اصعب سؤال فى الحب؟؟؟؟؟

بسم الله الرحمن الرحيم

السؤال ده بيحصل كل يوم فى كل بيت وكل مكان...
سؤال الافلام جاوبت عليه بطريقتها...لكن لو جالك السؤال ده فى الواقع...يا ترى هتعملى ايه.

لو لقيتى الانسان اللى بتحلمى بيه وتتمنيه من وانتى صغيرة
الانسان اللى يحرك احاسيسك ومشاعرك وكل شى جميل جواكى
الانسان اللى تشوفى فيه طفولتك وشبابك ومستقبلك وكل ايامك
الانسان اللى يحبك انتى بس ويحترمك ويقدر مشاعرك وكل زرة حب جواكى

ويكون الانسان ده كمان هو فى نفس الوقت..انتى بالنسبة له كل حاجة..وانك الانسانة اللى حلم بيها واتمناها من طفولته
وقال ليكى من قلبه ومن صدق...انا بحبك...بحبك انتى بس ومش عايز من الدنيا اى حاجة الا انتى بس
انتى دنيتى اللى هعيش فيها..وليها..حبيبتى انا ليكى...ومش عايز اكتر من انك تقولى من قلبك انك ليا

واتعاهدتم طبعا على الحب فى الحياة ...وان مش هيفرقكم شى فى يوم الا الموت
وبعد كده جه الانسان ده عشان يتقدم ليكى عشان تكتمل الفرحة..والحياة اللى مش هتبقى حياة الا وانتم الاتنين مع بعض
ولانه ما يقدر يعيش لحظة واحدة وانتى مش معاه ....
لكن.....
الاهل رفضوه لاسباب تافهة...مثلا (الانسان احنا مش شايفينه لايق ليكى...دة مش من مستوانا...بكرة يجيلك احسن منه...دة قدامه كتير عشان يوصل للمستوى اللى نتمناه فى عريسك احنا غرضنا مصلحتك)

وطبعا الانسان دة لانه بيحبك اتقدم اكتر من مرة...وجه على كرامته فى حاجات كتير عشان خاطرك
لكن للاسف...كل محاولاته فشلت...الاهل مصممين على رايهم..اعتقادا منهم انه فى مصلحة البنت

لغاية ما قال ليكى فى يوم...حبيبتى...انا اتمنيتك انتى من الدنيا كلها...
وضحيت بحجات كتيرة وده لانى حبيتك انتى بس ومن قلبى .....واختارتك انتى عن الدنيا كلها
ودلوقتى جه وقت اختيارك...اما انا......او اهلك!!!

مش هقول ايه هو الرد الصحيح
بس هقول ايه هى الاجابة المنطقية يا ترى


يا ترى اى بنت فى الموقف دى هتقول ايه؟؟؟
ويا ترى راى الشباب فى الموضوع ده ايه برضه


ردك اية .......؟

انا لو مقتنعه بهذا الشخص هعرف اقنع اهلى كويس بيه بس لو حصل وموفقوش عليه انا مش هعمل اى حاجه غلط ابدا تزعلهم منى وهحاول انساه . بس تأكد انى بقتنع بوجه نظر أهلى ولا يمكن يرفضو من اجل تلك الاسباب التافه . شكرا موضوع حلو كالعاده

رضا الاهل حاجة مهمة جدا طبعا
شور هيبقى صعب على البنت انها تنسى حد بتحبه
خاصة لو كان حبهم كبير
لكن فى اى علاقة لازم تعرف ان كل شئ نصيب
ومفيش حد بياخد نصيب حد
لو امنتوا بكده
هترتااااااااااااااااااااحو ا

ميرسى ع التوبيك

احب أقولك انها لو اختارنه وفضلته عن أهلها مين يضمن انه مايعيش طول عمره حاسس بالذنب أو انها ممكن تفضل شىء تانى عليه وتسيبه

اللى ملوش خير فأهله ملوش خير فى حد

بجد موضوع جميل جدا
وعلى فكرة الموقف دة حصل فعلا معايا
بس عمرى ماكنت هخيرها مابينى ومابين أهلها
والحمد لله هى طبعا سمعت كلام أهلها
وانا مزعلتش من دة لان دة هو الصح
وعلى فكرة انت فعلا لو بتحبها هتتمنى لها الخير
وهتحاول تنسحب من حايتها علشان متحسسهاش بالذنب

الموضوع بجد شائك بس أنا عندى مبدأ في حياتى

( ما ضاع حق وراءه مطالب ) أى واحد فينا عاوز حاجه مش من أول جوله يستسلم لازم أى واحد أو واحده يدافع عن اختياره أنا طبعا مش بقول نعصي الأهل لا طبعا بس نحاول بكل السبل نقنعهم بوجهة نظرنا

وبعدين يعنى ايه الشخص دا مش من مستوانا على أساس إننا مخلوقين من الشيكولاته وهما من الطين بجد كتير أوى الأهل بيدققوا في كلام فارغ أهم حاجه في الزوج الأخلاق قال رسول الله صلي الله عليه وسلم ( من جائكم من ترضون دينه وخلقه فزوجوه وإن لم تفعلوا تكن فتنة في الأرض وفساد كبير )

ولكن إذا كان الأهل بعد المسايسه والمحايله لم يقتنعوا وفي الغالب هيقتنعوا من كتر الذن يبأه خلاص أنا عملت ال عليا وهوا كمان عمل إل عليه علشان ميجيش يوم واقول يارتنى

وفي الآخر اهم حاجه لو الشخص دا هوا فعلا من نصيبي بالله لو العالم كله إجتمع علشان يفرقنا إستحاله لان دا قدر ولا مرد لقدر الله

وعذرا على الإطاله

تحياتى