الفرانكو آراب

موضوع: الفرانكو آراب الجمعة أكتوبر 02, 2009 6:09 pm

في بداية الموضوع احب اقول اسفه اني هطول عليكم
بس ده لاني شايفه الموضوع كبير جدا وفي غايه الاهميه

لمن لا يعرف الفرانكو اّراب .. فهي لغة جديدة لبعض الناس بتكتب اللغة العربية بحروف انجليزية وبتعوض عن
الحروف اللى مش موجوده بأرقام زى العين مثلا بتكتبها 3
وحرف الحاء يكتب 7
إلخ ...

انا بجد نفسى اعرف تفسير لاستخدام الحروف الانجليزى فى الكلام باللغه العربيه
طبعا مش بتكلم عن الناس اللى جهازهم مش بيكتب عربى ومضطرين لاستخدام الحروف الانجليزى
انما اللى بينرفزنى الناس اللى عندها عربى وبرضو بتتكلم كده!

هل هو نوع من الفزلكه؟
ولا نوع من الكسوف من الحروف العربى؟؟
ولا ايه بالظبط
روشنه يعنى؟
بجد عايزه اعرف تفسير الظاهره دي

عمرى ما شوفت واحد انجليزي بيكتب بحروف عربى ولا هندى ولا صيني
كل لغه ليها حروفها
هتتكلم عربى يبقى حروف عربى
هتتكلم انجليزي يبقى حروف انجليزي
لكن متعملش لغه ولا هى عربى ولا هي انجليزي!!!

إذن احنا عايزين نكتب يا إما عربي يا إما إنجليزي

التساؤل دا مطروح في ظل انتشار ما يسمي بـ"الفرانكو آراب" , هل ممكن فعلا اننا نكتب انجليزي بـ حروف عربي؟ يعني نقول مثلا:
" وي فايند ات هارد تو فيل فور ذيس بيبول آند امبورتانتلي تشيلدرين , أز زاي أر نوت أوار اون سيستر .............."؟؟؟؟؟؟؟؟؟؟؟؟؟؟؟
هل ممكن حد فينا يرضي انه يكتب كدا؟؟؟؟؟؟؟؟؟
الكل طبعا هيقول ايه الهبل دا , مستحيل حد يكتب كدا؟ و مستحيل تلاقي قبول ,
لكن لو فكرنا شوية هنلاقي نفسنا بنعمل كدا "حرفيا" دون اي وعي بكتابتنا للفرانكو آراب ,
بنكتب لغة بحروف لغة تانية ,
طب ليه ماحدش هيرضي انه يكتب انجليزي بحروف عربي و راضي انه يكتب عربي بحروف انجليزي؟

هل لان حروف اللغة العربية احقر من حروف الانجليزي مثلا؟؟؟؟؟
هل حروف الانجليزي ماشية ع الموضة و اكثر شياكة؟؟؟؟؟؟

هل حروف اللغة العربية دلالة علي التخلف و الجهل و حروف اللغة الانجليزية دلالة علي الحضارة و التقدم؟؟؟؟؟
لا بالتأكيد,
بلاش عشان هي الحروف اللي كتب بيها القرآن طالما دي مش مقنعة اوي ليكم ,

لكن الحروف دي عظيمة لانها حروف لغتنا و اللي بتدل علي ثقافتنا ,
دا لساننا و ماحدش بيغير لغته "القومية" مهما عمل ,
دي لغتنا القومية عشان بنتكلم بالعربي , بنحلف بالعربي , و "بنحلم" بالعربي

و دا كاف اوي انه يخليها لغتنا القومية ,
طب هل الشعوب الناطقة بالانجليزية فكرت انها تكتب انجليزي بـ حروف عربي, او عبري او حتي هندي؟
لا الشعوب دي ما عملتش كدا لانها بتعشق لغتها و بتقدسها
و لو ع السهولة-ذي ما شباب الفرانكو بيدعوا- كانوا استخدموا الابجدية الكورية ف الكتابة لانها بتحتوي علي 14 حرف فقط ! لكنهم دايما شايفين نفسهم الاعلي و ما سواهم الادني ,
و احنا بطيب خاطر اهو بنستبدل حروفنا العربية بحروفهم اللاتينية دون اي وعي !

ف الوقت اللي شبابنا بيضيعوا فيه حروفهم و بيستهينوا بيها ,
بنلاقي شعوب تانية -رغم خلافاتها الشديدة مع العرب- بتستخدم الحروف العربية كأبجدية لـ لغاتهم ! ,
اللغة الفارسية و اللغة الكردية و لغة الاوردو و لغات شتي حروفها مازالت عربية !
طب ليه شبابنا مستمر بالكتابة بالفرانكو ؟
هل احنا ناقصين تدخل اكتر من كدا ف لغتنا و ثقافتنا و بلادنا؟؟؟

طب ايه الهدف من الموضوع دا كله , من مهاجمة الفرانكو و الدفاع عن الحروف العربية ,
هل احنا فاضيين فعلا و مش لاقيين حاجة نقولها؟
لا , الحكاية ان الموضوع اكبر من مجرد استخدام الشباب للفرانكو علي النت او الموبايل ..الخ,
الخوف كل الخوف من تضاؤل استخدام العربية علي مرور السنين ,
لان فيه تجارب مماثلة قدامنا , و الغرب دايما بيهدف للتحول دا ,

اللغة التركية و حتي قدوم مصطفي كمال اتاتورك 1920 كانت تكتب بالحروف العربية و بدلها اتاتورك بالحروف اللاتينية ليعلن انفصاله رسميا عن الشرق و العالم العربي و اتجاهه لاحضان الغرب ,
يعني اللغة التركية دلوقتي اصبحت "فرانكو تركي" ! ,
واللغة الماليزية للاسف ف الطريق لترك الحروف العربية ! ,

يا ريت حد يديني سبب اكثر اقناعا لكتابته للفرانكو بعد ما عرف اخطار و عدم جدوي الكتابة بالفرانكو ,
البطء و التعود مش اسباب ابدا لترك حروفنا العربية ,
ادي نفسك وقت تكتب فيه بحروف عربي ,
انت ما اتعلمتش ف المدرسة تكتب عربي بـ حروف انجليزي ! ,
تصوروا كدا بعد مرور السنين و حروفنا العربية بتختفي-بعد اختفاء الفصحي و ظهور العامية- و بيحل محلها حروف لاتينية ,

"العقلاء" من احفادنا هيلعنونا ! هيسألوا ليه اجدادنا فرطوا ف حروفنا العربية و سابولنا الحروف دي؟

هل من مجيب؟

ارحب بأرائكم و مشاركاتكم

الفرانكو آراب Www.hh50.com-Images-Islam-0732

الفرانكو آراب Www.hh50.com-Images-Islam-0732

بصراحه عندك حق الموضوع ده بينرفزنى اوى المفروض اننا نفتخر اننا بنتكلم بلغه القران مش نسيبها ونكتب بلغه الغرب ، تسلم ايدك موضوع جميل جدا

جزاكى اللة خيرا الموضوع جميل جدا

تسلمى ياصعبه
الموضوع ده فعلا لازم يبقى قضية راى عام
وانا معاكى مستنيه اعرف الاراء
..
شروق الشمس

عندك حق يا هبه الموضوع زاد عن حده جدااااااااااااا
كل الناس بيكتبو باللغه دى بقت موضه باين

عندك حق يا هبة هو لو ليهم عزر
يبقى العذر للناس اللى جهازها مش بيكتب عربى او بتبعت لجهاز مش بيستقبل عربى
لكن غير كدة مرفوض وفعلا بشوف دة كتيييير وفاكرنها روشنة
وانهم كدة بيبقوا استايل

شكرا لطرحك للموضوع دة يا هبة

زائر

walahy ya 2amar el topic to7fa ba7aieky 3alih
ههههههههههههههههههههههههه
بهزر

بجد انتى فتحتى المناقشه فى موضوع مهم اوى اوى
لان المعظم الوقتى بيتكلم بالاسلوب دا
وكمان انتى ناقشتى التوبيك بطريقه جميله
تسلمى يارب

ميرسي ليكم ولمشاركتكم اجمل اعضاء

dodda كتب:: walahy ya 2amar el topic to7fa ba7aieky 3alih
ههههههههههههههههههههههههه
بهزر

بجد انتى فتحتى المناقشه فى موضوع مهم اوى اوى
لان المعظم الوقتى بيتكلم بالاسلوب دا
وكمان انتى ناقشتى التوبيك بطريقه جميله
تسلمى يارب

هههههههههههههههههههههه
ماشي يا دودا
منورة يا قمرايه طبعا

حقيقى الانسان بيحس نفسه طفل لسه بيتعلم يقرأ ويكتب مع لغة الفرانكو ارب
بحس انى بقرأ حرف حرف
شئ فعلا غريب
استخدام حروف انجليزية في الكلام باللغة العربية

ولو سألت حد يرد عليك
asli met3awed akteb english
!!
طب اتعودت امتى ؟
اكيد متولدتش بتكتب انجليزي بسرعه!

واللي ينرفزك انك ممكن تيجي تكلمه انجليزي تلاقيه مش بيفهم انجليزي .. ولا ممكن يكون الانجليزي اتغير ولا ايه

الطريقه دى ممكن تقضى على اللغه العربيه
واللغه العربيه التى اعزها الله
وانزل بيها القرآن الكريم

بصراحة بفضل اللى يكلمنى اما يكلمنى عربى او يكلمنى انجليزى
لكن عربى بحروف انجليزى وتدخل فيه الاراقام
وحشة جدا
وفعلا ملهاش اى لازمة

انا فعلا معاكي بس هنعمل ايه

ربنا يسامحه بقه احمد مكي
الفرانكو آراب Vwy4g6

منورني احمد
بس مش مكي هو السبب

bgd dol 5n2ony gdn el nas dol
هههههههههههههههه

انا فعلا بزهق لما بلاقى حد يتكلم كدة

الموضوع فعلا بقى اوفر اووووووووووى

توبيك تحفة بجد تسلم ايدك ياقمر

romancequeen كتب:: bgd dol 5n2ony gdn el nas dol
هههههههههههههههه

انا فعلا بزهق لما بلاقى حد يتكلم كدة

الموضوع فعلا بقى اوفر اووووووووووى

توبيك تحفة بجد تسلم ايدك ياقمر

هههههههههههههه
منوراني اجمل كوين