعصبت اكتر ماانا اتوقعت اتجننت اكتر... انت ليه يعنى فارق معاك القلم دا أوى؟؟وقلت لك كل اللى شاكه فيه.
انت كشرت تكشيرتك اللى بتقطع قلبى دى وقلت لى:
"دا القلم اللى مضيت بيه فى كتب كتابنا ياساره ولو كنتى فتحتيه كنتى هتلاقى فيه ورقه بتاريخ كتب كتابنا....حرام عليكى انتى عمرك ماهتثقى فيا بقى؟؟!"
انا سمعت كده واتفتحت فى العياط...صعب عليا انى ظلمتك وصعب عليا انى عملت مشكله على حاجه هايفه وصعب عليا انك حاسس انى مش واثقه فيك وفتحت القلم لقيت الورقه ومكتوب فيها...
24يونيه 2008..نفس اليوم اللى شوفتها فيه ...نفس اليوم اللى حققت فيه احلىاحلامى الف حمد وشكر ليك يارب"
لما قريت الورقه انهرت زيادة..ومابقتش عارفه اعمل ايه...بس افتكرت كلامك قبل كده ليا ونزلت اشتريت كيس شيبسى...وحطست القلم فى علية وغلفته..وطلعت اعتذرتلك وقولتلك ممكن اقبل منى الهديه دى....فتحتها وضحكت وقولتلى اه يامجنوووووووووووونه بعدين قدمتلك الشيبسى وقولت لك صافى يالبن؟؟
ابتسمت لى وقلت صافى يالبن...لكن بالرغم من كده احنا لسه علاقتنا متوترة اوى...انت اعصابك مشدودة اوى وكل سؤال بسأله بتاخده بحساسية وبتفتكر ان سببه انى شاكه فيك..وانا عارفه انى فعلا زهقتك وعارفه انى بقيت عامله زى الشاويش أو وكيل النيابه..اسئلتى زى التحقيق وشكوكى مابتنتهيش .
عارفة ان ده عيب كبير فيا...بس والله أنا خلاص بحاول أعود نفسى انى مااشكش فيك وقررت أكون واثقه فيك وفى نفسى اكتر من كده...ونفسى بجد نرجع اصحاب من تانى...عايزة أفتح معاك صفحه جديده وبوعدك ان مافيش وكيل نيابه من النهاردة.
من النهارده مش هحاول اعرف منك غير اللى انت عايز تقوله وبس وهحاول قدر الامكان انى التمس مليون عذر ليك لو عملت اى حاجه غامضة او مش مفهومه وهستنى منك التفسير والتوضيح.
وانا فعلا واثقه فيك وواثقه انك هتساعدنى اتغلب على غيرتى وواثقه انى عمرى ماهندم يوم انى وثقت فيك


"احسست انى فوق ان اشك...وأنت...أنت فوق كل شك"
أمل دنقل

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــ


وايه يعني لما نتخانق ؟

قعدت فى يوم احاول افتكر مشاكلنا وخناقاتنا علشان اقنع نفسى انى مش بحلم....وانى عايشه حياه طبيعيه
بس فشلت..رغم ان فى مشاكل مش مافيش ورغم اننا كتير بنتخانق على حاجات عبيطه وساعات على حاجات مستاهله.
بس ولاكأننا اتخانقنا لاننا بنصفى قلوبنا اوى بعد كل خناقه وفعلا بمجرد مانقول لبعض صافى يالبن؟بتكون قلوبنا فعلا زى الحليب من ناحية بعض واللى عارف انه غلطان...بيصالح التانى بطريقته
لو انا اللى غلطانه..بنزل اجيبلك كيس شيبسى وافكرك بوعدك ليا زمان...انك قلبك ابيض ولو جبتلك كيس شيبسى هتصالحنى.
ولما احتاس خالص ونكون بالليل ومش هينفع انزل اروح اجيب صوره كيس شيبسى وابعتهالك ع الموبايل
ولو انت اللى غلطان....بتجيب لى مصاصايه..وتفكرنى بانى وعدتك ماباتش ليلة زعلانه منك وانك بتحبنى حتى وانا مكشرة ولو حتى كنا الساعه 3الفجر بتنزل وتجيبها حتى لو من اخر الدنيا.
ولما تزعلنى من غير ماتاخد بالك واكون محتاجه انى احسسك والفت نظرك بجيب لك انا المصاصه واقولك:
"دى المصاصه اللى المفروض انك تصالحنى بيها علشان عملت كذا وكذا"
ونكلم ونتناقش ونتراضى ونرجع زى الاول واحسن.
دا سرنا الصغير اللى الناس-حتى اقربهم لينا- مايعرفهوش علشان ماحدش هيفهمنا...الكل هيعتبر دى"معيله" واننا قدام المشاكل الحقيقيه مش هنقدر نعمل كده بس انا مايهمنيش حد...مايهمنيش ده صح ولا غلط...المهم اننا بنقدر نتصافى ونتصالح وعمرنا مانمنا ليله زعلانين من بعض مش مهم ازاى...المهم اننا بنوصل لكده.

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــ

تعرف انى عامله لك عمل؟؟

تعرف انى عامله لك عمل؟؟ أيوه طبعا اومال يعنى هتحبنى الحب ده كله بالساهل!!
أنا أول كل شهر باخد مبلغ معين كده أوديه للشيخ بتاع الجامع اللى ورانا ...علشان يطلعه صدقة بنية دوام سعادتنا
وباخد أى حاجه فيها عرقك((قطرك يعنى))....واغسلهالك واكوسها وارجعهالك معطرة
ولما بعمل الاكل بقعد اقرالك عليه شوية كلام ايووه بقعد اقول يااااااااااااارب يطلع حلو علشان هو تعبان طول النهار فى شغله وجعان ونفسى أوى أسعده
وبحطلك فى هدومك حجاب..مش حجاب واحد لأكتيييييير...علشان كل لما تيجى تطلع حاجه من جيبك تلاقى ورقه بقولك فيها"بحبك" او "وحشتنى" او"خلى بالك منك...أنا ماليش غيرك"
وكل يوم قبل ماتخرج بقعد اقرأ أدعيه فى سرى واستودعك وأدعى ربنا يحرسك ويحميك
بذمتك مش عمل جامد ومايخرش المايه واحسن من بتاع ام حزمبل وأشتاتا أشتوت؟؟
أحلى حاجه فى العمل ده ...انك كل ماتصلى وتتوضا ونقرا قرأن سوا العمل مفعوله يزيد مش يبطل..
سلطة خضرا

بمووووووووت فى عمايل السلطه زى ماانت بتموت فى اكلها وبحب اعملها فى بيتنا وبس......وبحب اعملها وانت معايا وبس لما اعملها من غيرك مابيبقاش ليها طعم .......بتبقى مجرد سلطه.
لكن وياك بتبقى سلطه وفرحه وهزار وضحك وشقاوة وطفولة ودلع وكل حاجه حلوة فيك وفيا.
بحبك أوى لما تيجى تعمل تسلل وتخطف منى خيارة ولا ورقة خس ولا لما اقرر اكافأك وأكلك أنا بايدى حته جزرة ولا أوطه وبحبك وأنت بتتريأ عليا وأنا بعيط من البصل وعلشان كده لزقت على حيطان المطبخ كل الصور اللى صورتهانى وانا بعيط من البصل ومعاهم صورك لما تعطفت عليا سموك وقررت تعمله بدالى.
بحب كمان اخطف منك اللى خطفته من طبق السلطه ونلف ورا بعض الشقة كلها زى العيال ولا شكلك وانت هتموووووووووووووت مستعجل ع الاكل وانا بتدلع وانا بعمل السلطه علشان عايزة رشوة
او علشان بعاقبك
وبحبك اووووووووووى وانت بتصالحنى لو زعلانه تقولى
"ماتيجى نعمل سلطة"

------------------------------------------------------------------

ممكن تحكى لى حدوته؟؟
بموت فيك وانت بتحكيلى حدوته... من اول نظره عينك اللى بتقول"مجنونه بس بحبك" لحد طريقتك وانت بتقولى توته توته
بحب اوى الحواديت العجيبه اللى بتقععد تألفها وبحب اتلامض معاك وانت بتحكيها لحد مااحس انك خلاص هتزهق بقى فأسكت كأنى تلميذه فى ابتدائى قاعده قدام استاذها فاصعب عليك فتهزر وتخلينى اكمل لماضة
بحب اوى اسمع منك حواديت علشان بحب احس انى بنتك واحس انى عمرى ماعشت قبلك وان كل عمرى من اول مااتولدت كان معاك وكمان علشان بحب اسمعك ومااتكلمش واراقبك وانت بتتكلم ....واخزن فى دماغى مليووووووووون البوم صور ليك وكمان بحب اوى اشوفك وانت محتاس ومش عارف تفكر فى نهايه للحدوته......ونقعد نفبركها سوا.
وبس ياسيدى.......ممكن بقى تحكى لى حدوتة؟؟؟

---------------------------------------------------------------------

الباشا تلميذ

فرحت اووووووووووووى لما جيت تاخد رايى فى انك عايز تقدم فى كلية الاعلام فى الجامعه المفتوحه فرحت لاسباب كتيرة....اولها انك هتحقق حلمك اللى من زمااااااااااان كان نفسك تحققه بس الظروف خليتك تروح فى اتجاه تانى وفرحت لانى حسيت الحاجات المشتركه بينا بتزيد......وفرحت كمان علشان دا هيخلينى اعيش معاك احساس من زمان نفسى اعيشه.
هحس انى مامتك كده وبخلى بالك من مذاكرتك وادخل عليك وانت سهران تذاكر ياعينى بساندويتشين ونسكافيه ولا قهوة او شاى ...وأقعد ادعيلك....
وكمان لأنى درست الحاجات دى قبلك فممكن اوى اساعدك فى مذاكرتك ...يعنى هحس بجد كأن ماجد ابننا جه للدنيا ونط فى العمر وبقى فى الجامعه.
واخر سبب بقى سبب_اعترف واقر_انه سبب شرير:
بصراحه هبقى فرحانه فيك وانا فاضيه ومش ورايا مذاكره وانت بقى ياعيييييييييييينى عندك امتحانات وارخم عليك بقى واقولك التلفزيون ممنوع لحد ماتخلص مذاكرة ومافيش خروج من البيت الا لما تخلص المذاكره اللى وراك وكده يعنى:

---------------------------------------------------------------------------------


زينه رمضان

عاف كان بقالى كام سنه ماعملتش زينه رمضان ؟؟ من ايام لما كنت فى رابعه ابتدائى......كانت اخر مره اعمل فيها زينة رمضان كنت نسيت اساسا ازاى حاجه زى كده بتتعمل كنت نسيت الجو دا بتاع النشا اللى نعملها صمغ وكتب المدرسة والحاجات دى,.....
بس ماتتخيلش قد ايه كنت مظأططه وفرحاااااااااااااانه لما لقيتك جاى من بره وجايب معاك حاجات الزينه وجايب 3 فوانيس
"فانوس ليك وفانوس ليا وفانوس لابننا او بنتنا اللى لسه ماجاش"....... حسيت كأنى رجعت طفلة.....وعشت بحد فرحة رمضان كان شكلنا يموت من الضحك واحنا مدفوسين وسط اكوام ورق الزينه المتقطع واحنا بنحاول نفتكر بنعملها ازاى واحنا صغيرين....واول فانوس ورق عملتهولى وكتبنا عليه اسمنا........ياااااااااه كان شكله رووووووووووعة....زعلت اوى لما الهوا طيره من البلكونه لانى كان نفسى احتفظ بيه اوووووووووى بعد ماخلصنا مشروع الزينه اللى نجح بالعافيه حبيت اعيش معاك طفولتى بجد ...
وروحت جبت نشا وعملتها صمغ وجبت مجلات وعملنا فرع زينه صغنن شبه اللى كنا بنعمله واحنا صغيرين وعلقنا الزينه زى الاطفال فى البلكونه...فاكر لما الجيران كانوا بيبصوا لما سزرا كده؟وانى يومبدأوا شقه ورا التانيه يعلقوا الزينه.


ماطلبت من الله فى ليله القدر سوى ان تكون قدرى وسترى سقفى وجدران عمرى وحلالى ساعه الحشر

احلام مستغانمى

-------------------------------------------------------------------------------------------

العيد ماجاش

العيد السنه دى ماجاش ...ايوه طبعا ماجاش لانه مامشيش اصلا من شيوم مابقينا سوا....كل يوم معاك عيد بالنسبه لى كفايه ان اول واحد بشوفه كل يوم الصبح هوا انت .....واخر حد بشوفه وبسمعه بالليل هوا انت دا لوحده عيد.
دا غير انى كل يوم باكل معاك وبدردش معاك وبنهزر سوا....وحتى لما بنتخانق او لما نرخم على بعض بردو بيبقى عيد.
بس تصدق العيد بردو ليه طعم مختلف....الفرحه معاك طعمها مختلف....اول مره اتمنى انى اقضى العيد كله فى البيت ولما اخرج من البيت ابقى عايزة ارجع بسررررعه اوى علشان وحشنى البيت.....وحشنى اكون معاك ونهزر مع بعض على راحتنا وحشنى نلعب زى الاطفال نخطف من بعض السودانى واللب والترمس نقعد نلعب سوا بلاى استيشن واللى يتغلب يعمل للتانى شاى
نقعد فى البلكونه نتفرج على الشوارع وهى مليانه فرحه ونور ونقعد نعاكس فى ولاد الجيران الصغيرين من البلكونه ونبص لبعض ونقول فى سرنا امتى بقى يبقى عندنا ولاد؟
يااااااااااااااااااااااااااااااااه تصدق العيد حلو اوى
كل سنه وانت زوجى.....كل سنه وانت حبيبى.......كل سنه وانت عيدى

-------------------------------------------------------------------


بحب الدنيا لما تضيق

بحب اوى الدنيا لما تضيق علينا ...لانها كل مابتضيق كل مانقرب لبعض اكتر وبنطمن لما تحصل مشكله فى شغلى او شغلك او اى مشكله تحصل لنا...وبحمد ربنا ان نصيبنا من المشاكل بيكون حووالينا مش بينا.
وبحب اوى احس انى اول حد بيخطر فى بالك لما تتضايق والدنيا تتعكر وبنتهزها فرصه علشان اقولك قد ايه انت انسان عظيم وانك قد اى مشكله وقدود ...وبفرجح زى الطفله لما احس انك فكيت شويه وانك اتفائلت وحسيت بالامل والثققه فى نفسك.
بحب كمان اننا نقعد سوا نفكر فى حل لاى مشكله ونجيبها يمين ونجيبها شمال .....لحد مانلاقيلها حل وساعتها بقى ....نكافىء نفسنا بخروجه حلوه على الكورنيش قرب الفجر.
وبفرح بيك اوى...كل ماتحصل مشكله وتقولى الحمد لله...اشكرى ربنا وصلى ركعتين.... مش المشكله دى احسن من اى حاجه اكبر؟
بحبك اوى....وبحب الدنيا لما تضيق علشان انت بتكون ساعتها البراح الوحيد ليا.

----------------------------------------------------------------------------


مافيش اولاد؟؟؟

حياتنا مش ناقصها اطفال....انا حاسه انك ابويا وابنى واخويا وصاحبى وكل حاجه مش ناقصنى فى الدنيا دى حد ولا حاجه....وانت كمان ....حاسه انك مبسوط بحياتنا ومش حاسه انن فى حاجه نقصاك مافيش اى ملل فى حياتنا علشان نستعجل موضوع الاطفال دا انا حاسه اننا محتاجين نكبر شويه.....ونتفاهم اكتر من كده ونكتسب شويه خبره تساعدنا نطلع اولادنا صح.
لكن الاهل مش ساكتين.....كلمه من هنا على كلمه من هنا والكل عايز "الحفيد"
اضطريت نعمل الخطوه اللى طول عمرى بكرهها ....روحنا للدكاتره وعدت علينا ايام كلها قلق كأننا مستنيين نتيجة الثانويه العامه وجات النتيجه....
((الامل ضعيف جدا فى انى اجيب اطفال بسبب القطط اللى زمان كنت بربيها))
وانهرت...انهرت لانى حسيت انى هتسبب فى مشكله بسبب اختيارى اللى زمان اخترته لومت نفسى كتير اوووووى انى ماضحيتش زمان بحبى للقطط ودلوقتى.....انت كمان هتتحمل تبعات اختيارى.
وقررت ساعتها اقولك كلام عمرى ماتمنيت اقوله قولته واتمنيت من كل قلبى انك ترفض تنفذه.....عرضت عليك تسرحنى باحسان وتشوف حياتك مع حد تانى....ربنا العالم انا قد ايه كنت بندبح مع كل حرف من كلامى دا وعدت علينا ايام كئييييييييييييييييييييييييبه اوى لانك زعلت منى جدا انى هان عليا اقولها والحمد لله رفضت واصريت نكون مع بعض وفضل الموضوع سر مابينا لاأهلى ولاأهلك عرفوا......قولنا لهم ان كل الامور تمام بس لسه ربنا ماأذنش انت قولتلى ان دا لازم يتقال علشان ماحدش يحاول يفرق بينا
وقعدت طيبت خاطرى كتيييييير اوى....ودلعتنى اكتر من الاول وحبيتنى اكتر من الاول.....وانا موتت فيك زى الاول واكتر
فاكر الايام دى؟؟؟
كل مااشوف الولد ماجد اللى مغلبنى دا افتكرها كل مااشوفك وانت بتحبه وتلاعبه افتكرها واقول يااااااااااااه الحمد لله.
قد ايه كنا محرومين من حاجه حلوة وقد ايه انت انسان قلبه كبيييييييييييييير اوى وبيحبنى علشان تقرر تضحى علشانى رغم حبك الكبير اوى للأطفال.عارف افتكرت الكلام دا ليه النهارده كمان؟؟
اسيبك تخمن ولا اقولك؟؟اقولك ولا اسيبك تخمن؟؟؟
هسيبك تخمن علشان لما تعرف السبب صح هديتك مكافأه وانا بحب اكفأك

-------------------------------------------------------------------------------


انا وحماتى

انا عارفه من الاول ان مامتك مش بتحبنى...انت ماقولتش حاجه....بس تصرفاتها كانت واضحه ولما سألتك أكتر من مرة انكرت.
بس لما قولتلك عينى فى عينك كده اعترفت وعرفت انها مش بتحبنى علشان انا اختيارك.....وعلشان انت رفضت كل عروضها بالعرايس اللى -من وجهة نظرها-احسن منى مليون مرةواخرهم البت جارتكم دى اللى طول عمرها بترسم عليك ورغم ان الوضع ده مقلق وكان مخوفنى بس بردو كان مطمنى انك بتحبنى بجد وانك انسان عاقل ومش بتصدق اى كلام.
بس كان نفسى اوى احس انها راضيه عنى.....لان احساسى برفضها ليا كان جارح كرامتى اوى وعلشان كده قعدت افكر....وافكر وقررت فى الاخر اعلن عليها:

"الحــــــــــــــــــــــــــــــــــــــــــ ـــب "
وعملا بالحكمة اللى بتقول:"لارد على الابتسامة الا بالابتسامه"قررت اكون معاها حبوبه وذوق وبشوشه جدا حتى لو انا متعصبه او تعبانه بردو معاها ابقى حاجه تانيه....وعرفت منك عيد ميلادها وكل مناسبه بتعتز بيها فى حياتها وكنت دايما اكون اول حد يهنيها بالمناسبه دى وحسستها انى مبهووووووووووورة بيها اوى واستغليت نقطه ان مافيش حد بيقدر يقاوم اغراء الكلام عن نفسه-ولأنها كانت بتتجنب تتكلم معايا وبتكلمنى من غير نفس-بدأت اكلمها عنها واحسسها انى مبهورة بخبرتها فى الحياه واسلوةبها فى التربيه واسلوبها فى تنظيم بيتها وحتى اسلوبها فى اللبس وعمل الاكل وكل حاجه ودايما اتصل بيها اتشيرها فى حاجات كتير مش لازم اعمل باللى تقولى عليه.....بس كنت بحسسها انى بثق فى رأيها.
فبقيت طبعا تتكلم معايا بكل حماس وفخر وتبقى مبسوطه لما تكلمنى.
مش كده وبس.....دا بعد فتره لما تلاقينى بقالى كتير ماروحتلهاش علشان مشغوله او كده تسأل عليا وتطالب انها تشوفنى علشان عايزه تتكلم معايا.
عارف انا افتكرت كل دا ليه دلوقتى؟؟؟مامتك لسه قافله التليفون معايا حالا كانت بتقولى انى وحشتها اوى وبتقول انها حلمت لى حلم حلو اوى وتبقولى يارب يتحقق علشان انا استاهل كل خير

--------------------------------------------------------------------------

يوم عيد ميلادنا


كانت فكره مجنونه اوى اننا نحتفل بعيد ميلادنا فى تاريخ اول مره اتقابلنا فيها رغم انها بجد فكره منطقيه جدا... احنا اتولدنا فعلا يوم ماشوفنا بعض انا حبيت الفكره وصدقتها لدرجه ان لما حد بيسألنى عن عيد ميلادى بقول(24/6)تلقائيا كده.
ألذ حاجه بقى يوميها التفانين اللى كل واحد فينا بيعملها من ورا التانى علشان الاحتفال دا....فاكر أول عيد ميلاد لينا سوا؟؟
لما اخدتنى فى اكتر مكان بحبه فى حياتى......كان حلم حياتى بس انى اعدى من قدامه اخدتنى بالعهربيه وغميت عيونى ولحد ماوصلنا ودخلنا وانت مغمى عينى حتى اضطريت البس نضاره شمس كبيره علشان الناس ماتقولش علينا مجانين ودخلنا....وقعدتنى...وانا هاموت واعرف انا فين؟
لحد ماجه الجارسون وقال"منورين كافيه ريش يافندم"
"واااااااااااااااااااااااااااااااو ريش بجد؟؟!!انا بقالى سنييييييييييين بحلم اشوفه واعرفه بحبه اووووووووووووووووى وانت كمان بتحبه بس بجد ماتخيلتش ان دى مفاجئتك"
ماقدرتش امسك نفسى وقلت كـــــــــــــــــل دا قدام الجارسون اللى بقى فطسان من الضحك علينا وانت اتكسفت اوووووووووووى لما قولتلك بصوت عالى وقدام الجارسون والناس سمعانى
"بجد بجد بمووووووووووووووت فيك" وكل دا ومفجأتك ماخلصتش.......
بعد ماشربت قهوتك وانا شربت شايى على ريحة قهوتك....اخدتنى واتمشينا على الكورنيش وكمان ركبتنى مركب....واكلنا دره وترمس وخليتنى عملت فى ليله واحده كل حاجه بحبها وبتمناها.
وبعد ماروحنا البيت....لقيت مفجأه كمان:
"تورته عليها صورتك وصورتى"وشكلها قلب جميييييييل اوووووووووى
كانت من حلاوة شكلها مش عايزة اكلها عايزة اتفرج عليها بس ههههههههههههههههههه
وبعدين طلعت لى اخر مفجأه واروع مفجأه:اكتر ديوان بحبه لامل دنقل...... لأ ومش كده وبس دا مكتوب بخط ايدك....وانا عارفه انت قد ايه بتكره تكتب بايدك لكن علشان خاطرى علمته ليا.....ومجلده وعلى التجليد طابه اهداء بلون الدهب
"الى حبيبتى ووطفلتى وصديقتى ومعشوقتى الأبديه أليك يازوجتى الحبيبة.."
ومن جوة كتبت لى اهداء بردو بخط ايدك:
"حبيت امل دنقل مليوووووووووون مرة اكتر من الاول علشان كان اول حاجه نلاحظ انها متشابهه بينا فكان لازم النهارده اهديكى كلماته...انتى عارفه انى مس بعرف اكتب شعر لكن انتى قصيدتى الوحيدة"
انا قدام دا كله مااكنتش عارفه اتكلم انا بس عيطت اوووووووووى وحضنتك كأنى مش عايزة نبعد عن بعض سنتيمتر واحد حتى طووووووووول العمر
وجه الدور عليا علشان اوريك المفجأه بتاعتى رغم ان الساعه كانت 3 الفجر ورغم اننا كنا خلااااااااااااااااااص مهدودين من التنطيط طول النهار قولتلك:
يلا بينا ننزل حالا...
-طب ننزل فين؟؟
هتعرف لما ننزل
-طيب خليها الصبح ياساره
لايمــــــــــــــــــــــــــــــــــــــــكن ابدا لازم حالا
-طب انا مش قادر اسوق
مش محتاجين العربيه هنتمشى خمس دقايق وهنوصل على طول
-لأنمشى اييييييييييييه...اسوق احسن
ونزلنا ركبنا العربيه وقولتلك اطلع على الشارع الرئيسى....وطلعنا على الشارع الرئيسى وخليتك تركن على جنب...
وجه دورك بقى غميتك زى ماعملت فيا الصبح بالظبط....وقفنا وشيلت الغطا من على عينك وشاورتلك على اعلان كبير منور...
الاعلان كان عليه صورتك وكان بيقول"بحبـــــــــــــــــــــــــــــــــــــــــ ـــــــــــــــــــــــــك ياجوزى"
اى نعم فى ناس افتكرته اعلان فيلم وفى ناس افتكرته اعلان تمهيدى لاعلان عن سمنه ههههههههههههههه والناس اللى نفذولى الاعلان دا كانوا فاكرينى مجنونه ههههههههههه
بس عجبك اوووووووووووووووووووووووووووى وكل يوم الصبح وانت رايح شغلك تشوفه وانت راجع تشوفه....وكل الدنيا مش فاهمه حاجه....انا وانت بس اللى فاهمين

----------------------------------------------------------------------


بحاول اتعود

بحاول اتعود على حبك اللى فى شكل افعال وتصرفات مش كلام...فى شكل عطاء مش مستنى قصاده مقابل بس بردو بحاول المح وسط مشاغلك وتعبك والمشاكل اللى حوالينا حبيبى اللى بيحبنى بروقان
بحاول المح فيك حبيبى لما كان باله رايق ومش شايل هم.
وبفضل انكشك بالكلام والهزار لحد مااخليك تطلع الطفل اللى مخبيه من جوه واول ماالمحه....اهدى واتطمن.
صدقنى انا بحبك دلوقتى اضعاف اضعاف زمان دلوقتى الذكريات الحلوة بيننا اكتر...والايام الاحلى اكتر والحب كل يوم بينا بيكبر وحابه فيك دلوقتى تحملك للمسئوليه وتفكيرك فى بكره....بكره بتاعنا...
وعارفه ان جزء كبير اوى من همك هو همى وهم بيتنا واولادنا..
لكن حبى ليك بيخلينى اخلق ليك فى خيالى صورة عاشق خرافى بجمع بينك زمان ودلوقتى علشان احبك اكتر واكتر....صدقنى انا بحبك فى كل الحالات .....بحبك وانت رومانسى ولما تكون عملى.....بحبك وانت خيالى ووانت واقعى بحبك وات مشغول ووانت رايق.....
بحبك لما تقولى بحبك وبحبك بردو لما تقولها بخوفك عليا.

-------------------------------------------------------------------

فاكر اول مره؟؟
فاكر اول مره دخلت بيتنا دا؟؟
كنت متخيله انى مش هتعود عليه الا بعد وقت كتير بس بمجرد مادخلته حسيت انى زى مااكون عشت فيه عمرى كله...مرتاحه اوى ومطمنه اوى وفرحااااااااااااااااااااااااااااااااانة اوى
طب فاكر اول مره صليت بيا الفجر؟؟
يااااااااااااااااااااااه يومها عيطت اوووووووووووووووووى لما اكتشفت انى نسيت ولسه بدعى ربنا:
"يارب اجمعنى بيه فى بيت واحد.....يارب اسعدنى بيه وعوضنى عن كل حاجه وحشه شوفتها فى حياتى اللهم ان فى قلبى مضغه تهفو الى عبدك هذا فاجمع بيننا فى الخير"
وفوقت وانت بتقول:
الله اكبـــــــــــــــــــــــــــــــــــــــــــــــ ـــــــــــــــــــر".....فوقت على صوتك على ان ربنا استجاب لى وحسيت كأنى عمرى ماصليت صلاة بخشوع واطمئنان قد المره دى.
فاكر كمان اول مره قرأنا قرأن سوا؟؟
صوتك كان حلو اوووووووووووووى ووشك كان كله نور وساعتها حمدت ربنا انى اخترتك اب لولادى
طيب فاكر اول مره غطيتنى فيها؟؟؟ لما انا نمت وانا بتفرج على التلفزيون وحاولت تصحينى ماصحيتش فغطيبتنى وقعدت تجيب لى غطيان من كل حته فى الشقه علشان خايف عليا من البرد اوى.
بصراحه انا يومها صحيت لما حاولت تصحينى بس عملت نفسى نايمه تانى كان نفسى اوى احس الاحساس دا احس كأنى بنتك اللى بتغطيها بالليل وخايف عليها وكنت مش عارفه اقولك ازاى كده فعملت نفسى لسه نايمه علشان تعمل كده..
عارف ساعتها كان نفسى اوووووووووووووووى اقولك "بحبك"
اكييييييييييييييييييييد بقى فكر اول مره عملت لك بايدى أكل...مش قادرة اوصفلك احساسى يوميها....
انت عارفنى بكره المطبخ اووووووووى بس لما اكون واقفه فى مطبخى وبعمل اكل ليك انت....حاجه تانيه خالص.
كنت حاسه زى مااكون بعمل عمل وطنى وفضلت كل شويه رايحه جايه على البلكونه اشوفك جيت ولا لسه ومش عايزة اتصل بيك علشان ماتعرفش المفجأه...
وياسلاااااااااااااااااااااااااام بقى لما جيت ودوقته وقلتلى انه حلو كنت حاسه انى بحبنى اووووووى علشان عملت حاجه عجبتك.
الا صحيح قولى هو عجبك بجد ولاقولت انه عجبك علشان تفرحنى بس؟؟
ياترى فاكر اول شهر تقبض مرتبك وقعدنا سوا نشوف هنمشى ازاى وهنشترى ايه ونحوش كام ولما اكتشفنا ان فاضل للترفيه خمسه جنيه بس؟؟ ساعتها انت اتضايقت بس انا فرحت اووووووووووووووى
الخمسه جنيه دول هيكفونا اكيد نتمشى على الكورنيش فى عز الليل ومش هيدخلونا سينما زى ماكنت انت ناوى تعمل....فرحت3لانى هاكون معاك انت وبس.....هتتكلم واسمعك......واتكلم وتسمعنى ومافيش حد حوالينا ولا معانا
فاكر أول مره عفت انى حامل كنت عامل ازاى؟؟كنت عامل زى طفل مزأطط وخايف وكنت بصعب عليك اوى كل مااقول اه وكنت بتخاف عليا بجد.....عليا انا مش على ابننا وبس....
فرحت اوى ساعتها وحسيت انى لسه "حبيبتك"مش مجرد مراتك وام ولادك ولا يوم ولادتى كنت هتجنن وانا قعدت احاول اكتم صوتى علشان ماتتخضش....بس انت كنت حاسس بيا....ساعتها بصراحه ماخطرش فى بالى اقولك بحبك لانى كنت بتالم اوى

فاكر اول مره شيلنا ابننا؟؟ انا كنت مرعوووووووووووووووبه وخايفه عليه اوى وحاسه انه صغنن خالص وخايفه اكون بوجعه بس بعد شويه بدأت اطمن وكنت بفرح اوى لما يقعد ييعيط واول مااحضنه يسكت.
وانت اول مره تشيله كان شكلك يفطس من الضحك......كنت محتااااااااااااس خالص ومش عارف تعمل ايه...هيا دى معاناة الطفل ياعينى لما يكون مامته وباباه الاتنين اخر العنقود ههههههههههههههههههههههههههههه
كل دى واكتر حاجات حلوة واحاسيس حلوة اول مره احسها واعيشها كان معاك....ومافيش حد غيرك قدر يخلينى اتمتع بيها وكل دا زاد ربنا بيديهولنا علشان نتحمل قسوة الايام ول ان مافيش حاجه فى الدنيا دى تقدر تقسى عليا وانا معاك
بحبك اوى بحب عفويتك اللى خلت لكل الحاجت دى طعم تانى.... بحبك اوى وبحب صدقك اللى مخلينى دايما مطمنه بحب كل لحظة حلوة ومره عشناها وعايشينها وهنعيشها علشان معاك
ربنا يخليك ليا

-------------------------------------------------------------------

هو ايه يعنى الفرق بينك وبين غيرك؟؟؟
هو ايه يعنى الفرق بين حياتى معاك وبين حياتى مع اى حد تانى؟؟؟ ماهو كله جواز..وكلها حياه..وكل حياه فيها مشاكل.
دا كلام ياما سمعته زمان.. لما اخترتك انت بالذات اكمل حياتى معاك لما كنت بعيط وانا بصلى وبدعى ربنا يرزقنى بيك زوج صالح وانى ماكملش حياتى غير معاك
وقتها ماكنتش عارفه الفرق...بس كنت حاساه دلوقتى بعد 20 سنه من ميلادى معاك اقدر اقول الفرق
الفرق ان اى حياة من غيرك هي حياه ملهاش طعم اى حياه تانى هتبقى"عيشه وخلاص" لكن معاك انا بجد"باعيش"...
معاك بعيش كل حاجه فى حياتى بطعم تانى...حتى النفس اللى بتنفسه ليه طعم تانى.
الفرق اننا بقالنا 20 سنه متجوزين عمرك ماقلت عليا"ام العيال" ولا"الحكومه" ولا اى حاجه تضايقنى....لاقدامى ولا من ورايا.
بقالنا 20 سنه متجوزين عمرك مااشتكيت منى لحد....رغم ان فيا عيوب كتير وبضايقك كتير.
20 سنه بتقول عنى ملاك ومتحملاك رغم انك انت اللى اتحملت عصبيتى وقله صبرى وسوء ظنى كتير اوى...
وحتى خناقنا بيبقى بحب..بنقى بنتخانق واحنا خايفين على بعض خايفين على احساس بعض وماحدش فينا بيجرح فى التانى.
الفرق بينك وبين اى حد تانى....ان احلامنا واحده وحتى لو انا بحلم بحاجه خاصه بياانا انت بتحب احلامى وبتحضنها وبتحاول تساعدنى احققها...رغم انك مش تستفيد اى حاجه.....انت بس عايزنى مبسوطه مش زى اى حد تانى.....ماشى فى طريق وانا فى طريق تانى خالص.
الفرق بينك وبين اى حد تانى انك انت الوحيد فى الكون بحاله اللى بتفهمنى من غير كلام وبتحس بيا حتى لو انا فى اخر الكون وانت فى الطرف التانى منه.
الفرق بينك وبين اى حد تانى...انى مخلوقه من ضلعك انت...وانى حته ممنك انت...جزء من روحك...علشان كده انت الوحيد اللى ينفع تكلمنى...مش اى حد تانى.
الفرق بينك وبين اى حد تانى ا ماحدش كان ينفع اب لولادى غيرك اب بالروعه دى وبالحنان دا...عمرك ماقولتلى فى مره:
"شوفى ولااااااااااااااااااااااادك بيعملوا ايه"ولا رميت عليا المسؤوليه لوحدى
لأ..دايما بنتناقش ونتكلم واحنا عارفين ان دول "ولادنا" مش ولادى لوحدى ولا ولادك لوحدك.
دايما مخليهم حاسين انى احسن ام فى الدنيا.....وعمرك ماطلعتنى صغيرة فى نظرهم عمرك ماعليت صوتك عليا قدامهم ولاحتى حسستهم انك متضايق منى-برغم انك كتير كنت بتبقى مضايق منى.
الفرق بينك وبين غيرك...انك كنت مصر نعيش صح نعيش الحياه بكل مافيها...ولغيت من قلبى الاحساس بالخوف من بكرة.
الفرق بينك وبين غيرك انك عيشتنى فى جنه فى الدنيا ......ورسمت طريق للجنه فى الاخره...
الفرق بينك وبين اى حد تانى...انى بحبك انت.....بحبك يااحلى حاجه حصلت فى عمرى كله...بحبك

ميرسي يانور

شكرا ع متابعتك ياجميل

[ندعوك للتسجيل في المنتدى أو التعريف بنفسك لمعاينة هذه الصورة]