مين قال ان اللي فات مات؟؟

تذكير بمساهمة فاتح الموضوع :

]دي قصه جامده جدا وعجبتني اوي ويارب تعجبكم [ندعوك للتسجيل في المنتدى أو التعريف بنفسك لمعاينة هذه الصورة]

وهقدمها علي حلقات

هي طويله شويه بس بجد حلوه

..منقوله من احد المواقع الالكترونيه..
كتابتها: رفيف الخميسى
اللي كتبت قصة اخر البنات المحترمين

..........منقول.......

اتمنى ان تستمتعوا بها
تحياتي

****************

الابطال:
ندى وشادي جيران
القصة بتبتدي والابطال لسه صغيرين ندى في اولى ثانوي وشادي في تالتة ثانوي

]

*******************
الفصل الاول

الحلقه الاولى

دخلت الام الغرفة وقالتت لابنتها في هدوء.

الام: ندى ,يلا روحي اعملي قهوة لباباكي, واسأليهم لو عايزين عصير.

قامت ندى من على مكتبها في تأفف, وهي تقول.
ندى: يووووه ياماما, متخلي نسمة هي الي تعملها, انتي مش شايفاني بذاكر.

الام: بطلي دلع , دلوقتي بقيتي بتذاكري؟, وخلى نسمة الي تطلع! , وبعدين نسمة مبتعرفش تعمل قهوة.
ندى: حاضر خلاص, هقوم اهه, هو مين برة اصلا؟.

الام: محدش غريب يعني, دي هالة اختك وهايدي صاحبتها وشادي.
ندى: شادي مين؟.
الام: شادي الي ساكن في البرج الاحمر الي قدامنا, مش عارفاه؟ .

ندى: اه ,اه فاكراه , الواد الغلس القصير دا, الي كان بيغلس عليا واحنا صغيرين ,دا كان شعره طويل وكنت دايما اشده منه,ايه دا هو بقى في تالتة ثانوي امتى؟, هو قد هالة؟.

الام: ايوة, قدها .
ندى: وايه الي جايبة النهاردة؟.
الام: ماهو كمان مقدم على اختبار القدرات بتاع عمارة, فجاي لباباكي يفهمه بالمرة مع هالة وهايدي.

ندى: الواد انا فاكراه ,دا كان رذل رذالة يا ماما واحنا صغيرين, مع اني اصغر منه بسنتين بس كنت اطول منه , وكنت دايما بضربه.

الام: انتي هتقفي ترغي عشان تضيعي الوقت, اتفضلي يلا, روحي اعملي القهوة, وطلعيلهم عصير, وبعد كدة, هاتيلي انا كمان عصير واسألي نسمة لو عايزة.

ندى: يووووه, حاضر, ماهي نسمة دي الاعدادية بتاعتها هتيجي فوق دماغي, منا في اولى ثانوي برضة وعندي اربعتاشر مادة.

الام: طب اعملي الي قلتلك عليه بسرعة, وانتي تلحقي تذاكري الاربعتاشر مادة يا لمضة.
ندى: حاضر.

وتوجهت الى المطبخ على مضض, وجهزت القهوة, وهي تدندن, ووضعتها على صينية واتجهت بها حيث ابوها.
ندى: بابا , القهوة.

الاب: شكرا يا نيدو.
اخذ والدها القهوة من يديها , بينما التفتت هي تسأل.
ندى: حد عايز عصير؟.

نظرت اليها اختها .
هالة: انا عايزة, وهاتي لهايدي كمان, عايز يا شادي؟.

التفتت ندى تنظر لشادي لاول مرة, واندهشت, انه لم يعد الطفل القصير الذي اعتادت ان تضربه, لقد رأت شابا طويلا بشدة, يرتدي نظارة طبية, ذو وجه وسيم اسمر, فتعجبت, وقالت دون ان تفكر.

ندى: ايه دااااا, انت طولت اوي كده ليه, دانت كنت ازعة, وشعرك...
قال الاب ينهرها.
الاب: ايه يا ندى الكلام دا؟, مش تفكري في الكلام قبل ماتقوليه.

ندى: اصله يا بابا انا مشفتوش من واحنا صغيرين, كان قصير وشعره منكوش و....

قاطعها الاب للمرة الثانية ,بينما شعر شادي بالحرج من الوصف حين انخرطتا هالة وهايدي في الضحك.

الاب: فيه بنت رقيقة تتكلم زي الدبش كده, جيبيلهم عصير يلا وتعالي, وبطلي تلبيخ.
فشعرت هي بالحرج هذه المرة, وذهبت لتفعل مثلما قال لها ابوها في سرعة ثم عادت لامها .

ندى: ماما , ماما انتي شفتي شادي؟؟.
الام: ايوة يا حبيبتي.

ندى: دا بقى شكل تاني خالص يا ماما, دا طول اوي ولبس نضارة.
الام: مانتي عندك حق, مشفتيهوش من زمان, والله مااعرف كان مختفي فين كل دا.

ندى: بس انا لبخت الدنيا ,واتريأت عليه قدامهم.
الام: انتي على طول لسانك فالت, لما يخلصوا ابقى اطلعي اعتذريله.
صمتت قليلا تفكر ثم قالت.

ندى: هو اكيد علمي رياضة ,ولا ايه؟, هيكون بياخد قدرات عمارة ليه يعني؟.
الام: معرفش انا بقى, انتي مش هتعدي تذاكري ولا ايه؟, وبعدين فين العصير بتاعي.

ندى: اه صحيح نسيت.
وانطلقت تحضره في سرعة ,وهي تفكر في شكل شادي الذي تغير تماما منذ الصغر.
*******************

انتظرت ندى بصبر انتهاء والدها من الحديث مع اختها وهايدي وشادي, ودخوله غرفته لتهرع للخارج, موقفة شادي وهو في طريقه الي الباب.
ندى: شادي.

التفت ينظر اليها في دهشة, بينما نظرت هي لاعلى لتنظر لوجهه, الذي علته امارات التساؤل.
شادي: ايوة , فيه حاجة؟.

ندى: انا.... سوري,...سوري لو كنت ضايقتك ولا حاجة.
نظر اليها ببرود.
شادي: ضايقتيني في ايه؟.
ارتبكت ندى لبروده , وشعرت هي بالاحراج.

ندى: يعني لما قلت انك كنت ...قصير وشعرك طويل.
قال ببرود وهو ينظر الى اختها وصديقتها, اللتان تتابعان الحديث في شغف.
شادي: طب منا كنت قصير وشعري طويل , ايه يعني؟.

نظرت اليه بدهشة, ثم بضيق.
ندى:يعني ان انا قلت كده.
شادي: اصلا انا مكنتش قصير انتي الي كنتي طويلة زيادة وانتي صغيرة, وكنتي مستقوية نفسك, عشان طولك.

شعت بالغضب, فقالت في انفعال.
ندى: تصدق انت بارد, وانا غلطانة اني جيت اتأسفلك اصلا, انت فعلا كنت قصير ومنكوش, ومش كده وبس, كنت غلس وكنت دايما بضربك,هه بقى.

وضربت بقدمها في الارض بطفولية, ثم اندفعت للداخل, بينما ازداد هو احراجا امام الفتاتين.
*******************

ندى: بس يا هالة متكلمنيش عنه, دا قليل الزوق, وغبي.
ضحكت هالة وهي تقول.
هالة: مش انتي الي هزأتيه الاول, واتريأتي عليه ولا لأ؟.

ندى: انا مقلتش حاجة غلط, هو كان غلس, ولسه غلس زي ماهو, هو عشان بقى نخلة خلاص, نسي شكله زمان, انا فاكرة اننا عندنا صور ليه وهو حاطط صباعه في مناخيره كمان.

انخرطت هالة في الضحك وهي تقول.

هالة: بس متقوليش الكلام دا ادام هايدي لحسن معجبة بيه, وشكلهم هيظبطو كده.

ندى: يتحرقو هما الاتنين, اهي هي رخمة زيه بالظبط, وهو وحش واسمر وبنضارة.

هالة: حرام عليكي, دا وشه امور, انتي مخدتيش بالك ولا ايه.
ندى: وانا اخد بالي ليه, مانتي عارفة اني بحب الصبيان البيض الي عنيهم ملونة.

وصمتتا قليلا ثم قالت هالة بشغف.
هالة: بس هي صحيح فين الصورة دي اوريهالها.
ضحكت ندى وهي تقوم.
ندى: قومي قومي, ندور في البوم الصور.
**********************

الحلقة الثانيه

تباطئت خطوات ندى السريعة, وهي تتوجه نحو المصعد بمدخل بيتها, بعد ان كانت مندفعة كعادتها باتجاهه عائدة من درسها, مستوقفة الراكب قبل ان يدخل ويغلق الباب , ولكنها تعرفته, انه شادي ,فتراجعت قليلا عن سرعتها, فالتفت شادي ينظر اليها , وتردد قليلا قبل ان يفتح الباب لها يدعوها للدخول قبله, فترددت هي الاخرى وهي تقول.
ندى: خلاص اطلع انت

قال بسخرية مشوبة ببعض الحرج.

شادي: هو حمولة واحد بس ولا ايه؟, اركبي دا حتى بتاع بيتكو انتو.

دخلت وهي تشعر بالحرج, فقد علمت انه علم بأمر الصورة التي أرتها لهايدي صديقته, وعلمت انها وهالة سخرتا منه في الحصة الماضية, وكانت قد تجنبت رؤيته قدر الامكان بعد هذا الامر.
شادي: كيميا وفيزيا؟.
التفتت اليه بدهشة.
ندى: نعم؟.
اشار الى المذكرة بيدها.
شادي: كيميا وفيزيا, اولى ثانوي طبعا.
ندى: الملزمة ,دي؟, اه.
شادي : صعبين ولا؟.
ندى: زفت.
شادي: ميجوش حاجة في كيميا تانية ولا الفيزيا.
ندى: ربنا يطمنك.
شادي: ناوية ادبي ولا علمي؟.
ندى: معرفش لسه.
صمتا قليلا ,قبل ان يقول بجدية مفاجئة.
شادي: انا كمان عندي صور ليكي وانتي صغيرة على فكرة.
احمر وجهها لانه فتح هذا الموضوع في وسط كلام عادي , وقالت بحرج.
ندى: صور ايه؟.
اكمل دون ان يجب.
شادي: ومكانش شكلك فيهم حلو برضة,بس انا مش عيل زيك عشان اردهالك.
رفعت عينيها اليه في دهشة وحرج, وعجزت عن الكلام, بينما توقف المصعد, فقال وهو يخرج منه.
شادي: مع ان شكلك ذكية, بس تصرفات العيال دي بتغطي على ذكائك.
وخرج في هدوء, وتوجه الي باب بيتها تاركا اياها في قمة الحرج, وهي تتبعه في بطء, تفكر فيما قاله لها ,وشعرت بالدم يفور في جسدها, وبالرغبة بشدة في الرد عليه, ولكنها لم تدر بم تجب, فأمها فتحت الباب مرحبة به, وادخلته.
************************

مضت الايام بعد هذه المواجهة مع شادي على ندى عادية, في باديء الامر كانت مغتاظة وترغب في الانتقام بشدة, ثم بعد هذا نست او تناست الامر , لان الامتحانات شغلتها , ولم تتواجه بشادي بعدها اذ تجنبت حرج اللقاء, وعلمت بعد هذا ان هايدي لم تضيع وقتها وارتبطت به لانها معجبة به منذ زمن, ولم يكن مزاحها عليه في هذا اليوم الا لمجرد لفت انتباهه.

ندى: وهي هايدي بتحبه بجد؟.
قالت هالة وهي تجلس على سريرها بغرفتهما, بعد ان اطفأت الضوء.

هالة: معرفش, هي بتقول كده, بس انتي عارفة هايدي بتحب على نفسها اصلا, اصله طلع مؤدب اوي, تصدقي ان دي اول مرة يصاحب يا نيدو؟, دي غلبت على ما خلته ينطق.

ندى: ياسلام؟.

هالة: انتي مخدتيش بالك ولا ايه؟, دا واد دحيح, دا هيدخل هندسة ان شاء الله من اوسع الابواب, مش زينا عنينا طلعت في المذاكرة, لولا ان بابا واعدني بهدية لو دخلت هندسة زيه مكنتش ذاكرت اوي كده.

ندى: امال مش باين عليه يعني.

هالة: حرام عليكي دا باين عليه جدا, انا كنت فاكراه الاول تقيل, لانه حلو شايف نفسه وكده , بس طلع من العيال الي بيذاكرو ومش في دماغهم, دا عمرو قالي انه كان خنيق.

ندى: هو كان في مدرسة عمرو؟.

هالة: لا , بس كان عارفه من اصحابه, يا بنتي عمرو اكبر منه.
ندى: منا فاهمة, الا صحيح هو منزلش اجازة الاسبوع دا؟.
هالة: لا ياستي, شعره طويل شوية, اتحبس الخميس دا.

ندى: خليكي انتي اعدي صدقيه, تلاقيه نزل اجازة ومقالكيش زي المرة الي فاتت.
هالة: لا انا سألت حجازي الي في سنة تالتة, قالي انه منزلش الاسبوع دا, وباعت معاه كمان ورقة طلبات هيجيبهاله هو.

شدت ندى الغطاء عليها في حدة وهي توليها ظهرها.

ندى: خليكي اعدي استنيه اسبوع ورا اسبوع.
هالة: انا مش فاهمة انتي مبتحبيهوش ليه؟.
ندى: انا الي مش عارفة انتي بتحبيه على ايه, دا لا شكل ولا منظر, ايه يعني ظابط؟ .

هالة: انتي غيرانة عشانه بيحبني جدا, وعشان عاجب ماما, واول ما يتخرج هيجي يخطبني.
التفتت تنظر اليها في غضب.

ندى: ماتحبيه ولا يحبك, انتي حرة, اتفلقي, بس الواد دا انا بقى بسمع عنه بلاوي في المدرسة عندنا, وانتي حرة .
هالة: مالكيش دعوة , انا مش كل ما اكلمك تقوليلي البقين دول, خلي نصايحك لنفسك.

ووضعت الوسادة فوق رأسها في عنف وهي تغلق ضوء الاباجورة.
********************

وقفت ندى مع اختها تتململ وهي متوقفة مع شادي امام البيت يتحدثان.
شادي: وهتقدمي الورق امتى.

هالة: لسه هحط الرغبات بس اكيد ان شاء الله هندسات كلها الاول ,وبعدها فنون جميلة, امال تعبنا قلبنا في القدرات ليه.

شادي: ربنا يسهل, لما تيجي تودي الورق ابقي قوليلي نروح سوا.
هالة: دي هايدي الي زعلانة اوي عشان مجموعها, شكلها مش هتحصل هندسة.

شادي: ممممم, منا عارف.
هالة: ايه مالك؟, انتو متخانقين ولا ايه؟.
شادي : لا عادي.
شعرت ندى بالملل, فتأففت وهي تقول.

ندى: يلا بقى يا هالة.
شادي: طيب انا همشي عشان متتأخروش, سلميلي على انكل وطنط, باي يا ندى.
قالت بعد انصرافه.
ندى: الواد دا رخم بشكل.

[ندعوك للتسجيل في المنتدى أو التعريف بنفسك لمعاينة هذا الرابط]

**********
الحلقة الثالثة

هايدي: بارد يا هالة بارد, مبيحسش ولا بيتقل انا مش فاهمة, مش حاسس بيا خالص, من ساعة ما عرف انه هيقبل في هندسة وانا لا خلااااص, قالبني.

تمتمت ندى وهي جالسة على سريرها المقابل لسرير اختها ,تقلب مجلة في يديها .

ندى: انا شايفة ان من قبل ما يقبل كمان.

نظرت هالة اليها بغيظ لتسكت, في حين لم تنتبه هايدي لنبرة السخرية في صوتها.

هايدي: دانا الي على طول بسأل وبكلمه وعايزة انزل اشوفه, وهو مفيش سؤال ولا اهتمام ولا حاجة خالص, ليه كده؟, حاولت اكلمه امبارح واقوله, انت يا بني خليك معايا شوية,زعل مني.

هالة: ياستي يمكن هو كده.

هايدي: طيب ما تسأليه يا لولو, اعرفيلي ماله, انا حاسة انه بيحب واحدة تانية.

تمتمت ندى للمرة الثانية.

ندى: او مبيحبكيش انتي.

نهرتها اختها.

هالة: وبعدين بقى يا ندى.

دفنت ندى وجهها في المجلة وهي تضحك بغير صوت.

هايدي: بصي انتي كلميه بينك وبينه كده, واسأليه.

هالة: لا ياستي انا ماليش دعوة.

هايدي: عشان خاطري.

هالة: والله ما ينفع, انا مش واخدة عليه اوي, وبعدين عمرو يزعقلي.

فالتفتت الى ندى.

هايدي: طب ماتكلميه انتي يا ندى.

اعتدلت ندى وهي تترك المجلة من يديها.

ندى: انا؟.

هايدي: اه , كلميه عادي, انتو عارفينه من زمان, اسأليه , قوليله انا بحس انك مش مهتم بهايدي وكدة.

ندى: اكلمه, دا واد....

وابتلعت كلمة " غلس" بغتة تحت نظرات هايدي الراجية, ثم قالت.
ندى: ماشي, هكلمه حاضر, هاتي نمرة موبايله.
******************
شعرت ندى بالحرج وهي تتصل بشادي تليفونيا بينما هايدي وهالة جالستان بجانبها , ينتظرانها ان تنطق, وعينا هايدي معلقتان بشفتيها.

ندى: الو, ازيك يا شادي,.....انا ندى اخت هالة.
شادي: ندى؟, اه ازيك ياندى ,عاملة ايه؟.

ندى: الحمد لله, انت اخبارك ايه؟.
شادي: تمام,....؟؟؟.
نظرت بطرف عينيها للفتاتين الجالستين امامها تترقبان في قلق, ثم قالت.

ندى: انا كنت عايزاك في موضوع كده.
شادي: تحت امرك.

ندى: بصراحة,... يعني , انا شفت,... يعني سمعت هايدي بتكلم هالة عن انكو اتخانقتو كده باين!!.
شادي: مممم.

ندى: يعني بصراحة هي كانت زعلانة اوي, فأنا قلت اكلمك اشوف فيه ايه؟, لو فيه حاجة ممكن اقدر انا اعملها.

شادي: ممم , يعني مش هي الي باعتاكي تتكلمي؟.
نظرت الي هايدي في ذعر وهي تقول.

ندى: لا, لا طبعا مش هي الي باعتاني اتكلم.
فوضعت هايدي كفها على فمها , وهي تشير لها بيدها نفيا, وهمست.
هايدي: اوعي.

شادي: طيب, هي هايدي دي صاحبتك اوي كده يعني؟.
تعجبت ندى للسؤال.
ندى: مش... اوي.

شادي: طيب ,..نصيحة مني, احسنلك متصاحبيهاش.
احمر وجهها في ذعر وهي تنظر لهايدي التي اشارت بيدها متسائلة.
هايدي: بيقول ايه؟.

فأشارت لها ندى بيدها ان تصمت , وقالت بحذر.
ندى: ليه كده؟.

شادي: يعني انتي واختك بنات محترمة ومش دي الي تبقى صاحبتكو, دا كلام من اخ بيعزكو يعني.
ندى: ليه كده برضة؟.

شادي: بصراحة كدة هي بنت مدلوقة اوي, وفري شوية, ومبتقولش لأ لاي حاجة.
ندى: ازاي؟.

شادي: يعني جريئة وهي الي جت تكلمني, وبعدها لزقت لزقة غريبة, كل يومين الاقيها جيالي تحت البيت, و على طول مكالمات, بشوفها صدفة في كل حتة, كأنها بتبقى مستنياني, وبعدين ليها اصحاب ولاد كتير اوي, ومسمعتش منهم كلام كويس عنها, لو تقدري بجد ابعدي عنها.

دهشت ندى من الكلام, ونظرت الى هايدي بتعجب, فهمست هايدي.
هايدي: فيه ايه؟, بيقول ايه؟.
فقالت لها هالة.

هالة: يا ابنتي اسكتي هيسمعك.
فعلا صوت همهماتهما وسمعه شادي, فقالت ندى وهي تشيح بيدها لهما في تحذير.
ندى: يعني ايه؟.

شادي: انتي مش عارفة تتكلمي ولا ايه؟,..... حد جمبك؟.
قالت في سرعة مرتبكة.
ندى: لا مفيش.

انصت شادي قليلا , بينما اشارت هي لهما لتصمتا.

شادي: لا ....فيه, لو هايدي هي الي جمبك, قوليلها تبطل حركات العيال دي, ولو عايزة تقولي حاجة تقولهالي بنفسها, مش تبعتلي مراسيل, وعايزة توصليلها الي انا قلته عليها وصليهولها, انا مش هخاف منك ولا منها.
ندى: مفيش حد جمبي صدقني, هايدي مش جمبي.
اتسعت عينا هايدي في ذعر, فهمست هالة.
هالة: مش قلتلك هيسمعك.
شادي: مش مهم, بس فكري في الي قلتهولك كويس يا ندى, انتي بنت كويسة, وهي لو صاحبة اختك مش شرط تبقى صاحبتك انتي كمان.
قالت ندى في استسلام.

ندى: حاضر, ماشي يا شادي عايز حاجة؟.
شادي: لا يا ندى, خدي بالك من نفسك.
ندى: شكرا , باي.
شادي: باي.

واغلقت السماعة وهي تفكر فيما قال, فقالت هايدي في سرعة.
هايدي: ايه قالك ايه؟, عرف اننا جمبك؟.
ندى: لا, شك الاول وبعدين عادي.
هالة: هه, قالك ايه عليا؟.
نظرت اليها في تردد, ثم قالت.

ندى: قال مفيش حاجة, هي بس الي مكبرة الموضوع, هي بس بتحب تبقى موجودة اربعة وعشرين ساعة مبتقدرش ان الواحد بيبقى وراه حاجات تانية, وبتبقى منتظرة ان الواحد يعاملها بالمثل.

التفتت هالة الى هايدي.

هالة: يعني زي ما قلتلك اتقلي عليه شوية, متبقيش مدلوقة زي ما بتعملي دايما, كده بتزهقيهم منك.

هايدي: اعمل ايه يا هالة؟, مش المفروض الي بيحب حد بيحب يسأل عليه ويبقى معاه على طول.
ندى: ايوة معاه, مش على قلبه.

هايدي: بس كده, هو دا الي قاله؟.
ندى: اه, يعني هو قال مفيش حاجة, انتي بس الي حاسة كده, مش عشان هو مبيسألش كتير يبقى مش مهتم.
هايدي: كل دا قاله في الدقيقتين دول بس.
ندي: لا, دا يعني الي فهمته من كلامه.

هالة: عشان تبقي تسمعي كلامي, مش كل ولد تعرفيه تطفشيه كده, اتقلي , اتقلي يابنتي مبتعرفيش تتقلي؟.
ندى: شوفي مين الي بتنصحك.
هالة: قصدك ايه يا ندى؟.

ندى: مانتي برضه بتموتي في حاجة اسمها عمرو مجدي, قالك يمين يمين, شمال شمال, مبتفكريش, ولا بتتقلي ولا نيلة زي ما بتقوليلها.
هالة: بس انا متأكدة ان عمرو بيحبني, هي لسه مش متأكدة من شادي.
ندى: اهو كلام.

هايدي: يا ندى انتي بتتكلمي كده بس عشان لسه مجربتيش, بس لما يجيلك يوم وتحبي, هتعرفي ازاي لما يكون احلى ما على قلبك انك تسمعي كلام الي بتحبيه.

ندى: دا كلام فارغ, حتى لو بحب محدش هيقدر يمشيني.
هالة: اهو انا كنت بقول زيك كده برضه, فاكرة؟, واديكي شايفة.

ندى: عشان انتي عيلة رجعتي في كلامك,بس انا بقى عند كلامي, وبكرة تشوفي.
هالة: بكرة انتي الي تشوفي.

يااااااااااااااه
سلمى رحعت تاني والمشاكل هترجع
مش كفايه مامة شادي ومشاكلها

تسلمي يا قمرايه ع الحلقات

نورتى يا جميل
وطبعا مع رجوع سلمى الاحداث هتتطور كتيررررررررر

الحلقة الثانية والسبعين

نظر ايمن الى شادي الجالس بجانبه بطرف عينه, ثم قال وهو يقود سيارته.
ايمن: مالك؟.
انتبه شادي اليه فقال في هدوء.
شادي: مفيش.
ايمن: من ساعة ماركبت وانت مش تمام, لا دانت من وانت في الشغل وانت مبلم.
شادي: عادي يابني.
ايمن: لا مش عادي, انت قلبت من ساعة ماشفت سلمى, فيه ايه؟.
تنهد شادي وعاد ينظر للطريق وهو يقول.
شادي: ...لا ...دا موضوع كده.
ايمن: طب ماتحكيلي يابني, ايه الي مقرفك اوي كده.
شادي: هف....هحكيلك.
وقص شادي حكايته مع سلمى منذ عرفها حتى اليوم الذي كلمت فيه ندى سلمي لتحذرها من الاقتراب من شادي, فصمت ايمن حتى انتهى شادي, ثم قال.
ايمن: طب...وانت هتعمل ايه دلوقتي؟, انا شايف ان الموضوع فيه لبس كبير.
شادي: واي لبس, دي ندى لو عرفت ممكن تولع في البيت حريقة, وتيجي تجيب سلمى من شعرها.
ايمن: وانت هتقولها؟.
شادي: مش عارف.
ايمن: بس دي حاجة متستخباش يامعلم.
شادي: والله ماعرف اعمل ايه, بس الي عارفه اني لو نطقت ممكن ندى يحصلها حاجة.
ايمن: عايز رأيي,انت قولها واقفش,نظام هو دا الي حاصل اذا كان عجبك, متعرفش تعمل كده؟.
شادي: مش دلوقتي احنا لسه في الاول مش عايز انشف عليها ,ندى برضة مبتستحملش الضغط.
ايمن: بس كدة لو عرفت هتبقى مشكلة.
تجهم وجه شادي وهو يقول.
شادي: مش هتبقى مشكلة بس, دي هتبقى مصيبة ووقعت فوق دماغي.
*******************
دخلت نسمة البيت وتوجهت للمطبخ مباشرة حيث والدتها.
نسمة: السلام عليكم.
الام: وعليكم السلام, اتأخرتي ليه؟,هايدي في اوضتك, اغرفلكو تتغدو؟.
وقفتت مذهولة لحظة قبل ان تقول.
نسمة: وهايدي في اوضتي بتعمل ايه؟.
الام: معرفش هي جت من شوية ملقتكيش, قلتلها استني اعدي اتغدي معانا.
نسمة: استغفر الله العظيم.
وتوجهت الى غرفتها على مضض.
نسمة: السلام عليكم.
قامت هايدي من على فراش نسمة التي كانت راقدة عليه وهي تقول.
هايدي: وعليكم السلام ياهانم, نفسي اعرف بتروحي فين كده العصر, فيه حد بينزل الوقت دا اصلا؟.
قالت نسمة وهي تضع الاكياس من يدها.
نسمة: انتي, مانتي برة بيتك اهه العصر.
هايدي: قصدي برة البيت يعني, انا من بيت لبيت, ايه دا كنتي بتعملي شوبينج وريني.
وجذبت احدى الحقائب تنظر مابها, فقالت نسمة.
نسمة: بجيب حاجات مع ميسون عشان فرحها قرب وبالمرة بجيب شوية حاجات ليا, انتي مش وراكي شغل دلوقتي؟.
هايدي: لا خرجت بدري,قلت افوت عليكي, اصل انا زهقانة اوي, بفكر اطلع اسكندرية, ماتيجي معايا؟.
نسمة: يامزاجك بجد, والي انا مخطوباله دا قرطاس يعني.
التقطت هايدي صورة لعمر موضوعة في اطار على مكتب نسمة وتأملتها وهي تقول.
هايدي: هو هيقولك لا يعني؟..., مممم مع ان شكله مش رخم.
لم تجبها نسمة فأكملت هايدي وهي تضع الصورة من يدها.
هايدي: اصل انا ظبطت شوية من اصحابي نسافر, بس هما بقى مش عايزين يسافرو ويرجعو في نفس اليوم, عايزين يباتو وكده, قلت ادور على حد في اسكندرية يحجزلنا, بس انا معرفش حد الا مروة صاحبة ندى, وماليش فيها اوي, ماتكلميلي ندى تجيبلي نمرتها.
نسمة: حاضر.
هايدي: وايه اخبار ندى؟, مش حامل؟.
نسمة: حامل ايه هي لحقت؟.
هايدي: مانتو بقيتو بتخبو, معرفش مالكو.
نسمة: انا مالي انا؟.
هايدي: صح يانيسو انتي ملكيش دعوة انتي طيبة.
نسمة: مش اوي يعني.
قامت هايدي تقبلها.
هايدي: لا والله انتي اطيب واحدة فيهم كلهم اندال, بس اوعي يانيسو يا حبيبتي تنسي تجيبيلي نمرة مروة, زهقت عايزة اسافر بقى.
*****************
ندى: دودو...
شادي: مممم؟؟.
ندى: دودو يا حبيبي انا زهقانة.
شادي: يعني عايزة ايه يعني؟, عايزة تخرجي؟.
ندى: يعني هخرج لوحدي؟, مانت قلتلي راجع تعبان ومش هتقدر تخرج, وبقالنا شهر على كده, مبتخرجنيش الا مرة واحدة في الاسبوع, وانا زهقت.
شادي: قلتلك خدي هالة او نسمة واخرجو.
ندى: مش فاضينلي ,هالة بتنزل بليلو وبتبقى خروجة غلسة, ونسمة مفضية نفسها لميسون معرفش ليه مع انهم معادوش اصحاب زي الاول, بس نسمة تموت في خدمة الناس.
التفت شادي وهو يضع اللابتوب عن ساقه وقال.
شادي: طيب ان ايه المطلوب مني؟, عايزة تخرجي مع اصحابك انزلي انا معنديش مانع.
ندى: ياحبيبي هو انا بقى عندي اصحاب الا ايه ونشوى.
عاد ينظر الي اللابتوب.
شادي: انزلي مع ايه ونشوى.
ندى: ماليش مزاج ليهم.
بدأ صوته يعلو وهو يقول.
شادي: يعني انتي عايزة ايه مني؟, انا المطلوب مني ايه دلوقتي؟, اوعي تقوليلي عايزة تشوفي هايدي زي المرة الي فاتت.
ندى: لا هايدي ايه, انا خلاص مش بفكر في هايدي تاني.
قال شادي ببرود.
شادي: امال ياروحي عايزة تقولي ايه, اصل انا مش فاهمك.
صمتت ندى للحظات قبل ان تقول.
ندى:..... انا...انا بفكر يعني..لو اشتغل.
اغلق شادي اللاب توب ووضعه عن ساقه وهو يلتفت اليها.
شادي: تشتغلي ايه؟.
ندى: هو ايه الي اشتغل ايه يا حبيبي, هو انا صنايع, انا دكتورة, وبعدين انا زهقت من القعدة في البيت بقالنا شهر ونص متجوزين, الي بننام فيه بنصبح فيه, انت بتنزل وانا بعد ارتب واطبخ, زهقت ياشادي, عايزة احس اني ليا لزمة.
شادي: وهو انتي كده ملكيش لزمة؟.
ندى: ياحبيبي انا قصدي اني قاعدة مبعملش حاجة, لما انت بتنزل بزهق اوي.
شادي: ولزومه ايه البهدلة والقرف على شوية ملاليم ياندى.
ندى: يا حبيبي هو الشغل بيبقى عشان الفلوس, الشغل عشان الشغل نفسه الواحد بيحس ان له قيمة.
شادي: طيب انتي لقيتي شغل مثلا وجاية بتسأليني تحصيل حاصل؟.
ندى: لا ياحبيبي ابدا انا كنت بس بسألك عشان ابدأ ادور, حتى لو انزل اعد في صيدلية قريبة من البيت, اهو برضة اتسلى.
شادي: طيب ياندى ربنا يسهل.
ندى: هو ايه الي ربنا يسهل هو انا بقلك سفرني, انا بقلك عايزة اشتغل.
شادي: حاضر ياندى, هدورلك على شغل, كويس كده؟, خلاص ارتحتي.
قامت ندى واقتربت منه وقبلته على وجنته وهي تقول.
ندى: ربنا يخليك ليا ياحبيبي, انا كنت عارفة انك هتوافق.
***************
نسمة: والله انا ماكان ليا خالص في موضوع الدراسات دا, انت الي كبرتها في دماغي.
قال عمر لها في الهاتف بصوت مرح.
عمر: ياستي اعتبري انك كنتي في كلية خمس سنين , او انك دبلرتي كام سنة.
نسمة: ايه دا الي دبلرت كام سنة دي ياعمر انت عايز تعطلني وخلاص تحسسني اني لسه صغيرة, يابابا انا كبرت وماصدقت خلصت من الدراسة.
عمر: انتي كسلانة وبس, مش عايزة تذاكري , يابنتي الدراسة مفيدة في كل الاحوال الواحد لازم يعيش عمره كله يتعلم, المفروض اصلا تخلصي دراساتك وتبدأي كورسات حاجة تانية, تبقي عارفة في كل حاجة, على طول بتتعلمي, انا محبش تكوني سلبية وكسلانة.
نسمة: ياسلام يعني, ماشي انا موافقة نأجل الجواز بقى سنتين تلاتة اربعة, اكون خلصت كسل.
عمر: وهو انتي ياتدرسي يا نتجوز؟, بتعاقبيني يعني عشان بنبهك.
نسمة: يباي عليك ياعمر يعني انت عشان بتذاكر للدبلومة مش هاين عليك تشوفني فاضية, لازم تشغلني معاك يعني.
عمر: انا عايز اشوفك اول واحسن واحدة في الدنيا, ويهمني تكوني دايما فاهمة وواعية وشغالة, مبحبش التنبلة , انتي واحدة زكية وخسارة في الهطل.
نسمة: هطل!!, الله يكرمك, ماشاء الله لسانك بينقط سكر.
عمر: انا برضة يانسوم, دا افتكر اني اكتر واحد بيجاملك, بقى عايزة تأجلي الجواز يا مفترية؟.
نسمة: مانت الي بتقولي دبلري.
عمر: ايه رأيك يا نسوم لو في خلال الكام شهر الجايين دول نكتب الكتاب؟.
نسمة: نكتب الكتاب؟؟, لا يا عمر دي مش فكرة كويسة.
عمر: ليه كده بس؟.
نسمة: كل علاقة ياعمر بيبقى فيها نص في المية نسبة نجاح والنص التاني فشل, انا مبقدرش الشر اعوذ بالله بس انا بفكر, بعد الشر بعد الشر لو محصلش نصيب, انفصال خطوبة اسهل بكتير من انفصال كتب كتاب, ممكن مش بالنسبة للولد, بس البنت بتعتبر مطلقة.
عمر: اصل احنا برضة محكومين اوي يا نسمة في حكاية الخطوبة دي, يعني لا عارفين نخرج ولا نتنيل, وانا كمان عايز ناخد خطوة جديدة مش هنعد كل دا مبنعملش تقدم...., نسمة انتي معايا اصلا؟.
نسمة: استنى كده يا عمر.
واسترقت السمع قليلا , ثم عادت لتقول بضيق.
نسمة: عمر نتكلم في الموضوع دا بعدين, دي شكل هايدي جت, ومش هعرف اتكلم, هكلمك تاني بعد ماتمشي, انت هتنام؟.
عمر: لا مش هنام, هستناكي تكلميني.
نسمة: طيب لو تعبان نام عادي والله هكلمك الصبح اول ما تصحى,
عمر: لا لا انا هستناكي.
نسمة: ماشي عايز مني حاجة؟.
عمر: لا خدي بالك من نفسك.
نسمة: وانت كمان, مع السلامة.
عمر: سلام.
هايدي: هالللللللو.
اغلقت نسمة الهاتف في ضيق لدى دخول هايدي.
نسمة: حمد الله ع السلامة انتي رجعتي؟.
هايدي: حبيبي, وحشتيني, مووواه.
نسمة: يعني اسكندرية نورت دلوقتي بعد مامشيتي دلوقتي.
قالت وهي تجلس بجانب نسمة بعد ان قبلتها.
هايدي: اخص عليكي يا نيسو, بس الرحلة كانت جامدة, كانت عايزاكي بجد.
نسمة: عملتي ايه هناك؟.
هايدي: مروة معرفتش تجيلي عشان كنا وصلنا بدري وهي كان عندها شفت, المهم قامت باعتالنا مين بقى؟, على المصري الي كان زميلهم دا, بس طلع ولد عسل يا نسمة, زي ماكانت ندى بتحكي عليه بالظبط, وجدع جدع يعني, ظبطنا اخر تظبيط, وماسابناش الا واحنا مروحين, واد راجل راجل بجد.
نسمة: ماهي كانت دايما بتقول عليه راجل.
هايدي: بس بجد ولد محترم اوي, وتحسيه كده واحد يعتمد عليه.
ثم صمتت قليلا قبل ان تقول.
هايدي: انتي عارفة انه بيشتغل هنا, ومن حظنا انه كان هناك وقتها.
نسمة: انتي بتتكلمي عنه كتير ليه ,معجبة؟.
هايدي: وليه لا.
قالت نسمة بسخرية.
نسمة: غريبة يعني اول مرة تعجبي بواحد مش متجوز.
ضربتها هايدي وهي تقول.
هايدي: قليلة الادب, انا اول مرة اعجب بحد مش متجوز؟.
نسمة: خدي بالك من قلبك يا هايدي الي بقى عامل زي المقشة من كتر ما بهدلتيه معاكي, كفاية عليه لحد كده, مبقاش مستحمل حرام عليكي, مبتلحقيش تطلعي من صدمة لازم تمسكي في التانية .
قالت هايدي بغضب.
هايدي: انتي ايه فهمك في الدنيا انتي اصلا يا شيخة نسمة, خلي بالك انتي من قلبك يا ستي, انا عاجبني قلبي المقشة.
نسمة: والله ياهايدي انا مش عارفة بيجيلك نفس منين تحبي تاني, المفروض الواحد بياخد الصدمة ويفضل متنح, والله انتي مش محتاجة ولد عشان تفوقي ممكن تساعدي نفسك.
هايدي: يييوووه يا نسمة بلاش الكلام الكبير دا بس, انا مش محتاجة نصايح انا شبعت الكلام دا من كل الناس, كل واحد عامل فيها مصلح اجتماعي وفاكرين نفسكو هتصلحوني, انا خلاص راحت عليا وكعادش حد يقدر يصلحني انا اتكسرت ستين حتة وخلاص.
ثم قامت بغضب.
هايدي: وانا الي كنت جاية افرفش معاكي, قفلتيني يا شيخة.

الحلقة الثالثة والسبعين

شادي: والله انا قلتلها الشغل دا تعب ووجع دماغ هي الي مصممة تدور.
هالة: والله مادام هي مش مشغولة بحاجة يبقى تشتغل احسن, مش حاجة وحشة يعني ياشادي انا مش عارفة انت ممانع ليه.
شادي: انا مش ممانع ولا حاجة بالعكس انا قلتلها سبيني ادور معاكي.
ندى: واهو بقالك اد ايه مثبتني انك بتدور.
شادي: مش بدورلك على حاجة كويسة.
ضحكت نسمة وهي تقول.
نسمة: ماهو هيعد يدور سنتين تلاتة كده لحد ماتنسي.
قال عمر موجها كلامه لنسمة.
عمر: عشان تعرفي ان انا بخليكي تذاكري في الاول اهه عشان مبقاش حرمتك من حاجة, يعني انتي الي هتبقي مش عايزة من نفسك.
نسمة: ياسلام يعني انا لو لقيت شغل مش هتسيبني اشتغل بعد الجواز.
عمر: انا عنيا ليكي, دانا لو اطول تشتغليني اسيبك تشتغليني.
اسلام: انا قلتلكو الواد دا عامل فيها دبلوماسي وهو بتاع اشتغالات مصدقوتنيش.
عمر: من بعض ما عندكم.
نسمة: انا اصلا مكنتش عايزة اعرفكم على بعض, انا مبتفائلش بيك يا اسلام.
اسلام: انتي تطولي!.
هالة: طب الحق الحق الي بيصفرولك, بلاويك الي بيبقو ملقحين في كل حتة, مبنخلصش احنا منعدش في مكان الا مانلاقي حد عارفك, يخرب بيت الجيم وسنينه.
اسلام: الجيم الي بتدعي عليه دا لو اتخرب مش هنلاقي ناكل ياهانم.
ثم التفت ينظر الى المنضدة خلفه ,واشار للجالسين عليها قبل ان يقول.
اسلام: دول رامي والعيال, مش من الجيم ولا حاجة اما اقوم اسلم عليهم, عن اذنكو يا جماعة.
وقام بينما قالت ندى بسرعة دون ان تنتبه وهي تنظر صوب اصدقاء اسلام.
ندى: مش دا ابراهيم ؟.
نظرت اليها نسمة في غيظ شديد, لقد رأته منذ ان جلس, ولم تشأ الاشارة للموضوع لانه غير ذو اهمية على الاطلاق, ولم ترد ازعاج عمر, والقت بنظرها الى عمر الذي نظر نظرة خاطفة حيث اشارت ندى, ثم ابعد نظره ولم ينظر ثانية, فعاد شادي ليتحدث مع زوجته حتى يلفت انتباه الجميع الى شيء اخر, وبعد قليل من عودة اسلام اليهم ,وعودة الحديث الى مجاريه,قالت هالة لندى بصوت خفيض.
هالة: يعني هو اسلام قام يسلم عليهم عشان محدش منهم يجيله هنا ,ولا نسمة ولا عمر ياخدو بالهم, تقومي انتي تقولي بمنتهى الغباء ابراهيم, انا مبقتش عارفة ايه غبائك دا بجد.
ندى: معلش والله مااخدت بالي الكلمة طلعت من بقي كده معرفش ازاي.
******************
استرق عمر النظر الى هالة وزجها الذان انخرطا في حديث مع شادي وندى.
عمر: ايه يا نسمة بقى, نكمل كلامنا.
نسمة: يا عمر الموضوع دا منتهي خالص, انا على قد مانا عايزة فعلا ناخد خطوة, ومبتمناش حاجة في الدنيا قد ما بتمنى اني اكون معاك, بس كتب كتاب مجازفة كبيرة.
عمر: انتي متخيلة ليه ان اننا ممكن نسيب بعض؟.
نسمة: ياعمر لا , المشاكل بتحصل على اتفة الاسباب, واديك شفت ندى وشادي كانو هيفركشو على مفيش.
احتد عمر قليلا.
عمر: انتي ليه دايما بتقارني نفسك بالي حواليكي, انتي ليه بتقارنيني بواحد تاني.
قالت نسمة وقد بدا يظهر عليها الضيق.
نسمة: قصدك ايه بواحد تاني, انا مبقارنش بينك وبين حد ياعمر ومتضايقنيش بكلامك دا بقى.
عمر: انتي الي مصممة تحطيني انا وتجربتك الي فاتت دي في خانة واحدة.
نسمة: انت لو جبت سيرة الموضوع دا تاني يا عمر انا مش هتكلم معاك تاني.
عمر: انا بكلمك في مستقبلنا انا وانتي, وكل مرة تزعليني.
نسمة: الموضوع مفيهوش حاجة تزعل ياعمر, انت الي متوتر من المشاكل الي عندك في الشغل بقالك كام يوم ,وقلتلك ميت مرة لما تبقى مخنوق من حاجة انا ماليش ذنب فيها متطلعش قرفك فيا, عشان انا ببقى على استعداد اني اخرجك من المود الي انت فيه ومبعرفش اعمل دا لما الاقيك بتهاجمني انا بالشكل دا.
عمر: انا مش متنرفز من حاجة.
نسمة: ماهو واضح ولا بتزعقلي ولا حاجة اهه.
خفض عمر صوته وهو يقول.
عمر: انتي بقى الي فيه حاجة في دماغك, انا مش متضايق يا نسمة.
نظرت اليه نسمة قبل ان تقول بضيق وصوت مختنق.
نسمة: انا مش عارفة انت بتعمل كل دا ليه وعشان مين, انت مش طبيعي بقالك شوية يا عمر وانا عارفة ليه.
عمر: شفتي على طول تفكيرك راح فين.
نسمة: انا تعبت من كتر مابتفكر في ابراهيم يا عمر.
عمر: مين فينا الي جاب سيرته دلوقتي.
نسمة: عمر انا بجد زعلانة اوي اوي ياريت نسكت بقى, ياخسارة, كنت فاكراك فاهمني.
*******************
شادي: والله يا لومي انا مش مقتنع بحكاية شغلها دي, بس اعمل ايه, هي زهقانة.
سلمى: بس انت فعلا بتدورلها.
شادي: اه والله قالب الدنسا, لو تعرفي حاجة كويسة يالومي ابقي عرفيني.
سلمى: من عنيا ياشادي مانت عارف.
شادي: انا متأكد يا لومي, انتي لسه كده جدعة وكده يعني ولا .
سلمى: وانا من امتى مكنتش جدعة يابني.
صمتا قليلا, قبل ان يقول شادي بصوت جدي.
شادي: بجد يا لومي انتي لسه مفيش حاجة كده ولا كده؟.
سلمى: كده ولا كده ايه يعني؟.
شادي: يعني ازاي انتي لغاية دلوقتي مفيش خطوبة او جواز, ازاي واحدة زيك يعني تعد كده, هما الرجالة فين اتعمو.
سلمى: نصيبي ياشادي, بس اوعى تفتكر اني متضايقة بالعكس, انا مبسوطة في الشغل واني اعيش حياتي شوية قبل ما ارتبط ببيت ومسؤليات, انا لسه صغيرة برضة.
شادي: والله انا بدعيلك يا سلمى.
نظرت اليه نظرة ضيق صارمة قبل ان تقول بحزم.
سلمى: متدعيش.
شادي: ليه يا سلمى؟, ......؟.
صمتت سلمى قليلا قبل ان تقول وكأنها تغير الموضوع.
سلمى: انا هسألك ابن عمي شغال في شركة ادوية, وكانو محتاجين حد عشان اللي شغالة معاهم حامل, بجد هشوفلك الموضوع دا.
صمت ينظر اليها ولم يتحدث في الموضوع السابق بل قال.
شادي: ربنا يخليكي يا سلمى, انتي طول عمرك اجدع واحدة في الدنيا.
احمر وجه سلمى للحظة قبل ان يدخل وليد المكتب وهو يقول.
وليد: يعني طلبتو اكل وفطرتو واخر وطينة, وانا والراجل التاني دا ولا كأن لينا لزمة, وبعدين ايه الهيافة الي بتاكلوها دي, ايه يا ستاذ شادي, الله يرحم الي كان بيضرب ع الصبح فطير وحوواشي ومصايب يعني.
ايمن: اصله عامل دايت.
جلس وليد خلف مكتبه وهو يقول.
وليد: وانتي يا استاذة الا الساندويتشات والحركات دي مطلعتش الا لما شادي رجع, يعني احنا ولاد البطة السودة مثلا.
قامت سلمى من امام مكتب شادي لتجلس خلف مكتبها وهي تقول بحدة.
سلمى: بلا سودة بلا بيضة, انا من هنا ورايح مش هجيب اكل لحد تاني, جبتلي الكلام يا استاذ شادي عادتك ولا هتشتريها.
*********************
دخلت ندى البيت وهي تلقي بحقيبتها في الصالون بغضب وتتحرك بعصبية الى غرفة النوم, فتبعها شادي غاضبا هو الخر وهو يهتف.
شادي: ممكن افهم انتي متعصبة على ايه وانتي الي غلطانة؟.
التفتت اليه وهي تصيح.
ندى: انا نفسي اعرف انت ايه الي بيخليك تقول لمامتك كل حاجة؟, ليه بتدخلها في حياتي بالشكل دا؟.
شادي: وهو ايه الي انا قلته ان شاء الله, وهو لما هتشتغلي محدش هيعرف.
ندى: تقول ليه ان انا بدور على شغل؟.
شادي: عشان انتي بتدوري على شغل, انا كنت بتكلم عادي ,هي حدوتة؟.
ندى: اهي مامتك عملتها حدوتة, وقعدت تقولي فوقي لبيتك وجوزك شغل ايه وهباب ايه؟, طب مانا ماما ربتنا كلنا وهي بتشتغل ولغاية دلوقتي لسه بتشتغل ايه علاقة دا ببيتك وجوزك, واما اقول الكلام دا لمامتك تقولي ماهي باين التربية, قصدها ايه يعني ان انا مش متربية ولا ان ماما مربتناش, مانا مش فاهمة.
شادي: وهو انتي سكتي مانتي قلتيلها دي وجهة نظرك انتي , يعني رأيك واشبعي بيه, مانتي فعلا ردودك وكلامك مستفز.
ندى: يعني عايزني اسمع تهزيئي بودني واسكت.
شادي: ايوة اسكتي , انا مش راجل قاعد معاكي ولا انا ايه يعني؟,ولو مكنتش رديت انا ودافعت عنك كنتي تنطقي, لكن ازاي لسانك الي زي المبرد لازم يلسع كلام على طول.
ندى: طبعا وانت هتقول ايه غير كده ماهي امك.
قال شادي بغضب.
شادي: ايواااه امي, ومن هنا ورايح تحترمي نفسك وانتي بتتكلمي عنها انتي فاهمة, انا مبغلطش في اهلك يا ندى خدي بالك انتي بقى من اسلوبك وكلامك مع اهلي .
ندى: بس انا لو حد غلط فيا او في اهلي تاني هرد يا شادي ايه رأيك بقى.
شادي: ابقي وريني هتردي على امي ازاي ياندى, عشان اكون مطلقك تاني يوم, اصلك بقيتي بتستهبلي.
تجمدت ندى لدى الكلمة وانعقد لسانها لثوان قبل ان تقول بدهشة.
ندى:.....تطلقني؟؟؟.
انتبه شادي لما قال وفكر للحظة ان يتراجع ,ولكن رجولته ابت الا ان يستمر في العناد فقال.
شادي: الي سمعتيه بقى, ومش عايز اتكلم اكتر من كده عشان انتي بتستفزي الواحد باسلوبك وتخليه يغلط.
وخرج من الغرفة في عنف, بينما ظلت ندى متسمرة والدموع تنساب على وجنتيها.
******************
توجه عامل الشركة للمكتب الذي يجلس عليه عمر, وانحنى على اذنه يقول.
العامل: واحدة بتقول انها خطيبة حضرتك برة.
انتفض عمر وترك الاوراق التي امامه وهو يقول بدهشة.
عمر: نسمة؟.
العامل: معرفش يا استاذ عمر هي خطيبة حضرتك اسمها نسمة؟.
لم يسمعه عمر انا قام بلهفة ليخرج باحثا عن نسمة, لقد بردت العلاقات بينهما لمدة يومين بعد الاختلاف الذي حدث بينهما, ولم يستطع النوم لليلتين كاملتين, يحاول الاتصال بها دون جدوى, ولم يرد ان يحادث اهلها حتى لا يعرف احد انهما على خلاف, لذلك لم يصدق حين اخبره العامل انها هنا, وبكل لهفته نظر فوجدها جالسة في هدوء منتظرة اياه, فاقترب ببطء على عكس خطواته السريعة التي خرج بها, وهو يقول محاولا اخفاء السعادة في صوته.
عمر: ازيك يا نسمة؟.
قامت نسمة وهي تقول بهدوء.
نسمة: الحمد لله, انا عطلتك عن حاجة؟.
عمر: لا ابدا, انا كده كده كنت طالع البريك بتاعي, تعالي ننزل الكافيتريا.
سارت نسمة امامه دون كلام حتى وصلا للكافيتيريا.
عمر: اطلبك ايه؟.
نسمة: لا ولا حاجة انا صايمة.
نظر اليها بعتاب وهو يقول.
عمر: ...اول مرة تصومي من غير ماتقوليلي اصوم معاكي.
نسمة:.........
عمر: على فكرة انا كلمتك كتير اوي.
نسمة: مانا عارفة.
عمر: انتي مكنتيش بتردي عليا ليه؟؟
نسمة: كنت بفكر ياعمر,... بفكر فينا , فيا وفيك, الي حصل دا بينلي ان احنا فيه بينا مشكلة فظيعة, ولو فضلت على كده هيحصل شرخ كبير, انت بدأت تقلب في القديم, والي بيقلب في الي فات يا عمر مبيسكتش, اسلام وهالة كانو هيخسرو بعض عشان كده, اسلام برضة فضل شايل موضوع في قلبه وكان هيخسرها وهو بيحبها, انا مكنتش متخيلة انك كمان تعمل كده نهائي.
عمر: يعني مش انا لوحدي اهه الي بفكر كده.
نسمة: ياعمر, انت بتقارن ايه بايه, بتقارن علاقتي بابراهيم بعلاقة هالة بعمرو مجدي, انا مش عارفة اوصلك ازاي ان ابراهيم دا كان مجرد بلوة في حياتي وفرحت لما انتهت.
عمر: بس انتي استحملتيه يا نسمة دا دليل تمسك بيه.
نسمة: يادي النيلة, تمسك ايه بس, انا هشرحلك, عارف الاحساس لما تشتري جزمة جديدة وتلبسها وتلاقيها ضيقة عليك وتفضل قانع نفسك انها ضيقة عشانها جديدة مش عشان هي مش مقاسك, وتفضل ماشي بيها مستحمل عايز توصل البيت بسرعة عشان تقلعها, عارف احساسك اول ما بتقلع الجزمة بقى, مرتاح لانك قلعتها بس هي سايبة وجع لسه في الرجل ,اهو هو دا الي عندي , ومفتكرش انه احساس كويس ابدا.
عمر: ......نسمة انا واثق فيكي.
قالت نسمة بشيء من الحدة.
نسمة: لو الثقة دي مش كفاية لدرجة انك تتأكد مني , يبقى هقلك يا ابن الناس زي مااختي قالت قبل كده وانا زعلت منها لانها مدافعتش عن نفسها, بس مكنتش فاهمة وقتها ان الشك ملوش حل ولا له عقل, هقلك كل واحد فينا ف.......
قاطعها عمر بسرعة.
عمر: لا نسمة اوعي تقولي حاجة...اوعي....
نسمة: ليه يا عمر؟.
عمر: عشان ...عشان انا بحبك.
صمتت نسمة وهي تنظر اليه, انها اول مرة يقولها لها.
نسمة: بتحبني؟.
عمر: ايوة والله العظيم بحبك وحبيتك ,ومكنتش عايز اقلك عشان متقوليش عليا بتسرع و تخافي مني, بس انا فعلا بقول كده من غيرتي عليكي وفكرة ان كان فيه حد في حياتك قبلي بتموتني....., متتنرفزيش بس استني انا مش قصدي في حياتك, انا واثق فيكي جدا والله العظيم بس انا برضة دمي حامي يا نسمة, بس انا فهمت دلوقتي موضوع الجزمة دا الي قلتي عليه فهمني, وانا مش هجيب سيرته تاني, مادام الموضوع دا خلاكي تبعدي عني كل دا وتقدري مترديش عليا باليومين, وجاية واخدة قرار وحش اوي, يا نسمة انا فرحتي اني شفتك برة المكتب دي عندي بالدنيا, اوعي تقولي الكلام الغريب الي قلتيه دا تاني, انتي فاكراني مجنون عشان اسيبك.
نظرت اليه تستبين صدقه.
نسمة: انت متأكد من الي بتقوله يا عمر؟.
عمر: زي مانا شايفك قدامي دلوقتي.
نسمة: خلاص ياعمر....انا موافقة.
عمر: موافقة على ايه؟.
ابتسمت وهي تقول.
نسمة: على كتب الكتاب.
عمر: بجد يا نسمة؟, بجد؟, انا فرحان جدا,احنا ممكن نكتب الكتاب ونطلع العمرة كمان لو عايزة.
نسمة: ههههههه عمرة طب فين تذاكر شرم الشيخ.
عمر: الي انتي عايزاه يا خالتي اطاطا.
نسمة: هههههههه.
عمر: بجد يا نسمة موافقة.
نسمة: ايوة موافقة على كتب الكتاب بس العمرة دي سيبها لبعد الجواز, انت فاكرنا طالعين مارينا ولا ايه.
عمر: الي انتي عايزاه يا نسمة,الي انتي عايزاه.....بس ...انتي ايه الي خلاكي توافقي يانسمة؟.
نسمة: عشان انت بتحبني يا عمر, وانا فعلا حاسة انك بتحبني, اتمنى بجد متكونش بتضحك عليا او تأذيني.
عمر: انا عمري مااقدر اأذيكي انسمة, عمري, مسيرك تعرفي ان الي بيحب حد مبيأذيهوش ابدا.

الحلقة الرابعة والسبعين

دخلت هايدي غرفة نسمة لتجد ندى نائمة على الفراش, فقالت.
هايدي: ايه دا؟, مش تقولي ان ندى عندك.
قامت نسمة تأخذها من يدها خارج الغرفة.
نسمة: هششششش, دي لسه نايمة, تعالي نعد في اوضتها تعالي.
قالت هايدي بعد ان جلستا بغرفة ندى القديمة.
هايدي: هي متخانقة مع شادي ولا ايه؟.
قالت نسمة وهي تدير وجهها عنها.
نسمة: معرفش.
هايدي: ولا تعرفي, يعني كنتي هتقولي يعني, المهم انتي اخبارك ايه؟, واخبار عمر ايه؟.
نسمة: الحمد لله تمام.
هايدي: الا قوليلي يا نيسو ,هي ندى لسه بتكلم المصري؟.
نظرت اليها نسمة باندهاش.
نسمة: لا طبعا, هي ملهاش علاقة بيه من زمان.
هايدي: هي غادة دي صاحبتها ولا ايه؟.
نسمة: غادة مين؟.
هايدي: دي واحدة كان مرتبط بيها علي.
عقدت نسمة حاجيسها وهي تقول .
نسمة: انتي ايه حكاية علي معاكي بقى, انتو حبيتو بعض ولا ايه؟.
هايدي: طب ياريت, دا الواد تقيييل جدا يانسمة, انا معرفتش حد في حياتي كلها كده, ايه دا, ملوش دخلة ابدا, المهم انه يغيب يغيب, ولما اسأل عنه الاقيه بيتصل هو ويفضل يتكلم بالساعات, غريب اوي يانسمة, متعرفيلوش هو فعلا مهتم ولا مش في دماغه, بس لو مكانش في دماغه مكانش يسأل صح, انا مش عارفة والله, الولد دا غريب اوي, انا محدش حيرني كده من ايام حمادة.
نسمة: وانتي عايزة منه ايه؟, علي دا مش غني زي اصحابك يعني.
هايدي: بس هو ابن ناس كده, تحسيه نضيف وراجل, ممكن يتحمل مسؤلية يعني متخافيش وانتي معاه .مش زي العيال الهايفة الي احنا نعرفهم.
نسمة: اتكلمي عن نفسك يا حبيبتي, انا معرفش عيال.
هايدي: المهم يعني انا كنت جاية عايزة البادي السوارية بتاعي, كنت ناسياه عندكو من قبل فرح ندى, ابقي دوريلي عليه الله يخليكي عشان عايزاه.
نسمة: حاضر.
هايدي: انا هنزل بقى, ابقي شوفيهالي يا نيسو ضروري, باي.
نسمة: سلام.
واثناء وصولها للباب وجدته يفتح وتدخل هالة وطفلتها, فتسمرت هالة قبل ان تبتسم بتردد.
هالة: ازيك يا ديدي عاملة ايه؟.
هايدي: هالة , ازيك يا بنتي عاش مين شافك, وريني سلسبيلا, ماشاء الله كبرت وبقت شبهك خالص.
هالة: عقبال ماتجيبي زيها ان شاء الله.
قبلت هايدي الطفلة في سرعة قبل ان تقول.
هايدي: انا هنزل بقى يا نيسو, باي يا هالة.
وعبلات الباب متخطية هالة بسرعة ,فقالت هالة بعد خروجها.
هالة: متقوليش انها كانت جاية لندى.
نسمة: لا لا متخافيش, دي كانت جيالي انا.
دخلت هالة غرفة نسمة ووضعت طفلتها بجانب ندى على الفراش, وقالت توقظها.
هالة: ندى اصحي اصحي بسرعة هايدي جت.
قفزت ندى من الجزع بسرعة وهي تشهق.
ندى: ايه فيه ايه؟.
هالة: هههههههههههههه, شكلك فظيع وانتي مخضوضة ,هههههه.
ندى: اخص عليكي ياهالة انتي عارفة انك فزعتيني فعلا, حرام عليكي انا كنت ماصدقت انام.
هالة: وانتي ايه متخانقة مع شادي ليه بقى؟, امك كلمتني تجيبني.
مسحت ندى بيدها على وجهها وهي تعتدل في الفراش وتقول بضيق.
ندى: اتخانقنا لما رجعنا من عند امه كالعادة, بس المرة دي قالي لو رديتي على ماما تاني هطلقك.
هالة: ياخبر اسود, دا بجد؟.
ندى: اه والله العظيم ونام في الاوضة التانية , قمت الصبح قلتله انا هروح لماما قالي روحي ونزل الشغل, لا قالي اوصلك ولا استنيني ولا حاجة.
هالة: لا اوعي ياندى لسانه ياخد على الكلام دا, الحاجات دي مفيهاش هذار.
ندى: هو محلفش طلاق ياهالة, هو كان بيتكلم كده وشكله مفكرش في الكلام, بس انا زعلت منه اوي, وخصوصا انه محاولش يصالحني الصبح.
هالة: وهو هيجي يجيبك؟.
ندى: معرفش والله انا من امبارح اصلا وانا مخنوقة بشكل غير عادي.
هالة: معلش ياندى, اكيد هتحصل خلافات مابينكو بسبب مامته يعني انتي هتوهي عنها, بس المهم انتي متزعليش جوزك منك, انتي رحتي ولا جيتي مالكيش الا هو.
ندى: انا مكلمتوش على انه مدافعش عني, انا كل الي زعلني انه كان بيلومني بعد ما امه هي الي شتماني وشاتمة اهلي وقايلة اني مش متربية, عايزني اسكت ازاي يعني, وفي الاخر يقولي اطلقك.
هالة: طيب بصي متكبريش الموضوع عن حده, لحسن يفتكر انك قاعدة هنا غضبانة ولا حاجة , قومي ارجعي بيتك قبل مايرجع هو من الشغل, وعديها ياندى من غير مشاكل, انتو مش حمل امي قالت وامي عادت, عشان مواضيع الامهات دي ملهاش نهاية,انا صحيح مبطيقش امه دي, بس انتي لو رضيتيها بترضيه يعني بيتحسبلك عند ربنا, حاولي ياستي واعصري على مناخيرك لمونة واستحملي, عشان خاطر جوزك الي انتي متأكدة انه بيحبك.
ندى: انا والله يا هالة ماعارفة اتهنا من امه دي خالص.
هالة: معلش معلش, قومي قومي خلي تسمة توصلك بيتك, وكلمي جوزك خليه يجيب اكل من برة وهو راجع, واعملي تغيير في المود شوية او اخرجو كلو برة, عشان ربنا يباركلكو ياحبيبتي, قومي ياماما ربنا يهديكي.
*********************
سلمى: شادي انا كلمتلك عماد ابن خالتي , وقالي ياريت داحنا محتاجين واحدة ضروري, اول ماتروح بقى ابعتلي السي في عالميل.
شادي: شكرا يا سلمى,
سلمى: مالك يا شادي؟, انت متضايق من حاجة؟.
شادي: لا عادي.
سلمى: لا بجد فيه ايه؟.
شادي: مفيش ياسلمى شوية حاجات كده في البيت.
سلمى: متخانق مع ندى؟.
شادي: عادي يا سلمى بقى.
سلمى: خلاص انت حر, مش عايز تحكي بلاش.
وبعد قليل رن هاتف شادي.
شادي: ..الو.
ندى: الو......
شادي: ايوة....
ندى: ممكن...وانت راجع من الشغل تجيب معاك اكل؟.
اقتضب شادي وهو يقول.
شادي: ماعندك التلاجة مليانة.
ندى: لا قصدي اكل من برة, او...ننزل نتغدى برة؟.
اندهش شادي للتغير المفاجيء وخف اقتضابه قليلا.
شادي: عايزة ننزل نتغدا برة يعني؟.
ندى: ياريت.
شادي: ماشي ياندى, انتي لسه عند ماما ولا افوت عليكي فين؟.
ندى: وهو انا كنت اقدر اروح في حتة من غير ما اكلمك اعرفك انا فين ولا ايه؟.
شادي: صح.
ندى:......شادي.
شادي: مممم؟.
ندى: انا بحبك.
شادي: .....وانا كمان بحبك.
ندى: متتأخرش.
شادي: حاضر.
****************
ندى: بص يشادي انت افورت وانا افورت خلاص بقى .
نظر شادي الى ندى عبر المنضدة في المطعم وقال.
شادي: بس انتي غلطتي ياندى.
ندى: بص ياشادي مش عشان انا الي كلمتك وصالحتك تقوم تعمل فيا كده, انا ماغلطتش فيك.
شادي: انتي جايباني هنا عشان تعصبيني ياندى ولا ايه؟, انتي لسه بتعندي عليا.
ندى: انا مش جايباك عشان نتخانق اكيد يعني, انا جيت عشان نتصالح , انت ليه مصمم تتكلم في الي حصل.
شادي: عشان انتي ياندى مبتسكتيش ,على طول ردك على لسانك.
ندى: يعني انت عايز مامتك تظلمني وبتعاقبني على رد فعلي للظلم دا.
شادي: انا زعلان من اسلوبك, وانك مستنيتيش انا اجيبلك حقك.
ندى: انت الكلام جه على هواك اصلا, عشان انت مش عايزني اشتغل.
شادي: انا مش عايزك تشتغلي؟, ولما هو كده جبتلك شغل ليه بقى؟.
اعتدلت ندى وهي تقول متفاجئة.
ندى: جبتلي شغل؟.
شادي: ايوة جبتلك, واحد زميلي في الشغل جابلك شغل في شركة ادوية, عشان تعرفي ان انا بفكر معاكي وبشجعك وانتي الي عايزة تغلطيني وخلاص.
ندى: شادي .....بجد انا مش عارفة اقلك ايه, انا بحبك اوي ياحبيبي, انا مكانش قصدي ازعلك.
شادي: المهم بعد كده متعمليش حاجة تاني الا لما تشوفي انا هتصرف ازاي الاول.
ندى: حاضر يا حبيبي.
شادي: وامي على راسك زي ماهي على راسي.
نظرت اليه قليلا بعد ان افسد فرحتها بهذا الكلام, قبل ان تقول محاولة ابداء الهدوء.
ندى: انا عنيا ليك ولامك يا شادي.
وفكرت "ربنا يستر علينا من امك يا شادي"
********************
عادت نسمة الى البيت محملة بالكتب, لتخبرها والدتها بوجود هايدي في البيت, فتدخل غرفتها متأهبة لسماع شلال من الاحاديث التافهة التي اعتادتها من هايدي.
نسمة: السلام عليكم,...بسم الله الرحمن الرحيم انتي عاملة كده ليه؟.
تأملت هايدي بوجهها الخالي من الماكياج, وعينيها المرهقتين ,وشعرها المعقوص بنظارة شمسية اعلى رأسها.
هايدي: ازيك يا نسمة؟.
نسمة: الحمد لله , انتي مالك؟.
هايدي: مفيش...نسمة....انا كنت عايزاكي في حاجة كده.
وترددت قليلا وهي تضع يدها على فمها دليل التوتر, فقالت نسمة وهي تجلس بقلق.
نسمة: ايه يا بنتي عايزة ايه؟.
هايدي:...انتي فاضية يوم الخميس؟.
نسمة: ليه عايزة ايه؟.
هايدي: عايزاكي تيجي معايا مشوار.....
نسمة: خير يا هايدي انتي هتنقطيني؟, قولي يابنتي انا فاضية بس مش هاجي الا لما تقوليلي فين.
هايدي: الدكتور؟.
نسمة: دكتور ايه؟, انتي عيانة؟.
هايدي: انا بقالي يومين مبنامش يا نسمة, انا طالعلي حاجة كده وارمة ومش عارفة ايه هي, انا قلقانة جدا انا لازم اروح اكشف, انا خالتي وتيتا ماتو بالكانسر, انا لازم اطمن يا نسمة.
نسمة: انتي قلتي لمامتك؟.
هايدي: لا طبعا , وانتي اوعي تقولي لحد, مش عايزة حد يعرف الموضوع دا نهائي لا لندى ولا لطنط ولا حد, يعني انا وانتي وبس, ميخرجش برانا احنا الاتنين.
نسمة: ..........
هايدي: نسمة انا بتكلم بجد انا محتاجة حد يجي معايا , مش هقدر اروح لوحدي, عشان خاطري يا نسمة.
نسمة: .... طيب...ماشي....
هايدي: انا خايفة اوي يا نسمة.
نسمة: متخافيش ان شاء الله خير, انتي بس الي قالقة نفسك ع الفاضي

ياااااااااااااااااااااه
القصه كانت وحشتني اوي
ثانكس ع الحلقه يا قمرايه

نورتى يا جميل والجديد فى الطريق بازن الله

الحلقة الخامسة والسبعين

قامت هايدي بعد الكشف اليدوي للطبيب, وتوجهت تجلس بجانب نسمة بقلق.
هايدي: ...........؟.
قال الطبيب وهو يجلس خلف مكتبه بهدوء.
الدكتور: لا مفيش قلق ولا حاجة زي ماقلتلك, خير ان شاء الله, مفيش ورم ان شاء الله.
هايدي: بجد يا دكتور؟؟, امال ايه الي وارم دا؟.
ابتسم الطبيب.
الدكتور: دي حاجة شائعة عند كل البنات مش انتي وبس, هو له اسباب كتير على فكرة.
نسمة: هو ايه دا اصلا يا دكتور؟.
الدكتور: دا تليف في المنطقة دي بيحصل غالبا نتيجة للحالات النفسية المضطربة, انتي مخطوبة يا هايدي؟.
هايدي: لا يا دكتور.
عاد يبتسم وهو يقول.
الدكتور: اصل العلاج للتليف دا حاجة واحدة للاسف, هرمون الحمل بيظبط الللخبطة دي كلها, بس انا هديكي حاجات للوجع اللي بيجيلك, وهديكي فيتامينات, لان التليف دا لو اهملتيه هيزيد وساعتها هيتشال بالجراحة , ودي حاجة طبعا مش عايزين نوصلها.
هايدي: لا طبعا.
الدكتور: على العموم يا ستي عايزة تتطمني اكتر عشان شكلك موسوسة ,انا هخليكي تروحي تعملي اشعة وتجيلي بيها تاني, بس اصلا انتي مش محتاجة دا , دا عشان ترتاحي نفسيا مش اكترعشان انتي كان شكلك متوتر.
هايدي: معندكش فكرة يادكتور انا قلبي كان في رجليا اصلا.
تنهدت وهي تجلس بجانب نسمة في طريقها لعيادة الاشعة.
هايدي: الحمد لله يارب الحمد لله.
قالت نسمة وهي تقود.
نسمة: ربنا ستر.
هايدي: انا مش عارفة لو كان ورم كان هيحصلي ايه.
نسمة: كنتي هتبطلي الي بتعمليه يعني؟.
اعتدلت وهي تقول.
هايدي: وهو انا بعمل ايه يعني؟.
نسمة: ماهي المشكلة ان انا مش عارفة اقنعك انك غلطانة.
هايدي: انتي ايه مشكلتك دلوقتي؟, انتي مش كان قصدك على الولاد, انا معرفش حد دلوقتي خالص, ومبفكرش في حد الا علي, وهو مش مديني وش اصلا, يعني ريحي نفسك.
نسمة: مش بقلك , مش عارفة اقنعك.
هايدي: بقلك ايه, هو انا كده.
نسمة: اديكي رجعتي زي ماكنتي بتتنططي بعد ما اطمنتي ان معندكيش حاجة, فعلا البني اد دا معندوش دم.
هايدي: يا نسمة مش كل الناس محظوظة زيك تتخطب لواحد كويس ومامته كويسة.
نسمة: بصي ياهايدي انا مش هحاول اقاوح معاكي اوكاي, انتي حرة.
******************
نظرت ندى الى شادي الذي يقرأ الجريدة بجانبها في حجرة الجلوس, وترددت قليلا قبل تضع "ريموت" التلفاز من يدها وهي تقول له.
ندى: شادي, حبيبي انت مبتدورش على عربية ليه؟, احنا مش كنا اتفقنا؟.
وضع الجريدة من يده وهو يقول بضيق.
شادي: ندى احنا مش كنا خلصنا من الموضوع دا , معاييش فلوس تكمل على تمن العربية, الفلوس الي معايا عايز قدها عشان اعرف اجيب عربية كويسة, انا كنت فاكر اني هعرف احوش بعد مانستقر شوية , بس اديكي شايفة احنا عاملين ازاي الي داخل طالع في ساعتها, وانا عايز عربية وهتجن ومش بايدي اعمل حاجة.
ندى: طب مانا قلتلك قبل كده.
رد بعصبية.
شادي: وانا قلتلك قبل كده ياندى, مينفعش اصلا, انا مش هقبل انك تبيعي اي حاجة من شبكتك.
ندى: يا حبيبي ماهي الشبكة دي انت الي جايبها, يعني بتاعتك وفي الاول والاخر في بيتك, انت ليه مكبر الموضوع, عامل فرق بيني وبينك, احنا محتاجين عربية دلوقتي, احنا الاتنين بنشتغل ومحتاجين عربية تجيبنا وتودينا بدل الشحططة في التاكسيات.
شادي: استغفر الله العظيم ياندى, انتي عايزة ايه يعني, هتصرفي عليا؟؟.
ندى: انا مش عارفة انت مش عايز ليه؟, ياحبيبي وهو انا وانت ايه, ماهي حاجتي هي حاجتك, وانت يعني انا , وبعدين يا سيدي انا مش هبيعها كلها, انا هبيع السلسة والخاتمين والانسيال, هسيب الاسورة عشان انا بحبها والخاتم بتاع قراية الفاتحة, انا اصلا الباقي مكانش عاجبني اصلا ومكنتش انا الي منقياه ولا انت نسيت, وبعدين انا عندي دهبي يا شادي والشبكة دي نادر اما بلبسها.
شادي: برضه يا ندى انا مش هسمح انك تبيعي حاجة عشاني, سبيهم دول بتوعك.
ندى: يعني هي العربية هتبقى مش بتاعتي؟, ماهي هتبقى بتاعتك وبتاعتي, دانا مش هروح حتة الا لما توديني رايح جاي.
نظر اليها شادي وصمت, فقالت برجاء.
ندى: امانة عليك يا شادي ماتعند, عشان خاطري تسمع الكلام وتوافق نجيب العربية, والله احنا محتاجينها اوي و هنستفيد بيها, امانة عليك اقبل الي انا بقولهولك, وبعدين ابقى جيبلي غيرهم, حوشهم وهاتلي غيرهم ياسيدي زي ماجبتلي دول.
نظر اليها مليا قبل ان يقول.
شادي: بس على شرط.....اكتبها باسمك.
ندى: لا ياشادي, ايه شغل التخوين دا, لا طبعا تبقى باسمك انت,انا مش هقبل.
شادي: لا ياندى هو دا شرطي الوحيد الي على اساسه هسيبك تعملي كده انتي هتبقي دافعة نص التمن بتاعها, وانتي اصلا ملزومة مني والمفروض اجيبلك دهب وازودلك عليه كمان مش ابيعهولك.
ندى: خلاص يا حبيبي الي تشوفه, مادام دا هيريحك.
شادي: خلا ص ياندى اتفقنا.
******************
هالة: انتي هبلة يابت انتي , ازاي تبيعي شبكتك, انتي عارفة ماما لو عرفت هتعمل فيكي ايه؟.
ندى: ايه يعني ماهو الي جايبها, وبعدين انا عايزاه يجيب عربية عشان يوديني ويجيبني من الشغل, عاجبك البهدلة الي بتبهدلها كل يوم الصبح.
هالة: برضة ياندى, الدهب يا ماما تمنه فيه, العربية تمنها بيقل, يوم ما يحصلكو مصيبة بعد الشر, هتبيعو العربية مثلا, ولا هتبيعي بقيت الي معاكي, ولو اتعود انك بتبيعيلو كل حاجة كده مش هيبطل يخليكي تبيعي.
ندى: لا يا هالة شادي مش كده وعمره ماكان كده, دا والله ماكان موافق ابدا, وفي الاخر وافق بشرط انه يكتبها باسمي.
هالة: المهم تكوني انتي راضية ياندى عن الي عملتيه, انتي بتحبي جوزك وهو كمان بيحبك, بس لما الفلوس بتدخل في الموضوع , المشاكل بتظهر.
ندى: لا ياهالة طبعا, عمر ما مشكلة هتحصل بيني وبين شادي على الفلوس ابدا.
*****************
همس عمر لنسمة بعد انتهاء مراسم كتب الكتاب, اثناء ذهابهما لاستوديو التصوير.
عمر: انتي عارفة انك دلوقتي تعتبري مراتي رسمي.
ابتسمت نسمة وهي توميء برأسها في خجل.
عمر: عارفة يعني ايه؟.
نسمة: يعني ايه؟.
عمر: يعني لو عملتي اي حاجة غلط انا الي هتحاسب عليها, يعني ربنا هيحاسبني على كل مصيبة انتي هتعمليها.
نسمة: هو دا الي ربنا قدرك عليه , انتي هتبقي مراتي يعني هتحاسب عالمصايب الي بتعمليها.
عمر: وانتي كنتي عايزاني اقولك ايه يعني؟, مش هو دا الي حاصل؟.
نسمة: قولي بحبك, ربنا يخليكي ليا, اي حاجة من الي الولاد بيقولوها دي.
عمر: وانتي هيدخل عليكي الكلام دا برضة يا نسوم؟.
نسمة: ماهو انا مبسمعش منك الا هذار اصلا, لوكلوك عمال على بطال وهذار بس.
عمر: ايه دا؟, انتي عايزة حب وكلام فارغ من دا؟,انا كنت فاكرك عاقلة.
نسمة: عمر.
امسك يدها برقة وهو يقول.
عمر: انتي عارفة اني بحبك يا نسوم يا حبيبتي, وان انا مغرقك رومانسية اهه.
قالت نسمة بخجل.
نسمة: على فكرة...انا كمان...بحبك.
انحنى عليها يقول بابتسامة.
عمر: ايه ايه ايه؟, اصلي مش سامع.
نسمة: بحبك.
عمر: يااااااه, دا انتي تنقطي يا شيخة, بقالي معاكي اد ايه وقاعدة تقلانة وعايزة بس انتي تسمعي كلام حب وانا مثلا معنديش دم, بتعامليني معاملة ابن البطة السودة.
نسمة: الله بقى يا عمر.
عمر: الله بقى يا عمر, يعني بتحبيني اهه.
نسمة: متخلنيش ارجع في كلامي بقى.
عمر :وانا اقدر برضة ترجعي في كلامك, دانا هطلع ورقة وقلم وامضيكي ع الي قلتيه دا دلوقتي.
نسمة: هو انا لسه همضي مش كفاية اخدتو بصمتي في كتب الكتاب.
عمر: لا ولسه, انا هبصمك على طول ياروح قلبي.
نسمة: انا مش قلتلك انك داخل على طمع.
قاطع حديثهما صوت هالة تقول وهي تلتفت اليهما, بعد نزول زوجها لشراء شيء ما.
هالة: احسن حاجة حصلت النهاردة ان هايدي مجتش.
انتبها اليها فقالت نسمة.
نسمة: بصراحة هي كانت جاية بس قالت اكيد طنط سمية هتكون موجودة, وهي مش عايزة تشوفها.
هالة: دي ندى الي هتموت منها من ساعة ماقالولها انها بتكلم المصري.
نسمة: هي مبتكلموش, هو مش مديها فرصة, وندى مين الي قالها الموضوع دا؟.
هالة: مروة صاحبتها.
نسمة: والله هايدي دي عايزة تظبيط دماغ.
هالة: بتدافعي عنها يعني, انا شايفة انها بقت صاحبتك.
نسمة: اصلها غلبانة بعقلها والله , عايزة شغل كتير اوي عشان اعرف اعدلها.
هالة: طب اسكتي عالسيرة دي بقى, لان اسلام راجع ولو سمع اسمها ممكن ينزلني انا وبنتي في الشارع دلوقتي.
ركب اسلام السيارة.
اسلام: اتفضلي يا ستي البسكوت الي ملففانا الدنيا عليه, من ساعة مابدأتي تاكلي وانتي مدوخاني.
سبقت يد هالة يد ابنتها لتلتقط البسكويت قبل ان تصل اليه, فصدر عنها صيحة استهجان, وقالت.
ليلو: بببا.
اسلام: ايه؟, قلتي ايه تاني؟, قالت بابا صح؟, قالت بابا, تعالي تعالي ياروح بابا.
والتقط طفلته واخذ يلاعبها بفرحة كبيرة, فقالت هالة.
هالة: ماهي دايما بتقول مممما, ايه يعني قالت بابا دلوقتي بقت حبيبة بابا بعد ماكانت مدوخاه, يلا يلا اطلع خلصنا العيال عايزين يروحو يتصورو.
*********************
دخل شادي المكتب يتبعه وليد متضايقا وهو يقول موجها حديثه لسلمى الجالسة خلف مكتبها.
وليد: اهو احنا نعد نروح مواقع ونتمرمط وانتو قاعدين عالمكاتب متستتين, وقال ايه البشمهندسات مايطلعوش.
قال شادي وهو يجلس.
شادي: وانت عايز البنات هي الي تروح تعمل الي احنا بنعمله , انت مش راجل ولا ايه؟.
وليد: ماهما في الشغل يقولو بنات, وساعة القبض يقولو المساواة.
سلمى: ليه وهو انا بقبض زي ما بتقبض يا وليد؟.
وليد: يابنتي الفرق الي مابينا في المرتب دا فرق سنين شغل بيني وبينك, ماهو دا الي ناقص كمان تقبضي زيي.
سلمى: طيب يعني اهه بتاخد اكتر مني.
وليد: مانتو بتعدو بس تزاحمونا في شغلنا وتاخدو اماكن الرجالة, واول ما بيجيلكو عريس بتخلعو, يبقى لزمته ايه من الاول.
سلمى: دا انتو ناس غريبة صحيح, عايزين تتجوزو واحدة حلوة وجاهزة ومبتشتغلش هنجيبلكو منين يعني.
قال بجدية مغيرا الحديث.
وليد: عملتي ايه في الموضوع الي قلتلك عليه؟.
اظلم وجة سلمى وهي تقول باقتضاب.
سلمى: لسه.
وليد: لسه ايه يا بنتي انا قايلك من اسبوع, قولتيلهم في البيت عندك؟, رأيهم ايه؟.
سلمى: لسه مقلتلهمش, مجتش فرصة.
وليد: مجتش فرصة ايه هو انتي هتتصوري معاهم ,انتي هتقوليلهم.
شادي: موضوع ايه؟.
قالت سلمى بسرعة.
سلمى: مفيش موضوع.
وليد: الواد احمد ابن خالتي شافها قبل كده, كان معايا وشفتها فسلمت عليها وقالي انا عايز اخطبها, وانا جيت قلتلها, قال ايه هخدمه, مكنتش عارف انها مملة كده, انتي تقولي لباباكي ياسلمى واخلصي عشان الواد مستني ردك.
شادي: ......................

راااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااائعة

راااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااائعة
راااااااااااااااااااااااااااااااااااااااااااااااااااااااااااااااااااااااااااااااااااااااااااااااااائعة
راااااااااااااااااااااااااااااااااااااااااااااااااااااااااااااااااااااااااااااااااااااائعة
رااااااااااااااااااااااااااااااااااااااااااااااااااااااااااااااااااااااااااائعة
راااااااااااااااااااااااااااااااااااااااااااااااااااااااااااائعة
راااااااااااااااااااااااااااااااااااااااااااااائعة
رااااااااااااااااااااااااااااااائعة
رااااااااااااااااائعة
راااااااائعة
تسلم ايدك

ههههههههههههههههههههههههه
كل دى رائعه
مررررررسى يا يارا
وانتى اللى رائعه
منورانى دايما يا قمر

جاااااااااااااااااااااااامدة ياقمر
انا متبعاها من اول حلقه والله
بس هى كدة خلصت ولا اية ؟
انا ع امل انى اعرف الباقى

لالالالالالا خلصت ايه لسه يا جميل
وانا هكمل الحلقات
سورى بجد على التاخير

الحلقه السادسه والسابعون

ندى: انا مش فاهمة انت ازاي تعمل كده اصلا من غير ماتسألني, انت بتتصرف لوحدك يا شادي عايش لوحدك؟, ازاي عايزني اوافقك على مصيبة زي دي؟, انت اتجننت؟, رحت تشارك اصحابك بالفلوس الي معاكش غيرهم.
شادي: يا ندى دي كانت فلاصة متتعوضش.
ندى: فرصة متتعوضش ايه؟, فرصة ايه الي تدفع فيها الاربعين الف جنية الي كانو معاك, امال كنت مبيعني دهبي ليه, ومخسرني فيه ليه؟, انت عارف ان احنا محتاجين عربية وان انت كنت شايل الفلوس دي عشانها, دلوقتي انا ايه؟, بعت الحاجة على الفاضي؟.
شادي: انتي زعلانة على الحاجة ليه سيبي الفلوس شوية وانا اجيبلك احلى منهم.
ندى: وانا بقى مش عايزاهم ,انا عايزة العربية الي احنا عملنا كل دا عشانها.
لدأ شادي يحتد.
شادي: ياندى انتي بتستهوني بمشروع مكتب هندسي, دا وليد مشارك بشقته وايمن دافع ستين الف يعني اكتر من الي انا دافعه بعشرين الف, وماصدقت لما عرضو عليا ابقى شريك فيه.
ندى: انت عايز تجنني؟, مكتب هندسي ايه بلا خيبة, عايز تقنعني انك باربعين الف هتبقى شريك فيه, انت بس عامل دا عشان عايز تنقطني.
شادي: دا بدل ماتساعديني وتقفي معايا.
ندى: دا على اساس انك سألتني او اخدت رأيي, وعايزني اساعدك وانا مغمضة عنيا مانا بعت شبكتي هي دي مش مساعدة ولا كانت ايه دي؟.
هتف شادي غاضبا امام غضبها.
شادي: يووووووووه ياندى, يعني انتي كل همك دلوقتي العربية العربية, مانا قلتلك ملكيش دعوة انتي انا هتصرف.
قالت بسخرية.
ندى: اه , زي ما كل مرة بتتصرف, الله يخليك يا شادي اسكت انا مش ناقصاك انا معدتي قالبة عليا من الصبح وحاسة ان روحي بتتسحب.
شادي: انتي كل مرة تهبطيني, كل مرة تتفهي من الي بعمله.
ندى: بقلك ايه ياشادي مش انت بتقول هتتصرف, وريني بقى هتتصرف ازاي.
********************
هايدي: يعني انت اصلا مش بتدور على شغل عندك في اسكندرية؟.
علي: والله يا هايدي انا دايخ, شغل المندوب دا زي الكعب الداير لافف وطاحن عربيتي عالفاضي, وانا نفسي تعبت ونفسي استقر في حتة.
هايدي: وانت ناوي تستقر هنا ولا في اسكندرية.
علي: والله بقى هنا في اسكندرية في المريخ, المهم متكونش شغلانة كل شوية طالع عالطريق, انا بقيت بنام وانا سايق, كنت هخبط مرتين الاسبوع اللي فات.
هايدي: ياربي, لا يا علي خد بالك, اوعى تطلع عالطريق وانت مش نايم.
علي: والله ياهايدي انا خلاص زهقت وروحي بقت في مناخيري, وماما قارفاني كل يومين جايبالي عروسة تقولي اخطب بقى.
خفق قلب هايدي في قلق وهي تقول.
هايدي: ياراجل.
علي: اه والله اقولها ياستي بطلي ,مفيش فايدة, والمهم اني عارف لو انا جيت اختار هتعد تقولي لا دي طويلة شوية لا دي مش حلوة لا دي مش محجبة, قاعدة بتدورلي هي.
قالت بحذر.
هايدي: طيب... ماتشد حيلك, وتسمع كلام ماما.
علي: لا ياستي انا احب اعيش حياتي براحتي, عربيتي في رجلي هدومي ف شنطتي زي ماكنت طول عمري, انتي عارفة ان مقعدتش في البيت من امتى؟, من ايام ماكنت في المنيا, كنت مقضيها سفر, لما مبيعجبنيش الوضع في اي حتة بخلع.
هايدي: اتعودت انت عالخلعان, طب ماتشوف البنات يمكن واحدة تعجبك.
علي: مش انا الي اتجوز كده ياهايدي, اذا ماكنتش اشوف البنت وتعجبني وابقى بجد عايزها يبقى مفيش حاجة في الدنيا ممكن تزقني عليها.
هايدي: يا دماغك, وانت بقى عايزها شكلها ايه؟,... ادورلك مع مامتك يعني.
علي: مممم عايزها استعمال طبيب ودواخل فابريكة...جاهزة بالاستبن ومش مخبوطة , عندك
ولا اخلى ماما تقلب في المعارض.
هايدي: هههههه انت مش بتبطل هزار ابدا.
علي: يابنتي خليكي فريش, مش طالبة نكد.
هايدي: والله انت نكتة , مشكلة, مالكش حل.
علي: انت هتاكليلي عقلي ومش هتقوليلي اخبارك؟.
هايدي: لا والله مفيش جديد.
علي: عليا انا برضة يا معلم, مفيش لاف ستوري كده ولا كده؟.
هايدي: والله العظيم مافيه حاجة؟
علي: وهو انا قلتلك حاجة, مالك بتحلفي بامانة كده ليه؟.
هايدي: انا بجد بجد يا علي نفسي احب واتحب, حب حقيقي بقى حب بجد
علي: ربنا يرزقك يا ستي الحب؟
هايدي: ربنا يرزقني الي في بالي ياعلي, ادعيلي بس يرزقني الي في بالي.
******************
قالت والدة شادي له وهي ترفع الاطباق من على طاولة الطعام.
الام: ياحبيبي كل , انت مكلتش.
شادي: مكلتش ايه يا ماما دانا ضارب حلة ملوخية لوحدي.
الام: طبعا وانت هتاكل الملوخية فين تاني يعني, وهي ايه؟, مش عايزة تيجي معاك يعني؟, وديتها عند امها زي كل مرة؟.
شادي: لا ندى تعبانة شوية وقاعدة في البيت.
الام: ماهي مبتتعبش الا وهي جايالي.
قام شادي من مجلسه يجمع الاطباق ويتبع امه.
شادي: لا والله يا ماما دي من الصبح قاعدة ترجع, انا مكنتش عايز اسيبها وانزل, بس كنت رايح اشوف الشقة الي هنعمل فيها المكتب.
الام: والله يابني احلى حاجة عملتها حكاية المكتب دي.
شادي: انا بس زعلان اني مجبتش العربية, انا فعلا كنت محتاجالها, يعني افرض حبينا نجيب بيبي , هنتصرف ازاي و ندى وشغلها.
الام: ياخويا تعد من الشغل, هي غاوية بهدلة وخلاص.
شادي: برضة ياماما انا محتاج عربية تحت ايدي, بس دفعت الفلوس في المكتب, بس بصراحة هي كانت فرصة متتعوضش.
وضعت الام الاطباق من يدها في رفق وهي تقول.
الام: بص ياشادي, انا ممكن اساعدك.
شادي: بجد ياماما؟.
شادي: ايوة.... انا ممكن اجيبلك 40 الف جنية من فلوسي في البنك, ومش عايزاهم مترجعهمليش, بس على شرط.
شادي: انا عنيا ليكي.
صمتت لحظات قبل ان تقول بتأن.
الام: تكتب العربية باسمي......
واسقط في يد شادي.

صاحت ندى باعلى صوتها.
ندى: ننننعم؟؟!!.
شادي: ياندى اهدي واسمعي الكلام للاخر.
قامت ندى من على الاريكة وهي تصيح.
ندى: ابدا يا شادي مايحصل, اقسم بالله مايحصل ابدا, يعني ايه العربية تتكتب باسم مامتك؟, نبقى راكبين عربية مش بتاعتنا.
شادي: ياندى دي هتبقى باسمها صوري كده بس.
ندى: لا صوري ولا نيلة انا مش عايزة عربية, محروقة العربية الي تيجي بالشكل دا.
شادي: الله يا ندى مش انتي الي اتعصبتي وحسستيني ان حياتنا كلها واقفة على العربية.
ندى: ايوة, بس مش كده, انا مش عايزة عربية مامتك.
شادي: ياندى هتبقى بتاعتي.
ندى: تبقى باسمك.
شادي: ما اسم ماما كانها بتاعتي.
ندى:لا يا شادي اما اركب عربية جوزي غير لما اركب عربية مامته.
شادي: انتي بتعملي كل ده عشان مش هكتبها باسمك.
نظرت اليه ندى بغضب قبل ان تقول.
ندى: بقى كده؟, وهو انا الي كنت قلت انك تكتبها باسمي, مش انت الي قلت؟, طب عشان الكلمة دي يا شادي انا مش عايزة العربية, والفلوس عندك ان شالله تحرقها, وانا مش قاعدة في البيت لغاية ماتنسى حكاية العربية دي, ايه رأيك بقى؟.
*******************
فتحت نسمة باب غرفتها وتطلعت الى هايدي باندهاش.
نسمة: بسم الله الرحمن الرحيم.
تخطتها هايدي وهي تدخل الغرفة.
هايدي: ايه ؟, مش خلاص عملتلك الي انتي عايزاه؟.
نسمة: وهو دا الي انا عايزاه؟.
هايدي: انتي مش كنتي عايزاني اتحجب؟.
نسمة: وانتي اتحجبتي بقى عشان مين المرة دي؟.
هايدي: ايوة يا نسمة اتحجبت عشان علي, مش هو دا الي عايزة تسمعيه, ايوة انا بحبه.
نسمة: يييه موال بحبه, كل واد تعرفيه تقولي بحبه, الوحيد الي معرفتيش تحبيه الي لؤي الي كان خطيبك في الحلال, لكن انتي غاوية لعب.
هايدي: يا نسمة المرة دي بجد.
نسمة: مانتي كل مرة تقولي بجد وهو دا الحب الفظيع الي مفيش منه.
هايدي: انا عمري ماقلت كده الا على حمادة السلاموني.
نسمة: مانتي كل ماتسيبي واحد تقولي انا محبتش الا حمادة, وانتي كنتي بتحلفي وانتي مع التاني انه الحب الاول والاخير.
هايدي: انتي زعلانة ليه؟, مش المهم اني اكون احسن, اتحجب وابقى كويسة ومعرفش ولاد.
نسمة: احسن لنفسك مش لحد.
هايدي: اسكتي بقى اسكتي, وردي على موبايلك.
قفزت نسمة للهاتف وهي تقول.
نسمة: عمر....سلام عليكم ...ايوة يا حبيبي.
واخذت الهاتف لتدخل الشرفة تتحدث بعيدا عن هايدي, فتمتمت هايدي.
هايدي: حبيبي!!, الله يرحم ايام ما كناش بنعرف ننطق.
في هذه اللحظة دخلت ندى الغرفة فجأة.
ندى: نسمة...
وتوقفت عن الحديث حين رأت هايدي التي قالت.
هايدي: ازيك ياندى؟.
ندى: ...الحمد لله.
هايدي: اخبار شادي ايه؟.
قالت ندى باقتضاب.
ندى: الحمد لله....لما نسمة تخلص خليها تدورلي على مسكن صداع عشان دماغي هتنفجر.
هايدي: انتي فعلا شكلك عيان, ...او معيطة.
قالت ندى محاولة اخفاء سبب بكائها.
ندى: لا انا تعبانة شوية, الله يخليكي خليها لما تخلص تجيبهولي على اوضتي, عن اذنك.
وخرجت من الغرفة بهدوء, فقالت هايدي بعد عودة نسمة.
هايدي: نسمة هي ندى اختك حامل؟.
نسمة: لا مش حامل.
هايدي: عليا انا برضة!!.
نسمة: انتي ايه الي خلاكي تقولي كده؟.
هايدي: شكلها باين خالص.
نسمة: لا يا عبيطة دي هي زعلانة عشان متخانقة مع شادي وسايباله البيت.
هايدي: عليا يا نسوم, طب انا بقى متأكدة ان ندى حامل, ومبقاش هايدي لو مطلعتش حامل

جميلللللللللللللللللللللللللة ياقمر بجد تسلمى
ومستنين الباقى

الحلقة السابعة والسبعين

سلمى: بصراحة يا شادي بقى ندى عندها حق, ماهو مبقاش انا راكبة عربية وهي باسم حد تاني, كأني ساكنة في شقة مفروش مش بتاعتي.
شادي: انتي كمان هتقوليلي مش بتاعتي.
سلمى: انت مش عايز حد يعارضك وبس.
فرد شادي بنفاذ صبر.
شادي: بصي ياندى انا خلاص نزلت نقيت العربية وامي جابتلي الفلوس خلاص,فاسكتي بقى عشان انا ماليش مزاج خالص اتخانق معاكي انتي كمان.
سلمى: انا مش ندى, وبعدين تتخانق معايا ليه ان شاء الله انا مالي, انت حر انت ومراتك, بس انت الي لسه دماغك ناشفة زي زمان, بتقفش وبس وسايبها بالايام مبتسألش عليها, ليها حق تفضل عند مامتها .
شادي: على اساس انك دماغك طرية يعني, طب عملتي ايه بقى ياطريةفي العريس الي جايلك؟, مش موافقة عليه ليه؟.
سلمى: شادي متغيرش الموضوع.
شادي: انتي الي بتهربي من الموضوع, ايه؟, معجبكيش لما قابلتيه؟.
صمتت قبل ان تقول.
سلمى: بالعكس.
شادي: يبقى وافقي.
سلمى: انت شايف كده؟.
شادي: انا شايف انك تستاهلي احسن حد في الدنيا.
التقت عيناهما لحظة فدمعت عيناها, قبل ان تقول بتهدج.
سلمى: روح يا شادي صالح مراتك.
شادي: ييييوة بقى يا سلمى.
دخل وليد المكتب في هذه اللحظة.
وليد: شادي, حماك بيدور عليك روحله بقى يا معلم.
شادي: خير اللهم اجعله خير.
سلمى: كلمه كويس يا شادي.
شادي: ربنا يستر.
*******************
الام: ياندى سيبي يا ماما متعمليش حاجة.
ندى: يا ماما سبيني هو انا عيانة؟.
الام: برضة متشليش حاجة لغاية مانتأكد انك مش حامل وتطلع نتيجة التحليل.
قالت نسمة وهي تحمل الفازة من اختها.
نسمة: هو انتي لو حامل هتقولي لشادي ياندى؟.
قالت ندى بعناد الاطفال.
ندى: انا مش عايزة اقله حاجة, يارب ما ابقى حامل.
هتفت بها الام في غضب.
الام: ايه ياندى الغباء الي بتقوليه دا؟, يارب ان شاء الله تبقى حامل,فيه حد بيدعي ربنا بالشر؟.
ندى: لا ياماما انا مش طايقاه بعد الي عمله, بقى يبقى غلطان ويعد بالايام ميسألش فيا انا فين وبعمل ايه؟, ايه فاكر هيرجع البيت هيلاقيني؟.
نسمة: مانتي لو حامل هترجعي البيت.
ندى: انا مش هطلع حامل ولا حاجة, يعني هي هايدي كانت دكتورة.
الام: انا اصلا مكنتش مطمنة من الاول, من ساعة ماكان بيجيلك مغص, كنت شاكة, بس ان شاء الله نتطمن.
******************
الاب: فيه ايه ياشادي خير؟.
شادي: فيه ايه يا انكل , مفيش, هو فيه؟, لا مفيش.
الاب: هو ايه الي فيه ومفيش, انت يابني مراتك قاعدة عندنا بتعمل ايه؟, انا كنت فاكرها جاية شوية تغير جو عند اخواتها, بس بقالها كام يوم, فيه حد يسيب مراته كده ياشادي ميجيلهاش ولا يسأل عليها, وهو ينفع تتخانقو بالشكل دا, وسايب مراتك تروح الدكتور لوحدها ولا بتسأل عليها ولا بتروح معاها.
شادي: دكتور؟, دكتور ايه؟, هي ندى عيانة؟.
الاب: هو يعني انت مش هامك لو كانت حامل ولا لأ, دا بدل ما تفرح وتروح رجلك على رجلها.
شادي: هي ندى حامل؟.
الاب: لسه مطلعش النتيجة يا استاذ, روح ياشادي جيب مراتك رجعها البيت, انا مش عايز خناقاتكو الهايفة دي, مش كل شوية ندى تجيلي غضبانة انتو مبقيتوش عيال صغيرة, انتو لو بقى عندكو طفل هتبهدلوه معاكو, انا مشفتش شغل العيال دا الا لما ندى اتجوزت, يلا يا بني ربنا يهديك تروح بعد الشغل معايا, تاخد مراتك وترجع بيتك.
شادي: .....................
*****************
هايدي: يعني وهو انا الي لازم اسأل عليك, انت مبتعرفش تسأل ابدا؟.
علي: انا اقدر يا باشا؟.
هايدي: ايوة اعد اشتغلني .
علي: لا والله , اصلي اليومين دول مشغول كده, بفكر انقل اي حتة الغردقة ولا حاجة.
هايدي: طيب ليه مش بتدور برة مصر؟.
علي: لا ,انا برضة متعود اني اغيب اغيب ووقت مااحب ارجع كام ساعة وابقى في بيت ابويا يعني, وبعدين ماليش في حبسة التكيفات دي, اذا ماكانش هوا ربنا يضرب في وشي وانا سايق العربية كده مبقاش انا.
هايدي: ياراجل؟, طب واخبار العرايس ايه؟.
علي: والله يا بنتي مانا عارف , تحسي ان المواسير طفحت بنات, انا خايف افتح الحنفية الاقي عرايس, لا وايه حفلة بقى, خالتي وعماتي كله بيدورلي, كأنهم كانو مستنين اقول عايز.
قالت بحذر متوتر.
هايدي: طيب انت مش كنت بتحب غادة, ايه المانع بقى انك ترجعلها؟, هي مش فركشت؟.
علي: يابنتي غادة اتكتب كتابها, يعني دلوقتي بقت متطلقة.
هايدي: وايه المشكلة في متطلقة يعني؟.
علي: اقتعيني مثلا ان غادة دي في الشهر الي اتكتب كتابها فيه, مخادتلهاش بوسة كده ولا حضن كده.
هايدي: ......ياسلام.
علي: ايوة يا بنتي انتي مش عايشة في الدنيا, دا اذا كان المخطوبين بيعملو كده, امال دول, وبعدين انا مخدش واحدة اتعلم عليها قبل كدة بصراحة.
هايدي: على فكرة اذا كنت بتفكر كده نبقى عبيط جدا, لان اصيع بنات هما الي مبيبانش عليهم, وممكن برضة تاخد واحدة انت متخيل انها معرفتش حد قبلك, وتكون متداسة يعني.
علي: لا بيبان.
هايدي: لا والله مابيبان, وانتو يا ولاد اعبط من العبط, وممكن يترسم عليكو التت.
علي: وانا احط نفسي في موضع شبهة ليه اصلا, واخد واحدة اتخطبت قبل كده ولا اتكتب كتابها , طب مانا اخد واحدة بكرتونتها.
قالت هايدي بغيرة متوترة.
هايدي: طب مانت كنت عايز ندى, وانت كنت عارف حكايتها مع شادي, ولا دي كان عادي تبقى متداسة.
صمت علي قبل ان يقول بلوم.
علي: ندى كانت حالة كدة وخلصت ياهايدي, وعيب تتكلمي عن واحدة كانت صاحبتك كده.
هايدي: انت الي بتناقض نفسك, مرة راسم الادب ومرة راسم الصياعة.
قال علي باسلوب من ينهي المحادثة بحزم.
علي: اني ارسم الصياعة وانا ولد حاجة متعبنيش, بس الي يعيبني اني ابقى ندل, او اقصر في حق عيلتي او اصحابي, او يجي يوم واتكلم على حد انا سبق وعرفته, وانا مش ندل يا هايدي, انتي عارفة عني اني راجل, متتوقعيش مني اني اكون اقل من كده, وقفلي الكلام بقى عشان انتي عرفتي تخليني اقفش منك.
**********************
علقت ندى نظرها من نافذة السيارة لا تريد ان تلتفت الى شادي, فقال هو محاولا كسر حاجز الصمت برفق.
شادي: وانتي من امتى عاملة التحليل؟.
قالت دون ان تنظر اليه.
ندى: وانت يهمك؟.
شادي: ندى خلاص ياندى انا قلت اسف واعتذرتلك قدام اهلك واعتذرتلك لوحدك, وندمت يا ستي اني سبتك لوحدك واني مسألتش عليكي وانتي عيانة, وخلاص العربية انا مش هجيبها الا لما تشوفيها, وانتي بنفسك الي تختاريها, بس مقدرش اوعدك اني مش هجيبها باسم ماما, لان انتي عارفة اننا مضطرين, دلوقتي اانتي طلعتي حامل, وفي الاول كده انا مش هرضى اسيبك تتبهدلي انا لازم اجيبك واوديكي شغلك.
ندى: ..................
شادي: ياندى ردي عليا, المفروض الخبر الي سمعناه النهاردة دا يفرحنا , ميعملش فينا كدة , انتي ليه محسسانا ان خبر حملك دا مش فارق معاكي.
ندى: يعني هو فارق معاك؟.
شادي: ايوة طبعا فارق معانا, انا بحبك وبحب بيتنا وفرحان يا ندى, دا اسعد يوم في حياة الواحد يوم ما يعرف انه هيبقى اب.
ردت بسخرية لاذعة.
ندى: اه عشان كل مانتزنق يروح لماما يتصرف.
شادي: ندى, انتي ايه مالك؟, مش عايزة بيبي ولا مالك؟.
التفتت اليه تقول بعصبية.
ندى: انا الي مش عارفة انت ازاي بارد ومستهون بالي انت عامله دا كله, يعني في الاول رحت شاركت اصحابك بفلوسك من غير ماترجعلي, وسبتني اضرب دماغي في الحيطة, وبعدها رحت اتفقت مع امك انك تجيب عربية بفلوسها وباسمها مع اني مشاركة بعشرين الف فلوس شبكتي وبعدها تسيبني ازعل بالايام قاعدة عند اهلي ولا تسأل فيا ومترجعش الا لما بابا يقولك اني احتمال ابقى حامل, يبقى عايزني اسكتلك واسامحك بأي وش.
شادي: ياندى انتي مكبرة المواضيع عالفاضي.
ندى: بالعكس, انا من كتر ما بصغر من الحاجة , بيضيع حقي, وكأني مليش اي قيمة واي رأي عندك.
شادي: متاخديش الامور كده ياندى عشان هي مش كده.
ندى: خلاص ياشادي, كده ولا مش كده,انا مبقتش اركز معاك خلاص, الي انت شايفه اعمله, الغيني زي مانت عايز, وانساني زي مانت عايز, وانا مش هحاول اعارضك او اقف في طريق اي حاجة بتعملها.
******************
خرجت نسمة من باب الجامعة لتقابل هايدي, التي وجدتها شاردة مستندة الى احدى السيارات.
نسمة: ايه يا هايدي؟, قلقتيني.
افاقت هايدي على صوت نسمة , فقالت بضيق.
هايدي: مفيش حاجة يانسمة, انا بس كنت مخنوقة شوية.
نسمة: وهو انتي يابنتي مالكيش اصحاب تخرجي معاهم, دانتي كل يوم في الشارع يا هايدي.
قالت هايدي بضيق.
هايدي: انا مخنوقة اوي يا نسمة.
نسمة: مالك؟.
فوجئت نسمة بصوت هايدي المختنق يخرج بكل انفعال.
هايدي: انتي متعرفيش انا ليه كده؟, ليه بيحصل معايا كده, انا على طول تعبانة ومش مرتاحة, معرفتش احب ابدا, مفيش حاجة بتكمل عندي, كل ما احب حد بسيبه, والي بيحبني مبحبوش.
نسمة: لا حول ولاقوة الا بالله , يا بنتي استغفري ربنا, ايه الخنقة دي؟.
هايدي: علي مبيحبنيش, اصل باين اوي عليه, الي مهتم بحد بيفضل ليل نهار يفكر فيه, مبييبوش بالايام ويفتكره لما الصدف تيجي, وبيتكلم وبيسأل ولما بيوعد يتصل بيتصل, مش كله كلام, انتي عارفة دا كان ساعات يلطعني على الهولد ولا كأني موجودة وبعدها بيرجع بيقولي سوري نسيتك, نسيتني؟, ليه يعني؟, للدرجة دي؟, للدرجة دي مش في بالك, اشمعنى انا الي بيحصلي كل دا؟.
صمتت نسمة قبل ان تقول بهدوء بعد ان لمست من هايدي قابلية للنصح.
نسمة: يمكن عشان انتي نفسك مش عارفة عايزة ايه؟.
هايدي: انا عايزة علي.
نسمة: ولو جالك يا هايدي هتقولي مش عايزاه, انتي عايزاه عشان هو تقلان عليكي, زي حمادة بالظبط, انتي مبقتيش صغيرة يا هايدي, اديكي شايفة اهه, اصحابك والي ادك مخطوبين او متجوزين وعندهم عيال, انتي مش فاضية تمشي وتسمحي لواحد يتسلى بيكي, انتي محتاجة حاجة بجد تدخل حياتك.
هايدي: مانا عايزة علي بجد.
نسمة: استغفر الله العظيم, انا قصدي علاقة بجد, حد بجد يكون داخل حياتك من الباب , وانتي كمان يكون عندك استعداد انه يكون الاول والاخير, دانتي قلبك بقى مداس يا هايدي, يا شيخة حرام عليكي نفسك وقلبك دا الي مرمطيه من كتر البهدلة, انتي ايه؟, غاوية قرف؟, فوقي بقى, يعني قاعدة تدعي وتصلي ربنا يرزقك بعلي, طب وبعدين, انتي بتتغيري وبتغيري من نفسك عشان الولد الي معاكي, انتي ملكيش شخصية, اختاري انتي تكوني ايه, وعلى اساس دا هيجيلك البني ادم الي ربنا كاتبهولك, مش عايشة والسلام, والي يجي يجي, خلي عندك عزة في نفسك عشان الناس تشوفك عزيزة ومترخصكيش.
نظرت اليها هايدي والدموع في عينيها.
هايدي: وهو انا رخيصة يا نسمة؟.
شعرت نسمة بالشفقة على حالها , وقالت.
نسمة: انا لو مش قلبي عليكي مكنتش قلتلك الكلام, انا صحيح اصغر منك , ومش صاحبتك اوي, بس انا مبحبش اشوف الغلط بيحصل قدامي واقف ساكتة انا من حقي عليكي انصحك, وانتي المفروض تبدأي تسمعي لغيرك بقى, عشتي بدماغك سنين طويلة ودتك فين دماغك دي؟, اكبري بقى يا هايدي وكبري نفسك, واتعلمي تقربي من الناس الي بيحبوكي بجد, مش الي بيستغلوكي وعايزين منك حاجة, سفرية بقى, مصلحة هدايا, معرفة وبس, منظره قدام اصحابه, ابعدي عن كل القرف الي كنتي عايشة فيه دا بقى, متفتكريش ان الوقت فات, والله ممكن ترجعي تاني تبني نفسك و تعملي الشخصية الي كان نفسك فيها من زمان.
هايدي: بس, بس يا نسمة.
وبدأت تبكي فقالت نسمة بتراجع.
نسمة: ياااااربي, انا مكانش قصدي خالص اخليكي تعيطي.
تركتها هايدي وهي تبكي وانطلقت مبتعدة عنها في انهيار.
نسمة: ياربي ايه الغباء دا, يعني هي جايالي تقولي انا مخنوقة اخنقها زيادة!!.
************************
قال والد ندى لاسلام اثناء التفاف الجميع حول مائدة الطعام ببيت ندى.
الاب: بس انت غلطان يا اسلام, ازاي تخليها تدور على شغل, وانتي يا بنتي مش عندك بنتك, مالية عليكي وقتك, بتتدلعي ولا عايزة ترميهالنا واحنا نربيهالك, انا معنديش كلام من دا, كل عيل يتربى في بيته, سامعة ياندى انتي وشادي.
ندى: وهو انا لسه جبت حاجة عشان احطهالكو في البيت, انا لو عليا اسيب الشغل من بكرة, يعني هو انا ناقصة قرف, بس اهو كام شهر لغاية ما بطني تكبر او ابدأ انا اتعب.
شادي: والله يا انكل انا بتحايل عليها تسيب الشغل من دلوقتي بس هي مش راضية.
نظرت اليه نظرة جانبية بغيظ.
ندى: احنا مش اتكلمنا في الموضوع قبل كده يا شادي؟ عايز تدخل بابا ليه, خلاص بقى.
فقال مبرئا نفسه.
شادي: وهو انا قلت حاجة ياندى ولا دخلت حد, انا بتكلم بس.
قال اسلام ضاحكا.
اسلام: وهو انت لسه شفت حاجة من قلبان الهرمونات, دي واحدة صاحبتنا كانت بتقوم الصبح ترميلي هدومي برة البيت, متجوز كلب بوليسي , بتعد تشمني.
هالة: ياسلام, على الاقل انا كنت برميلك هدومك في الغسيل , اهي بنتك بترميلك الهدوم من الشباك دلوقتي وحلو عندك.
الاب: بس انت عارف ياشادي, انا مين بتعجبني اوي, البنت الي معاكو في المكتب, الي بتشتغل ..سلمى.
توقفت ندى عن الاكل لحظة, وهي تقول بانتباة.
ندى: سلمى؟, سلمى مين؟, هي مش البنت الي معاكو في المكتب اسمها اسراء.
شحب وجة شادي بشدة ولم يستطع النطق, فقال والدها ببساطة.
الاب: لا اسراء دي كانت بتشتغل بس سابت الشغل, الي موجودة دلوقتي بنت ممتازة اسمها سلمى, كانت دفعتك يا هالة, اصلها عارفاكي, بنت بيضا كده وحلوة.
سقطت الملعقة من يد ندى على الصحن في عصبية وهي تلتفت الى شادي الذي اسفر وجهه عن الحقيقة دون ان تحتاج لتأكيد.
ندى: سلمى يا شادي؟؟؟؟؟؟؟

الحلقة الثامنة والسبعين

"اقسم بالله ياشادي مانا مروحة خلاص"
اغلق شادي باب غرفة ندى خلفه وهو يقول بخفوت.
شادي: وطي صوتك ياندى, خلاص فضحتينا وعملتي مشكلة قدام الناس كلها, بطلي بقى ولمي الدور.
عادت تصيح.
ندى: انت كمان ليك عين تنطق, انت قاعد بستغفلني وانا نايمة على وداني , مبقتش اعرف افوق من مصيبة الاقيك بتطلعلي بالتانية.
شادي: اهو انا مرضتش اقولك عشان عارف انك هتضايقي.
ندى: وهو كمان مكنتش عايزني اتضايق؟.
شادي: ياندى انتي بتصوتي مش بتتكلمي, ياحبيبتي دا كله عشان هرمونات الحمل صدقيني, الموضوع مفيهوش حاجة تضايق, انتي مكبرة الدنيا ليه؟, ليه متخيلة اني ممكن ابص لسلمى, انتي برضة لسه بتفكري كده؟.
ندى: واعمل ايه انا دلوقتي وانت بتشتغل مع واحدة بتحبك, اعمل ايه؟,..قولي اعمل ايه؟.
شادي: ياندى صوتك بقى العالي دا ارحميني, انتي بقيتي متوترة على طول وانا مش مستحمل دلعك ولعب العيال بتاعك دا ياشيخة, انا قرفت.
توقفا لدى سماعهما طرقا خفيفا على باب الغرفة يتبعه وجه نسمة يدخل من فرجة الباب.
نسمة: صوتكو جايب اخر الدنيا, استهدو بالله.
هتفت ندى بأختها.
ندى: برة يانسمة معلش دلوقتي.
بعد خروج نسمة قال شادي بصوت غاضب لكن خفيض.
شادي: ممكن افهم انا مطلوب مني ايه دلوقتي؟, اسيب شغلي مثلا عشان انتي مش عاجبك ان سلمى معايا؟.
وضعت ندى كفيها على رأسها بألم وهي تقول.
ندى: بص ياشادي اسكت عشان انت مستفز, وانا خلاص مش حملك, اه يادماغي...اه ياني انا دايخة, ابعد عني ياشادي انا مش طايقة نفسي.
وتهاوت على مقعد خلفها.
******************
جلست هايدي في ضيق بغرفتها, تقلب في التلفاز دون جدوى, ثم سمعت رنين هاتفها فنظرت الى الرقم الذي تعرفته, انه رقم هاتف شخص حادثها منذ ايام , ولم تشعر بالرغبة في الرد فألقت الهاتف بعيدا للحظة الى ان صمت , ثم عاد الرنين فتظرت اليه لحظات قبل ان يدفهعا شيطانها ان ترفعه وترد.
هايدي: الو.
كريم: القمر تقلان عليا ليه بس, ولا كنتي مشغولة؟.
هايدي: همممم يعني؟.
كريم: اخبارك ايه؟.
هايدي: الحمد لله تعبانة شوية.
كريم: ممم عشان كدة مبتروحيش الشغل؟.
هايدي: انت بتراقبني بقى, انت عرفت اني مرحتش الشغل منين؟.
كريم: وهو فيه حد ميعرفكيش ياقمر؟.
هايدي: ياسلام, دانت لغاية دلوقتي مقلتليش انت جبت نمرتي منين؟.
قال بسخرية.
كريم: من مجلة النجوم.
هايدي: ياراجل.
كريم: سيبك انتي بقى, بقالنا كتير بنتكلم اهه هوانا مش هشوفك بقى, انزلي بس قابليني وانا اقلك على كل الي انتي عايزاه.
هايدي: انت عبيط, اقابلك ليه, هو انا اعرفك؟.
كريم: امال ضفتيني عندك عالفيس بوك ليه؟.
هايدي: عشان انت زنان قاعد مسدجات عالفيس ومسدجات عالموبايل لغاية ماعملتلك اكسبت.
كريم: بس صورك الاخرانية الي حطتيها جامدة.
هايدي: طب مانا عارفة ان انا جامدة.
كريم: ماتقولي بقى هننزل اشوفك امتى؟.
هايدي: قلتلك انا مبقابلش.
كريم: عليا برضة, وبعدين دي مش مقابلة, داحنا هننزل نلف بالعربية شوية.
هايدي: ايه دا؟, انت فاكرني ايه!!, هركب معاك عربية.
قال بسخرية مرة اخرى.
كريم: عيب عليكي ياهايدي دانا زي اخوكي برضة.
بدأت هايدي تشعر بالضيق من نبرة صوته.
هايدي: انا معنديش اخوات ولاد.
كريم: انتي لو اختي هسيبك تركبي مع صاحبك لو بتحبيه.
هايدي: اولا انت مش صاحبي, ثانيا انت معندكش اخوات بنات ولا انت نسيت انك قلتلي.
كريم: انا بقول لو يعني.
هايدي: لا طبعا عمري ماركب معاك عربية.
كريم: ياشيخة عادي ياهايدي.
شعرت هايدي بالضيق, فقالت بحدة.
هايدي: لا مش عادي يباي.
كريم: يعني هكون اول واحد؟.
هايدي: احترم نفسك.
كريم: انا مش قصدي ياجميل, انا قصدي انك بس لو ارتحتلي شوية ,يعني عشان تدلعني.
هايدي: انا هقفل.
كريم: هتمثلي عليا انا الادب, ما الي قالولي قالولي انك عادي يعني.
هايدي: هما مين دول الي قالولك؟.
كريم: ماخلاص بقى يا مزة متقضيهاش قفش.
شعرت بالغضب الشديد من طريقة حديثه المستفزة فقالت باندهاش غاضب.
هايدي: انا غلطانة اني رديت على واحد زبالة زيك.
كريم: انا زبالة يا.... يابنت ال.......
اغلقت هايدي الخط في غضب ورعب وهي تبكي من الذعر والقرف, وشعرت بالضيق يكتنفها بشدة, واخذت تبكي قليلا قبل ان تفتح الفيس بوك الخاص بها لتمسح كريم, وبعد ان هدأت قليلا شعرت برغبة شديدة في التحدث الى علي.
علي: مال صوتك؟.
هايدي: مخنوقة شوية.
علي: من ايه يا بنتي مفيش حاجة مستاهلة.
هايدي: ازاي يعني دي كل حاجة زفت.
علي: دا عشان انتي فاضية بس, عارفة لو فيه حد في حياتك كانت بقت مختلفة.
هايدي: ....حد بلا نيلة.
علي: بكرة يا بنتي تلاقي حد تحبيه بجد ويعوضك عن كل الزعل الي في الدنيا دي.
هايدي: الحب مش حاجة حلوة ياعلي صدقني, ممكن تكون الي انت بتحبه مش حاسس بيك خالص.
علي: ليه ياهايدي انتي بتحبي حد وهو مش عارف ولا ايه؟, دا مين الحمار دا.
هايدي: يعني انت لو مكاني تعمل ايه؟.
علي: مش هسكت, هروح اقله اني بحبه.
هايدي: على اساس انه هيحس.
علي: جربي انتي مش خسرانة حاجة.
هايدي: بقى كده؟, طب انا بحبك يا علي.
علي: ههههههههه ياشيخة انتي مبتتشطريش الا عليا.
هايدي: لا انا بجد بحبك.
صمت للحظة قبل ان يقول.
علي: انتي بتهذري ياهايدي, احنا اخوات يا بنتي.
قالت بمرارة.
هايدي: اخوات؟.
علي: ايوة ياهايدي, انا عمري ماعملت حاجة تخليكي تتخيلي اننا اكتر من كده, ان اسف لو كنت جرحت مشاعرك كل الوقت دا, بس انا فعلا كنت بعزك زي اختي, وعمري ماعملت حاجة تخليكي تحسي بغير كده.
هايدي: مانا عارفة.
علي: هايدي بجد انا اسف, انا مكنتش حاسس بحاة, انتي انسانة طيبة, بس احنا مينفعش نكون غير اخوات.
هايدي: وليه مننفعش نكون غير اخوات, عادي يعني الناس تبدأ بصداقة وبعدين يحبو بعض.
اخذ علي نفسا عميقا قبل ان يقول.
علي: بصي ياهايدي, احنا صحيح اصحاب بس دماغنا مش راكبة على بعض, يعني انا وانتي زي مابيقولو كده مبروم على مبروم ميلفش, وبعدين انا فعلا يوم ما افكر اتجوز انا اسف انا بحترمك وانتي بنت طيبة اوي من جواكي بس ليكي حركات وتصرفات كده مستفزة, يعني شوية بحجاب وشوية من غير, ليكي اصحاب كتير ولاد, على طول خروج وسهر وحاجات كده انتي معتقدة انها عادي, قولي عليا مقفل قولي خنيق, بس انا محبش الحاجات دي تكون في البني ادمه الي هتجوزها فاهماني ياهايدي.
هايدي: .............
قال بعد ان سمع صوت نهناهتها على الهاتف.
علي: وانتي مبتحبنيش ياهايدي انتي بس قلتي كده من كتر مااحنا متشابهين, انتي فعلا محتاجة حب في حياتك, عشان كده انتي افتكرتي ان ممكن نكون مع بعض, بس صدقيني ياهايدي انا منفعكيش.
لم تجبه هايدي, انما ظلت تبكي.
علي: طيب, شكلك مخنوقة ومش قادرة تتكلمي, انا هسيبك لما تهدي ورنيلي وهكلمك تاني.
لم تجبه واغلقت الهاتف واخذت تبكي دون توقف.
*******************
قالت نسمة قبل ان تخرج من غرفة ندى لتتركها مع زوجها قليلا.
نسمة: اعملك شاي ياشادي ولا حاجة؟.
شادي: لا شكرا ربنا يخليكي.
نسمة: طيب عن اذنكو بقى.
بعد ذهابها نظر شادي الى زوجته الراقدة على فراشها في بيت امها.
شادي: يلا ياندى ربنا يهديكي, قومي نروح بيتنا.
ندى: لا ياشادي انا مش راجعة معاك البيت.
شادي: بطلي تنشيف دماغيا بنتي, الدكتور قال ممكن تتحركي عادي خلاص الحمد لله, بقالك اسبوع قاعدة هنا, قومي معايا.
قالت دون ان تنظر اليه.
ندى: والدكتور قال عايزة راحةتامة وانام على ضهري ,بعد الهبوط الي حصل دا كان ممكن انزل البيبي ولا مسمعتش الي قاله يعني, بتسمع الي على مزاجك وبس.
شادي: طيب يا ستي تعالي ونامي على ضهرك في بيتك.
ندى: انا هنا في بيتي, وبعدين هنا ماما واخدة بالها مني, انا تعبانة ياشادي ولوجيت مش هقدر اخدمك ولا اطبخلك, مش هو دا الي انتو عايزينه؟, خدامة في البيت وبس.
شادي: انتي متعصبة و انا عاذرك, خلاص بقى يا حبيبتي الي يريحك, وانا كمان مش هروح البيت, انا هعد عند ماما هنا جمبك لغاية ماتشوفي انتي عايزة ترجعي امتى , كلميني وانا تحت امرك, وانا كل يوم هعدي عليكي, خلاص يا حبيبتي؟.
ندى: طبعا ماصدقت, عايز تروح تعد عند مامتك, عشان تقويك عليا كمان وكمان.
شادي: ياحول الله يارب انتي مفيش حاجة عجباكي ابدا, مش انتي الي مش عايزة تيجي, انتي بقيتي غريبة بجد, انا مبقتش عارف اريحك ازاي.
ادارت ندى وجهها بعيدا عنه وهي تقول.
ندى: خلاص ياشادي امشي, انا مش ناقصاك.
قام شادي مضطرا.
شادي: انا عند ماما , لما تعوزيني كلميني.
وخرج من الغرفة غاضبا.
**********************
نظر عمر من الشرفة على شادي وهو يخرج من بوابة المبني متوجها الى مبنى بيت والده, قال لنسمة التي تقف بجانبه متسائلا.
عمر: هي فين العربية الجديدة؟.
نسمة: اللانوس السودة الي هناك دي, شايفها ؟, شايف عربيتك؟, الي وراها لا الي بعدها.
عمر: ههههههه مفيش غيرها لانوس يا نسمة اكيد شفتها, يعني الخناقات دي كلها وفي الاخر جاب دايو بس.
نسمة: ماهو على قد فلوسهم, انت بتتريأ عليهم؟.
عمر: لا يا حبيبتي مقدرش اتريأ, بس انا صعبانين عليا اوي, انا حاسس انهم دايما متكهربين, , ربنا يهديهم بجد.
نسمة: انا خايفة نبقى زيهم.
عمر: وهو احنا زيهم؟.
نسمة: انا بقول انا خايفة.
عمر: انتي عارفة ايه مشكلتك يا حبيبتي, انك بتخافي كتير, دايما حاطة اخواتك قدام عنيكي , كانك هتعملي زيهم, بس انتي مش زيهم, انتي مختلفة.
نسمة: بص ياعمر الدنيا الي احنا فيها دي بقت تخوف, بقيت مش عارفة الصح من الغلط.
عمر: لا غلط طبعا, الصح باين زي ما الغلط باين, مش معنى ان الناس كلها بتعمل الغلط يبقى الغلط قلب صح, لا طبعا, انتي مثلا لو نزلتي لقيتي الناس كلها لابسة نضارات شمس واحنا باليل هل دا منطقي؟, لا طبعا, طب دا معناه انك غلط انك مش لابسة نضارة زيهم؟, لا طبعا, لازم تحافظي على استقلاليتك وحرية اختيارك في الصح, وبعدين امشي عدل يحتار عدوك فيك.
نسمة: بس صعب اوي الواحد يمشي عدل في الزمان دا.
عمر: ايه دا؟ انتي بتلعبي بديلك من ورايا ولا ايه؟.
نسمة: هههههههههه , والله ياعمر انت فعلا احلى حاجة في حياتي, انا ربنا اكرمني بيك.
اقترب منها وهو يقول بهدوء.
عمر: بجد, امال مش باين عليكي يعني, مش عايزانا نتجوز.
نسمة: عمر انا فهمتك ميت مرة, انا مش هتجوز الا لما استلم شقتي, شغل المفروش والعزال دا انا مبحبوش, ومامتك متفقة معايا على كده, وبعدين احنا مش مستعجلين انا لسه صغيرة وانت كمان, وبعدين اصبر لما اخلص الدراسات الي انت زنقتني فيها دي على الاقل.
عمر: ماشي يانيسو, شوفي انا طيب ازاي معاكي اهه انا سايبك تتدلعيلك يومين, بس كله هيطلع عليكي بعد الجواز ان شاء الله.
نسمة: عمر.
عمر: والله انا الي ربنا رزقني بيكي, بغض النظر عن الهبل الي عندك دا, بس انتي بنت كويسة يا نسمة والله العظيم.
نسمة: ربنا يخليك ليا ياحبيبي ويباركلي فيك.

الحلقة التاسعة والسبعين

هايدي: انا مخنوقة اوي من حياتي يا نسمة, عارفة الكلمتين الي قالهملي علي دول وجعوني اوي, هو اكيد مكانش قصده, بس عارفة تحسيه كان بيرفضني بالذوق, انا حسيت اني رخيصة اوي, واني كنت بحدف نفسي عليه.
نسمة: يعني انتي حاسة باية دلوقتي؟.
هايدي: انا مش حاسة بحاجة, انا قرفت, قرفت من كل حاجة, من الولاد والخروج ومن اصحابي ومن الدنيا, انا مش عارفة ربنا سايبني كده ليه؟.
نسمة: استغفر الله العظيم, ايه يا بنتي الي بتقوليه دا, انا قلتلك الكلام دا ميت مرة من زمان, انتي الي مصدقتنيش, قلتلك الي بيحصلك دا كله والدنيا الي واخداكي وكل الي بتعمليه دا مسيرك تزهقي, انتي فاكرة انك كده مبسوطة عندك شلل اصحاب, وكل يوم في حتة شكل, ومسافرة من مكان لمكان, واللبس واللف بالعربية, كل الحاجات دي حلوة بس فيه حدود وفيه اهداف تحطيها , وفيه حقوق ليكي وحقوق عليكي يا هايدي.
هايدي: بس انا كنت فاكرة ان الي بعمله عادي, مانا كل اصحابي كده, وماما عمرها ماقالتلي انتي بتعملي ايه.
نسمة: بس انتي كنتي من جواكي حاسة ان فيه حاجة مش مظبوطة.
هايدي: انا زعلانة اوي, انا نفسي ماكنتش اعرف الولاد دول كلهم, نفسي ماكنش قابلت حد فيهم, انا كان نفسي ابقى زيك, انا بحسدك اوي يا نسمة , انتي بتحبي عمر بجد وهو كمان بيحبك, انا مفتكرش ان بقى عندي روح احب تاني خلاص, انا على قول كريم اشهر من نار على علم, ونمرتي بتيجي من مجلة النجوم, متتخيليش يانسمة كريم دا كلامه عمل فيا ايه, انا قرفانة من نفسي بشكل.
نسمة: بصي ياهايدي انتي محظوظة ياحبيبتي , بنات كتير كانو زيك ومجاتلهمش الفرصة يكتشفو ان الي كانو فيه غلط, وفضلو في التوهان دا كتير, انتي المفروض تحمدي ربنا ان انتي عرفتي دلوقتي ان كل دا مالوش لزمة, انا بقول انتي لازم بقى تصلي ركعتين شكر لربنا يا هايدي, اللي انتي فيه دا نعمة مش حاجة وحشة.
*********************
سلمى: انا اسفة يا شادي, انا مكنتش اتمنى اني اكون سبب مشكلة بينك وبين ندى.
شادي: يا لومي مش انتي السبب, المشاكل الي بيني وبين ندى كتيرة واسبابها كتير مش انتي بس.
سلمى: برضة انت غلطان ياشادي مقلتلهاش ليه؟, الموضوع مفيهوش حاجة يعني.
شادي: انتي ليه مصرة تتكلمي عن المواضيع دي, يا لومي احنا خارجين من المكتب عشان نغير جو, تقومي تفكريني وتخنقيني.
سلمى: انا اسفة يا شادي, اصل انا حاسة بالذنب, يعني لو ممكن اروح افهمها......
قاطعها بحدة.
شادي: تفهمي ايه يا شيخة, انتي بتفهمي عربي يا سلمى, بقلك ندى مش شايفة قدامها, قاعدة بتشوط وبس .
قالت باستسلام.
سلمى: المهم انت متضايقش نفسك.
شادي: انا مش متضايق, انا بس متضايق عشانها, هي حامل ومينفعش الي بتعمله كده, كله على اعصابها بالشكل دا.
وصمتا لفترة فقالت هي محاولة تغيير مجرى الحديث.
سلمى: انا معجبة اوي بفكرة المكتب, انا معاكو من الالف للياء طبعا, ايه يعني الصبح في الشركة وبالليل ابقى معاكو, لغاية بس مايقف المكتب على رجليه, وبعدين نبقى نسيب الشغل, مش زي ما المجنون وليد هيعمل, هيسيب الشركة ويتفرغ ليه.
شادي: انا شايف ان وليد عنده حق, لازم يكون عينه على ماله عشان يشتغل ويحط كل مجهوده فيه, هيسيب شغله عشان يركز في حاجة واحدة, لان صاحب بالين كداب.
سلمى: وانت هتعمل ايه؟.
شادي: لا طبعا مقدرش اسيب دلوقتي, انا عندي مسؤليات و البيبي الي جاي دا مش عارف والله هعمله ايه, احنا اخر فلوس معانا حطيناها في المكتب, والعربية ماما جابتها.
سلمى: يابني متحسبلهاش, الولاد بيجو برزقهم وببركتهم.
نظر اليها قليلا قبل ان يقول.
شادي: انا كان نفسي تكوني انتي وندى اصحاب, انتي واحدة كويسة اوي.
سلمى: يوووووة بطل بقى, واحدة كويسة واحدة كويسة, وهو انا كنت قلتلك اني مش كويسة.
"لا مش ممكن, اخر اتنين كنت اتخيل اشوفهم ابدا في حياتي".
قاطعهما صوت ساخر مهلل, فالتفتا ليجداه سامح صديقهما العتيد.
شادي: لا مش ممكن سامح.
قبل سامح شادي, وقال وهو يجلس الى طاولتهما.
سامح: ازيك يا بنت يا لومي, والله وحشاني.
قالت ببرود.
سلمى: ازيك.
شادي: ايه ياخبارك يا عم؟, انت عارف ان من يوم فرحك مسمعتش عنك حاجة, اخبار ميسون ايه؟.
سامح: ياعم جيب سيرة حاجة كويسة, انا طفشان, انت اخبار ندى ايه؟.
شادي: الحمد لله, دي ندى حامل.
سامح: مبروك ياباشا, يلا يتربى في عزك, انا برضة مراتي حامل.
شادي: لا والله الف مبروك,بتشتغل فين دلوقتي , سمعت انك نقلت.
سامح: انا مقدم في شركة في السويس, شركة بترول كده يعني, ربنا يكرم بس, اهو الواحد يعد هناك يغير وقت, وبعدين كام كيلو وابقى في السخنة, اهو تغيير.
شادي: شوف الواد يقول ربنا يكرم, وبعد كده عايز يشتغل عشان يروح السخنة على طول.
سلمى: طول عمره عايز ربنا يكرم بالطريقة دي.
سامح: ياستي بلا نيلة, الا اخبار الواد هاني اخوك ايه, الواد دا حبيبي كان خليفتي في الملاعب.
شادي: اهو هاني دي بقى الي فلت فلتة هباب, سجاير وحشيش وبنات واخر بوظان والاسم ظابط.
سامح: ابقى سلملي عليه, دا واد مية مية.
شادي: امي عايزة تخطبله, بتدورله على عروسة عشان يتلم.
سامح: اوبا , الواد دا مالوش في الجواز على فكرة, هيعذبكو.
سلمى: ربنا يهدي.
سامح: وبمناسبة الهداية, شفتلك مين بقى, هايدي مراد, البت ماشية متعرفهاش, اقسم بالله كنت شايفها من اسبوعين رقاصة ماشية, امبارح شفتها لابسة طرحة ومفيش نقطة ميك اب في وشها وشكلها زي الي ميتلها ميت.
شادي: اصلها عقبال عندك ربنا هداها بجد , بطلت كل حاجة.
سامح: في اسبوعين, انت بتصدق, يابني دي هايدي, ام اللخبطة كلها, يعني يومين وتلاقي كبارية اشتغل في وشها.
سلمى: الله اعلم انت دخلت جوة قلبها يعني.
شادي: مالك يا لومي بتكلميني بغلاسة ليه؟, ولا عشان يعني جيت قطعت عليكو.
احمر وجهها بشدة وقالت بهجوم.
سلمى: انت هتستهبل يا سامح, ايه بقطع عليكو دي؟, احنا نازلين نتغدا بره عشان هو مفيش حد عنده في البيت يغديه, وكنا بنتكلم في شغل.
سامح: ماشي ياحنينة, متتحمقيش اوي,انا مسألتش كنتو بتعملو ايه, المهم اني شفتكو.
وصمت قبل ان يقول لسلمى بلهجة ذات مغزى.
سامح: على فكرة شفت صاحبتك وجوزها, وبصتلي من فوق لتحت اوي يعني, ابقي قوليلها مين فات قديمة تاه ياريكا.
وغمز بعينه في سخرية, قبل ان يقول.
سامح: شادي حبيب قلبي, على تليفونات بقى, وابقى تعالالي السخنة, هههههههه.
وانصرف فقالت سلمى بعد انصرافه بغيظ شديد.
سلمى: يااااااه الولد دا مقرف بشكل, دي الحمد لله ان ربنا خلص ريكا منه, دي ربنا بيحبها انها بعدا عنه قبل ماتتدبس فيه.
**********************
هالة: انا عايزة اتكلم معاكي ياندى.
افاقت ندى من شرودها واعتدلت وهي تزيح كوب الشاي الفارغ من امام المنضدة, وعدلت من وضع ساقيها على المقعد الصغير بشرفة المنزل ببطء.
ندى: اعدي.
جلست هالة وهي تقول.
هالة: عاجبك قعدتك دي هنا؟.
ندى: ايه ياهالة, انا مش قاعدة على قلبك.
هالة: وهو انا قاعدة هنا اصلا يا ندى عشان تعدي على قلبي, انا قاعدة في بيتي, وهو دا المكان الي المفروض تكوني فيه, بيتك.
ندى: انا زعلانة من شادي.
هالة: برضة مينفعش, مهما زعلتي واتضايقتي من جوزك, متسبيش البيت, متعوديش الراجل ابدا ان مفيش ست في البيت, ولا تعوديه ان مامته هي الي بتعمله وبتسويله, في ثواني هيتنسي كل الي انتي عملتيه كويس, ومش هيفتكر الا مامته وبس.
اشاحت ندى بوجهها وهي تقول باكبار.
ندى: انا قاعدة عشان عيانة.
هالة: متتلككيش ياندى, انتي قاعدة هنا مريحة, مش عايزة تتحملي مسئولية بيتك, كنتي بتتجوزي ليه بقى لما انتي مش قد الجواز, انتي كبرتي ياندى, بقيتي زوجة وبكرة تبقي ام, لعب العيال دا مينفعش خالص مع الي جاي......
استوقفها في هذه اللحظة سلسبيلا تحاول مد يدها الصغيرة لتجذب هاتف هالة فكاد يسقط, فالتقطته هي بسرعة وهي تشهق, ثم حاولت تخبئته, فاقتربتت الطفلة توق.
سلسبيلا: ماما....عايزة....
هالة: لا يا ليلو دا كخ, روحي العبي بعرايسك هناك اهم.
سلسبيلا: ماما....عايزة...الو...دا....عايزة.
هتفت بها.
هالة: خلاص بقى يا ليلو, يلا روحي لتيتا.
انطلقت سلسبيلا تبكي تبحث عن جدتها.
هالة: كنا بنقول ايه؟,...اه...يا ندى انتي جوزك ابن امه من يومه, وانتي بالي تعمليه دا بتديلها الفرصة ترجع تسيطر تاني...انتي عايزة كده؟.
ندى: لا.
هالة: طيب يا بنتي, قومي ارجعي بيتك, انتي بقالك اسبوع هنا, عيب كده, بتشوفيه ساعة في اليوم زي الغرب, انتي الحمد لله حالتك احسن, وبعدين ماما قالتلك لو على الاكل اهي هتبعتلك كل يوم الغدا مع نسمة, يلا يا ندى اعقلي بقى وقومي واستغفري ربنا كده ربنا يهديكو, انتو بس الي مفضيكو للمشاكل انكو مفيش وراكو غير بعض, بكرة لما يبقى عندكو قرد زي ليلو كده بيلعب في كل حاجة مش هتفضو حتى تتكلمو, قومي يابنتي قومي.
***********************
شادي: حبيبي خليكي انتي مستريحة انا هجيبلك الاكل لحد عندك, انا فرحان انك رجعتي يا ندى.
قامت ندى من الفراش ببطء وهي تقول.
ندى: لا مش عشان اريح نفسي اوسخ اوضة النوم انا كده هتعب نفسي زياة, وبعدين عايزني اسيبك انت تحضر العشا عشان تقلبلي المطبخ مورستان.
شادي: يا ستي انا عايز اريحك.
قامت ترتدي خفيها وهي تقول.
ندى: لا يا سيدي, مش كفاية البيت كله مليان تراب, انت سايبه كده ليه من اسبوع؟, امال فالح بس عند مامتك تعمل المواعين وتنضف وهنا مستني الخدامة, هقوم اشيله انفضه كله بكرة, انت عايز مامتك تفضحنا.
تبعها شادي الى المطبخ وهو يقول.
شادي: انتي غبية ياندى؟, عايزة تقلبي البيت ازاي يعني, كلمي مامتك تبعتلك مرات البواب, والله انتي عايزة تضيعي نفسك.
ندى: حاضر يا حبيبي, هكلمها بس ضروري قبل ما مامتك تيجي, مقلتليشعملت ايه النهاردة؟, العروسة عجبت طنط؟.
شادي: لا يا ستي, بتقول عليها سمرا.
ندى: وهي امك هيعجبها حاجة برضة, عايزة عروسة حلوة ومتدينة وبنت ناس وغنية ومؤدبة, تجيبها منين دي معرفش, وترضى بهاني على ايه انا مش عارفة.
شادي: لا ياستي, دا هاني راكب دماغه مش هيتجوز الا نيرمين الي بيحبها دي.
ندى: نيرمين حمدي, والله الواد دا اهبل, امال لو مكانش عارف سمعتها.
شادي: ماهي سمعتها كلها معاه, ولا انت نسيت اللي فات يا حبي, ماحنا كنا كده برضة.
ندى: لا بس انا عمري ما كنت معاك اوفر كده, لا يا حبيبي شوف نيرمين دي اسمها في اي حتة بيرن ازاي,وانا كنت ازي, بقى انا كنت كده يا شادي برضة اخص عليك.
قال وهو يهم بالخروج من المطبخ.
شادي: لا ياحبي انا اقدر اقارنك بحد اصلا.
ندى: المهم هو هيعمل ايه؟.
هتف وهو خارج.
شادي: مفيش حالف لو مجوزتهالوش هيسيبلها البيت, منا بقلك هاني بقى متدلع على الاخر, وبيقول اشمعنى شادي جوزتوه الي عايزها.
قالت ندى بصوت خفيض متهكم.
ندى: تيجي نيرمين الهبلة دي تتفرج علينا, بكرة تقول ابو الحب على الي عايزة, اهي امه بتطلع اختياره على دماغي انا.
عاد يطل برأسه من باب المطبخ.
شادي: بتقولي حاجة ياروحي؟.
ندى: لا ياحبيبي مفيش, بقول ربنا يعقله او يهدي مامتك وتخليه يتجوزها.
وعادت تقول بخفوت.
ندى: يلا ماهي لازم تجرب برضه, اهي حتى تشيل عني شوية مبقاش انا لوحدي في الهم.
************************
انهت هايدي صلاة العشاء وهي تبكي, وجلست قليلا على سجادة الصلاة.
هايدي: يارب انا مش عايزة حاجة خلاص, انا تعبت ومش عارفة افرح, لو مش عايزني خدني, انا مبقتش عارفة انا عايزة ايه ورايحة فين, انا خلاص مش قادرة اعمل اي حاجة من الي كنت بعملها زمان انا مبقتش مبسوطة, انا متبسطتش مع ولا ولد عرفته و اصحابي كلهم اندال, وزهقت خروج ولبس وفسح وبس, حسيت اني خلصت,انا بجد تعبانة, وماليش غيرك اشكيله, لو مش هتقبلني يبقى خلاص انا ماليش امل, يارب اثبتلي انك قبلتني, انا مستحقش انك تسامحني وتغفرلي, انا قرفانة من نفسي اوي, يارب شيل حبي لعلي من قلبي, انا خلاص مش عايزاه ومحدش هيساعدني غيرك, انا خلاص مبقتش عايزة احب تاني, انا بجد مش عارفة انا عايزة ايه, بس انا الي عارفاه اني مش عايزة ارجع تاني زي ماكنت, يارب ساعدني انضف من كل حاجة وحشة لسه ورايا, يارب ساعدني يارب ساعدني يارب ساعدني.
واخذت تبكي بشدة من قلبها.

الحلقة الثمانين

عمر: انتي عارفة يانسمة, انا كتير اوي فكرت ابعدك عن هايدي, وقلت سمعتك وكده, كنت بسمع كلام من اصحابي بصراحة عنها وعن شكلها وطريقتها, بس انا دلوقتي بحمد ربنا ان سبتك معاها.
نظرت اليه نسمة بدهشة وهي تقول.
نسمة: غريبة , مع انك عمرك ما بينتلي دا.
عمر: يا حبيبتي انا واثق فيكي, صحيح الصحبة الوحشة ليها تأثير سيء, بس انا كنت حاسس ان تأثيرك انتي ممكن يكون اقوى, وبعدين انتي مكنتيش صاحبتها اوي.
نسمة: والله ياعمر هايدي دي طلعت غلبانة اوي, الي كان مضيعها مامتها والجو الي هي كانت عايشة فيه, انا كنت متأكدة ان اكيد في يوم هتزهق او هيجيلها اكتئاب وتعرف ان كل دا مالوش لزمة, هي كانت عايشة تدور على الحب وبس, عايزة تحب وخلاص مبتفكرش في بعدين, ربنا بس يهديها ويثبتها.
عمر: انا صحيح عمري ماكنت اتخيل اني اقولك الكلام دا, بس انا عايزك متسبيهاش دلوقتي خالص, عايزك تفضلي جمبها عشان هي في مرحلة اللخبطة ومحتاجة حد يساعدها.
نظرت اليه لبرهة.
نسمة: حبيبي انت طيب قوي.
عمر: دا ربنا الي خلاكي سبب في حياتها عشان تغيريها.
نسمة: بالعكس يا عمر انا كنت مبكلمهاش في حاجة خالص, سبحان الله ربنا لما يحب يغير حد بيغيره في لحظة, حتى الناس الي متبقاش متخيل ان ممكن يكونو كويسين بيتغيرو في لحظة, سبحان الله, يعني هايدي دي انا مكنتش بحبها ابدا, دلوقتي صعبانة عليا.
عمر: يا ستي عشان كده انا لما بقلك متحكميش على حد من اول مرة, الله اعلم هيكون مصيره ايه بعدين ممكن كل ذنوبه دي تتقلب حسنات ويكون احسن منك انتي, ادعيلهم وبس, وربنا هو الي بيختار مش احنا يا بطيخة.
نسمة: انا بطيخة.
عمر: اه ويا تطلعي قرعة يا حمرا.
نسمة: انا قرعة؟؟.
عمر: والله معرفش بقى معادش فيها حاجة مضمونة اليومين دول.
نسمة: ماشي ياعمر, يعني انت لازم تكمل كلامك الحلو بكلمتين زي الزفت.
عمر: انا اقدر ياحبيبي, دانا مستني تخلصي بقى عشان نفضى ونعرف تخرج براحتنا , والله يا نسمة انا خلاص اول ما استلم الشقة لازم اخلص شغل فيها على طول وخلصتي بقى دراسات مخلصتيش هنتجوز.
نسمة: عمر!!.
عمر: مش بمزاجك, انا الراجل وانا اقول ويتسمع كلامي, هه بقى يانسمة يالي دماغك ناشفة, انا بصراحة بقى عايز اتجوز, ...ششششش مش عايز مناقشة بقى في الموضوع دا, بطلي بقى, يعني مش هعرف امشي كلمتين عليكي ولا ايه؟, قلت هنتجوز يبقى هنتجوز, بنات ايه دي الي مش عايزة تتجوز, انا هتحايل عليكي ولا ايه.
******************
قالت زوجة ايمن لندى اثناء خروجهما سويا مع زوجيهما.
ولاء: بتقولي على جوزك هادي ياندى, متعرفيش ايمن بقى, ايمن مبيتكلمش معايا الا قدام ماتشات الكورة مبسمعش منه الا جون وشوط ياراجل, غير كده بيرد على قد الكلام فعلا, ومبلاقيهوش بيتكلم ويهرج الا مع اصحابه , زي ماحنا موجودين كده النهاردة.
نظرت ندى الى زوجيهما وهما يضحكان ويتمازحان وقالت وهي تتنهد.
ندى: ماهي المشكلة ان جوزي بيضحك مع اصحابه, انا مش عايزاه مايضحكش معايا بس المهم ميضحكش معاهم.
ولاء: اهو انا بقى مش عارفة انتي ازاي بتستريحي لسلمى صاحبته دي؟.
التفت اليها ندى بحدة ونظرت اليها باندهاش قبل ان تقول.
ندى: مش كده برضة؟؟.
ولاء: يعني انا عارفة انها كانت صاحبتكو وانتو في الجامعة, بس انا لو مكانك كنت اتجنيت, انا ايمن خليته يبعد عن كل حاجة كان يعرفها وهو صغير, جامعة ايه انا ناقصة, الرجالة ياختي ملهمش امان خالص مهما كبرو, صحيح انا عارفة ايمن لا بيهش ولا بينش, بس ميتخافش الا من نظام الاصحاب والشغل والحواديت دي, الواحد بيسمع حكاوي غريبة.
ندى: الله!!, يعني مش انا لوحدي بقى.
ولاء: اصل ياندى ياحبيبتي هما بطبعهم اعداء الشغل تقوليلهم ليه يقولولك مبحبش الكلام والهزار والاختلاط والكلام الفاضي دا, وتيجي تتكلمي على مش عارفة مين صاحبته في الشغل تلاقيه بيقلك لا لا لا دي واحدة محترمة, يعني وهو انا لما هشتغل هبقى مش محترمة.
ندى: بس سلمى اصلا....مش مريحة.
ولاء: انا مش عارفة مالهم متمسكين بيها كده ليه؟, دي اسراء كانت اشطر منها, وقال ايه عايزين ياخدوها معاهم في المكتب.
صاحت ندى.
ندى: نعم ؟, كمان؟.
ولاء: انا صحيح اسراء مكنتش بحبها , بس ادينا عارفينها وبننتقضها كلنا, بس يجيبلي واحدة الكل بيشكر فيها , اهو كله الا ده, البنات الي يتخاف منها دلوقتي الي عاملين طيبين دول مش الي باينين على وشهم الحقيقي.
ندى: انتي كأنك تعرفيها بالظبط.
ولاء: انا شفتها مرة يا بنتي ومستريحتلهاش, مسهوكة كده وناعمة, انا مبحبش البنات الورق دول, امال بتشتغل في مكتب فيه تلات رجالة ازاي.
ندى: وهما مش شايفين كده.
ولاء: ياختي علي حصلي لما جيت اقول لايمن كده, قالي انتي لاعاجبك دي ولا دي, لا المحترمة عاجباكي ولا الوحشة كانت عاجباكي اعملك ايه؟.
قالت ندى تحدث نفسها في غضب.
ندى: يعني عايزينها معاهم في المكتب, طيب ياسي شادي.
******************
شادي: مالك؟.
صمتت ندى ولم تجبه ونظرت الى الطريق في غيظ.
شادي: ندى انا بكلمك, متعمليش طرشة الله يخليكي, بوزتي ليه في نص القعدة وقفشتي.
ندى: .......
شادي: فيه ايه مالك ياندى؟, مش هقول تاني؟.
التفتت ندى تقول ببرود.
ندى: مانا مش عايزة اكلمك مادام انت مبتتكلمش معايا.
شادي: اتكلم معاكي ازاي يعني مانا بتكلم معاكي اهه.
ندى: اتكلم معايا كده وقولي الي بيحصل , رجعت تخبي عليا تاني واحنا ملحقناش, ومبقاليش اسبوع راجعة بيتي, تقدر تقولي بقى ليه سلمى هتبقى معاكو في المكتب.
ضرب شادي بقبضتة على عجلة قيادة السيارة في ضيق وهو يهتف.
شادي: ييييه يخرب بيت السوس الي في دماغك دا, ماطبيعي ياندى ان دا الي يحصل, اول ناس عرض عليهم وليد المشروع كان احنا, وهي وافقت تكون فيه, اعمل انا ايه يعني؟, اروح اتشرط عليه اقله بلاش سلمي عشان مراتي راكبها عفريت اسمه سلمى.
ندى: انت بتتريأ ؟, انت مش دافع في المشروع دا وليك حق تتكلم؟؟,طب ياسي شادي انا مش عايزة زفتة دي تشتغل معاك.
شادي: استغفر الله العظيم يارب, انا ماليش اني اقطع رزق الناس ياندى, انا مالي.
ندى: كده ياشادي؟, والله ارجع اعد عند ماما.
شادي: انتي هتتشرطي عليا, ماتعدي عند امك ولا عند ابوكي, انتي حرة, انتي بتتلكي اصلا من ساعة مارجعتي وعايزة ترجعي, انا قرفت من قرفك دا ليل مع نهار.
بهتت لهجومه العنيف عليها وعصبيته فقالت.
ندى: بقى كده يا شادي؟, .....انت بتقولي اتفلق, طب لف, لف رجعني عند ماما, انا اصلا كنت غلطانة اني رجعت البيت, انت مش هتتغير.
شادي: انا برضة الي مش هتغير, شوفي نفسك ياهانم عاملة زي المجنونة وبتمسكي في اي كلمة عايزة تتخانقي, انا اصلا قرفت, قاعدة مقرفاني في حياتي وشغلي, انا مبعملش حاجة غلط, عشان كل شوية تكرهيني في حياتي بالشكل , وقاعد احاسب عليكي احاسب عليكي اقول معلش عشان حامل, بس انا مش هستحمل الجنان دا كتير,مش مشكلتي ان انتي تعبانة في مخك, انتي حرة, روحي مكان مايعجبك.
اندهشت اكثر لانفجاره العنيف بها, فقالت بغضب.
ندى: بقى كده ياشادي, طب والله العظيم مانا راجعة تاني.
شادي: انتي حرة.
********************
قامت والدة ندى تحادث شادي بالهاتف بعد ان سمعت شكوى ابنتها وبكائها.
الام: فيه ايه ياشادي؟, مش معقول كده يا بني, كل شوية خناق وندى تيجي مقموصة, انتو ايه, البنت حامل وحملها وحش وانت عارف كده بتزعلها ليه؟.
شادي: انا يا طنط مزعلتهاش هي ندى بقت بتدور عالمشاكل من الهوا.
الام: بقولكو ايه انا تعبت منكو ومن خناقكو, دا ايه دا كل شوية, انتو عيال صغيرة؟, انا مش عايزة مشاكل ياشادي تعالى صالح مراتك, انت عايز الي في بطنها دا ولا لأ؟, عايزين تضيعو ابنكو, وانت كمان بطل تضايقها , وايه حكاية البنت الي معاك دي, انت مش هتبطل تشككها فيك.
قال شادي بنفاذ صبر.
شادي: اشككها ايه بس يا طنط, دي هي الي مجنونة وبتتخيل حاجات من الهوا, وطبعا الي هيسمعها هيصدقها عشان بتعد تعيط وتنهار.
هتفت به الام في غضب.
الام: اسمع ياشادي, دلوقتي ابوها مسافر النهاردة, مش عايزاه يرجع بكرة يلاقيها عندي في البيت, يقول عليك ايه؟, تعالى صالح مراتك وارجعو بيتكو ربنا يهديكو, دا ايه دا الي كل شوية خناق دا, انتو مجانين؟.
صاحت ندى من خلفها.
ندى: انا مش عايزاه يجي, ومش عايزة اشوف وشه ياماما.
اشاحت لها امها بيدها في غضب بينما قال شادي.
شادي: سامعة يا طنط عشان تعرفي ان مش انا المجنون.
الام: خلاص يا شادي خليك انت العاقل وتعالى.
شادي: حاضر يا طنط عشان خاطرك انتي بس.
الام: ماشي يا حبيبي هستناك.
********************
جلس شادي بهدوء في غرفة ندى التي وقفت تضع كفيها في خصرها بحنق, بينما خرجت والدتها من الغرفة واغلقت الباب خلفها.
شادي: مبسوطة انتي من الي بيحصل دا, كل شوية فاضحانا ومطلعاني عيل عند اهلك.
ندى: ايوااااااااه خدني في موضوع تاني بقى عشان انسى موضوع سلمى, انا نفسي اعرف سلمى دي عملالك ايه وعايزة منك ايه؟.
شادي: انا مش عارف انتي بستفزيني ولا ايه بالظبط؟.
ندى: انا الي بستفزك برضة ولا انت الي خلاص مبقتش طايقلي كلمة.
شادي: انتي الي حاطة كل مشاكل الدنيا في ايدك ومش لاقيه غيري تحدفيهم عليه, عملتلك ايه سلمى فهميني, واحنا صغيرين قلتيلي معرفش اية وبتحبك وبتاع, ودلوقتي عينها فيك, عملتلك ايه هي لكل دا, البنت كافية خيرها شرها مبتعملش غير كل خير, مبقصدهاش في خدمة الا مبلاقيها تعملهالي من غير ماتعوز مني حاجة, غير السوس الي في دماغك دا, لكن انتي ازاي تسكتي, لازم تعملي خناقة وتيجي تعيطي, وتكبري الدنيا وتهري في نفسك عشان الكل يجي عليا.
ندى: انا؟.
شادي: ايوة انتي ودي عادتك من زمان, تيجي تعملي ضحية قبل ماحد يكتشف انتي عاملة ايه.
ندى: وانا عملت ايه ان شاء الله.
عمر: قاعدة بتتهمي جوزك , وفاضيالي بقى, لا رحت لاجيت, وقاعدة مش لاقية مشكلة قلتي تعملي سبمى مشكلتك, مع ان البنت عمرها ما عملتلك حاجة, دي بتعزك مع انك متستاهليش, دي حتى الشغل الي انتي بتشتغليه دا ياهانم هي الي جايباه.
توقفت ندى لبرهة تنظر اليه غير مصدقة محاولة استيعاب حديثه.
ندى: شغل... شغل مين؟, شغلي انا؟, سلمى الي جايبه يا شادي؟, الله يخرب بيتك يا سلمى, انت ازاي تعمل كده, وانت تقولها وتطلب منها ليه, انت مصمم تدخلها في حياتي ليه, انت بتعمل فيا كده,...اطلع برة يا شادي,...وقال جاي تصالحني, انت جاي تشلني,...امشي يا شادي بدل ما امشي انا, ...بس هامشي اروح فين انا في بيت ابويا,....اه انا مش قادرة... اه انا بجد مش قادرة ااااه....الحقني يا شادي.
****************
وقف شادي في غرفة الانتظار بالطواريء بالمشفى مع والدة ندى القلقة , ونسمة التي انزوت تدعو الله , وهو ينظر اليهما في قلق, لقد تشاجر مع ندى بشدة هذه المرة, وعلا توترهما واضطرابهما حتى بلغ من ندى مبلغه, وبدأت في الانهيار, وحدث اثناء ضغط المشاجرة ان داهمها نزيف جعلها تسقط من الاعياء, فما كان منهم الا ان نقلوها بسرعة الى المشفى.
خرجت الطبيبة تنظر الى والدة ندى بضيق وقالت.
الدكتورة: مدام حضرتك والدتها؟.
قامت والدة ندى بفزع.
الام: ايوة انا مامتها.
الدكتورة: للاسف هي النزيف الي جالها دا كان نتيجة توتر كتير حصلها وهي كان عندها مشكلة في تثبيت البيبي اصلا , فالي حصل للاسف انه نزل.
شهقت نسمة واختفى الدم من وجه شادي.
الام: طب وبنتي عاملة ايه؟.
الدكتورة: هو مفيش اي قلق على مدام ندى, وهي لسه صغيرة ان شاء الله وربنا يرزقها بولاد وبنات كتير ان شاء الله, الموضوع دا عادي وبيحصل لبنات كتير, الي مبيكونوش عارفين انهم حاكمل او الي اعصابهم على طول تعبانة, انا بس مش عايزاكو تضايقوها عشان هي ممكن يجيلها زعل جامد بعد الحكاية دي, يعني حسسوها انكو حواليها, عشان هي دلوقتي هتبقى ضعيفة اوي ومش عايزين يجيلها اكتئاب.
بدأت والدتها في البكاء.
الام: يا حبيبتي يا بنتي.
الدكتورة: لا يا مدام امسكي اعصابك, انا بقلك مش عايزة يبان عليكي حاجة عشان صحة بنتك, ان شاء الله تشد حيلها وربنا يرزقها تاني.
وتركتها وانصرفت فجلست الام تبكي, فتوجهت نسمة اليها تهدئها, في الوقت التي وصلت فيه هالة وزجها ليعرفا بالخبر.
كل هذا وشادي متوقف بجانب الباب مندهش تماما لا يكاد يفهم مشاعره التي اختلط عليه فيها الغضب والحزن والضيق والخوف .

جميله يا نونااا
تسلم ايدك يا قمر

ميرسى يا سوسو
منوه ياحبى

الحلقه 81
الحلقة الاولى من الفصل التاسع

نسمة: معلش ياشادي بلاش تيجي دلوقتي هي اخدة منوم اصلا ونايمة.
شادي: يانسمة متكدبيش عليا انا عايز اشوفها.
نسمة: والله العظيم مابكذب عليك, والله ندى نايمة واخده منوم عشان مانامتش طول الليل, بلاش النهاردة كمان يا شادي لحد بس ما اعصابها تهدا.
قال شادي بحزن.
شادي: والله يا نسمة مش انا السبب.
نسمة: انا عارفة طبعا, هو ربنا الي عايز كده, متعدش تفكر بس عشان اعصابك انت كمان, ربنا ان شاء الله يعوضكو بغيره.
شادي: والله انا مش عارف ابطل تفكير, فهميها كده يانسمة الله يخليكي.
نسمة: حاضر ان شاء الله.
شادي: نسمة متسيبيهاش.
نسمة: حاضر.
شادي: مع السلامة.
نسمة: سلام.
بعد ان اغلق الهاتف سمع صوت والدته خلفه.
الام: برضه مش عايزة تكلمك؟.
قال بضيق.
شادي: ماما الله يخليكي اسكتي.
الام: هي بتلومك على ايه انا مش فاهمة, هي الي مهملة ومش واخدة بالها من نفسها والي في بطنها, قاعدة تحرق في دمك على الفاضي والمليان, وفي الاخر بتعيط, ربنا بيعاقبها.
هتف بها شادي فجأة.
شادي: ياماما اسكتي انا مش عايز اتكلم في الموضوع بقى ارحميني, بقالي يومين قاعد عندك وانتي مبتسكتيش, اروح ابات في الشارع عشان ترتاحي, انتي ليه مش حاسة بيا؟,سبيني في حالي بقى.
وقام يدخل غرقته واغلق الباب خلفه في عنف, فقالت هي.
الام: منك لله ياندى يالي قالبة ابني عليا ومزعلاه من يوم ماعرفك.
*************************
ندى: مش عايزة اكل ياماما.
الام: يعني انتي هتفضلي تعيطي كده وبس, حرام عليكي ياحبيبتي نفسك , انتي تعبانة ولازم تاكلي.
ندى: مش قادرة ياماما, مش قادرة اكل ولا اعمل اي حاجة.
الام: ياحبيبتي انتي مش اول واحدة يحصلها كده , طب ما سالي بنت عمك سقطت في اول جوازها برضة ودلوقتي ماشاء الله عندها تامر و حسام.
قالت وهي تبكي.
ندى: انا مش دا الي مزعلني ياماما , انا نزلت ابني بسبب شادي وسلمى, شادي السبب.
الام: يابنتي متقوليش كده, جوزك بيحبك وبيتمنالك الرضا ترضي, والولد من ساعة الي حصل وهو بيجي كل يوم ويتصل وانتي لا بتطلعيله ولا بتردي عليه, حرام عليكي دا ابنه برضه الي راح.
ندى: ماهو راح بسببه, انا خلاص لا عايزة اشوفه ولا اسمع عنه عشان خاطري ياماما بطلي كلام.
الام: يعني هفضل قاعدة اتفرج عليكي كده وانتي بتدبلي قدامي, ياحبيبتي حرام عليكي نفسك.
ندى: متكلمنيش انا, روحي قولي للباشا انه موت ابنه, انا بكرهه.
الام: لا حول ولا قوة الا بالله متقوليش كده.
ندى: انا مش عايزة بقى حد يكلمني خلا ص سيبوني في حالي انتو عايزين مني ايه؟.
الام: انا هسيبك يا بنتي لغاية ماتعقلي, وربنا يهديكي.
*****************
نسمة: ندى.
التفتت ندى الى نسمة .
ندى: ......؟.
نسمة: شادي برة.
ندى: مش عايزة اشوفه.
نسمة: عيب ياندى.
ندى: ملكيش دعوة يا نسمة, والله العظيم ماهخرجله.
نسمة: ........
خرجت نسمة من الغرفة في توتر, وبعد قليل سمعت ندى صوت الباب يفتح فهتفت بعصبية وهي تلتفت.
ندى: نسمة مش قلتلك انا مش هخرج انتي مبتفهميش؟.
سمعت صوت شادي بدلا من نسمة يجيبها.
شادي: انا عارف انك مش عايزة تكلميني, بس انا عايز اكلمك.
قالت بهجوم ما ان رأته.
ندى: شادي!!, انت عايز مني ايه؟, مش ارتحت ؟, مش انا ريحتك.
شادي: انا الي ارتحت؟, انتي الي مكنتيش عايزة الولد دا ومكنتيش فرحانة بيه ولا يوم, وكأن انا جايبهولك غصب ولا انتي نسيتي؟.
اعتدلت في غضب.
ندى: لا دانت مش جاي تكلم بقى, انت جاي تتهمني؟, قصدك ايه بقى؟,ان انا نزلته بمزاجي يعني؟, كنت قاصدة؟.
شادي: انا مش قصدي كده ياندى, بس انا قصدي ان انتي عصبيتك وغبائك دا هو السبب في كل الي بيحصلنا دا.
ندى: يا سلام, كمان طلعتني انا الي غلطانة وانت ملاك.
رد بغضب.
شادي: مانا مش هعرف اتكلم معاكي كده وانتي بتقلبي كل كلمة بقولها.
ندى: وانا مطلبتش اتكلم معاك اصلا.
شادي: ندى انا بحذرك الي بتعمليه دا غلط, و انا مش هستحملك كتير.
ندى: وهو انت عمرك كنت استحملتني؟.
صمت قبل ان يقول بتحذير.
شادي: بقى هو دا رأيك ياندى, دا بدل مانقف جمب بعض في الي حصلنا قاعدة بتخانقيني.
ندى: بطل بقى تمثيل وكدب,. خلاص انا عرفت انك كداب وبتخبي, فاصلني عن حياتك وعن كل حاجة, مش عايزني فيها اديني ياسيدي بطلع منها اهه وبريحك.
هتف بها.
شادي: بتطلعي منها ازاي ياندى انتي فاهمة اصلا الي بتقوليه.
ندى: لا انا فاهمة كويس , وانا مش عايزة اعيش معاك تاني, مش بعد مافضلت عليا سلمى, وضيعت ابننا بعندك وخيانتك.
شادي: الكلام الي بتقوليه دا كبير اوي ياندى, وانا مش هرد على واحدة مجنونة زيك, ولغاية ماتفوقي من جنانك دا وتفوقي لنفسك مش هتسمعي صوتي ولا تشوفي وشي عشان انا مش عايز اغلط فيكي.
ندى: احسن, سهلت عليا.
فخرج من غرفتها غاضبا والشرر يكاد يتطاير منه.
*********************
هايدي: والله يانسمة اول ماعرفت جيت على طول.
نسمة: عادي ياهايدي, هي دلوقتي بقت احسن, بس نفسيا زي الزفت.
هايدي: ربنا يصبرها اكيد الموضوع مش سهل.
نسمة: لا هو سهل وعادي وبيحصل, بس هي دلوقتي مش عايزة ترجع البيت, اصلها منزلتوش عادي, دي نزلته عشان زعلت مع شادي.
هايدي: سبحان الله يعني الاتنين الي كل الناس كانت بتحسدهم على حبهم لبعض قبل وبعد الجواز يبقى دا حالهم ياربي, دول الناس الوحيدة الي حبو بعض واتجوزو, الدنيا دي غريبة اوي.
نسمة: بقى انتي برضة الي بتقولي غريبة, و الي يشوفك يقول ايه, بقى دي هايدي الي اتربيت معاها؟.
هايدي: عيب عليكي يا نسمة وهو انتي اتربيتي اصلا.
نسمة: اه يا واطية.
هايدي: هههههههه والله يانسمة بجد انا نفسي مستغربة ازاي كنت عايشة كده, الحمد لله , انا مفتكرش اني كنت بدعي ربنا زمان تخيلي, كان كل الي بدعيه يارب متفضحنيش المرة دي, يارب حمادة يكلمني, يارب اتخطب لواحد غني عشان اغيظ لؤي, ربنا ياخد امه,انتي متخيلة انا مكسوفة اد ايه من الي كنت بدعيه.
نسمة: هههههه يا بنتي انسي بقى انتي هايدي جديدة.
هايدي: قولي كده للناس, انتي عارفة يا نسمةانا بسمع كلام وتريأة من الناس ومن اصحابي في الشغل قد ايه, فاكرينه دور كده وهطلع منه قريب, انا بفكر اسيب الشغل.
نسمة: بصي يا ديدي, لو مكنتيش هتقدري تثبتي سيبي الشغل, لكن لو فترة وهتعدي استحمليها, اي مرحلة انتقالية بتبقى صعبة , انا افتكر هالة برضة ايام ما اتهدت كانت قاعدة في البيت الفترة دي عشان الحادثة فكان الموضوع اسهل علها, انتي يابنتي ربنا يعينك.
هايدي: هي ندى جوة؟, انا ممكن ادخل اسلم عليها ولا لأ؟.
نسمة: لا يابنتي ممكن طبعا تعالي اهو حتى تفكي عنها شوية, هي ليل نهار قاعدة تعيط.
*********************
شادي: مش عايزة تكلمني خالص ياسلمى, وانا كمان مش عايز اكلمها, اصلها غبية.
سلمى: بس ياشادي متقولش عليها كده, الي حصلها مش سهل.
شادي: لا ندى بتستهبل وانا عارفها, يعني هو الي حصلها دا كان ليها لوحدها, هي كده طول ماهي حاطة في دماغها حاجة مش هتشيلها, بس تتفلق, انا كنت صابر عليها ومستحملها بس عشان الي في بطنها, بس الي بتعمله دا دلوقتي استهبال, انا الي غلطان انا الي دلعتها واول ما بتتدلع بتتدلع عليا انا, ماما عندها حق من الاول.
سلمى: انتو بس تعبانين من الي حصل, ان شاء الله تعدي على خير, انتو بس بتزعلو من بعض من كتر حبكو لبعض.
قال بسخرية.
شادي: اه اوي, حب وزفت, يا شيخة يقطع الحب وسنينه, دي كانت حاجة زفت.
سلمى: لااا انت مزاجك وحش خالص.
شادي: انتي الي هادية كده وسرحانة, مالك؟.
سلمى: مفيش.
شادي: سلمى انا مش ناقصك, قوليلي مالك متعصبنيش.
نظرت للارض لحظات قبل ان تقول بهدوء.
سلمى: انا امبارح نزلت انا وماما نشوف احمد قريب وليد, واتفقنا انه يجي يتقدم في البيت.
نظر اليها شادي غير مصدق لثوان.
شادي: ازاي كده يجي البيت بسرعة, انتي تعرفيه؟, انتي لسه متعرفيهوش يا سلمى , طب استني شوية , مفيش حاجة بتيجي بسرعة كده.
سلمى: مش بسرعة ولا حاجة, انا شفته مرتين قبل كده , وبعدين....استنى ايه يا شادي؟.
صمت ولم يدر ما يقول , ثم قال بحيرة.
شادي: ....استني.
سلمى: ..........
شادي:.............
سلمى: معادش ينفع استنى ياشادي, احمد انسان كويس وميتعيبش.
شادي: وانا مقلتلكيش حاجة , انا بقول استني تعرفيه.
سلمى: مش فارقة ياشادي, معادتش فارقة, هو زي غيره, وممكن يكون احسن من غيره, يارب.
شادي: ....انتي متأكدة؟؟.
سلمى: الحمد لله.
شادي: خلاص يا سلمى ربنا يوفقك , انا عمري ماتخيلت .......اناعمري ماهتمنالك.....حد....الا كل خير يا سلمي...انتي اكيد حد كويس.
سلمى: ييييييييه ياشادي بطل حد كويس دي بقى, الكويس مش حاجة حلوة, الكويس دايما بيفضل كويس وبس, مينفعش يبقى ممتاز او مناسب, لما بتقولي كويسة انا مبفرحش, معنى كويس اني منفعش.
شادي: وانا عمري ماقصدت ازعلك, ربنا يوفقك ياسلمى ربنا الي عالم معزتك في قلبي.
تنهدت سلمى.
سلمى: ربنا الي عالم بالي في القلوب يا شادي بقى, خلي الي في القلوب في القلوب

جميله يا نونا
كملى بسرعه بقا

القصه وحشتنى جدااااااااااااااااااااااا

جميله اوى يا نونااااااااااااا

ميرسى يا قر

ميرسى يا بنوتات
بجد نورتونى
وهكملها حالا بازن الله

الحلقة الثانية والثمانون

صاحت والدة ندى في غضب عارم.
الام: قسما بالله ياندى لو سمعت منك الكلام الخايب دا تاني لاكون انا الي جايباكي من شعرك ومرجعاكي بيتك, انتي فاهمة!!.
قالت ندى وهي تبكي.
ندى: انا خلاص يامام مش قادرة, مبقتش قادرة اني ارجع البيت تاني خالص, مش طايقة شادي ولا طايقة حاجة خالص.
الام: انتي عارفة لو ابوكي سمع الكلام دا هيعمل فيكي ايه؟.
ندى: انا مش عايزاه خلاص ياماما بعد الي عمله مش عايزاه.
الام: بقلك ايه , انتي تعقلي وتسكتي , طلاق ايه وهباب ايه , امال كنتو بتتجوزو ليه وبتحبو بعض, بلا كلام عيال, انتي تسكتي بقى وتسيبي الكبار يتكلمو.
صاحت ندى.
ندى: محدش له دعوة بيا اصلا انا حرة ودي حياتي.
الام: حياتك دي لما تبقي عايشة لوحدك, لكن انتي هنا في بيتي وتسمعي كلامي والجزمة فوق رقبتك انتي فاهمة, كنا ناقصينك احنا يا ست ندى مشيلانا الهم على طول من يوم ما اتجوزتي.
******************
وليد: لولولي لولوي لولوي, اخيرا شيخ الغفر انزاح.
ضربته سلمي بمسطرة بجانبها وهي تقول.
سلمى : انا شيخ غفر يا وليد؟, ربنا يسامحك, دانا كلي رقة وانوثة.
وليد: ايه ايه كلك انوثة, طب لو كان كده كانو جابوكي معانا المكتب ليه, هما عارفين ان احنا محتاجين راجل.
سلمى: غريبة امال يعني مشغلينك فيه ليه؟.
هتف وليد وهو يصفق.
وليد: هلاهلا , دا حنا لسانا طول واتبجحنا بعد الخطوبة, انا شكلي دبستك يااحمد.
سلمى: ملكش دعوة هو مبسوط.
قال ايمن بهدوء وهو ينظر الى شادي الجالس بصمت تام.
ايمن: ربنا يهني سعيد بسعيدة.
وليد : بس ايه الي انا سمعته ده, حقا هيبقى مفيش مكتب معانا؟.
قالت بأسف.
سلمى: اه فعلا احمد مش راضي خالص, انا حاولت معاه قالي كفاية عليكي شغل واحد ميبقاش خروج مرتين في اليوم.
وليد: مانا قلتلك مقفل ومالوش في حكاية الشغل دي خالص.
سلمى: والله انا حاولت اقنعه بس احنا وصلنا لحل وسط , اخليني في شغلي وكفاية على كده وبعد اول بيبي ان شاء الله هسيب الشغل.
وليد: امال انتي فاكرة ايه, الشغل مش للي زيكو ياماما, الشغل للجدعان.
سلمى: سايبهالك تشبع فيها.
وبعد ان هدأ الحديث اقترب شادي ببطء من سلمى, وقال لها في حديث جانبي.
سلمى انا عايزة اكلمك .
شادي: متتكلم.
سلمى: تعالى نطلع برة.
داهمها بمجرد ان خرجا من المكتب واستندا الى احد الاركان.
شادي: مبسوطة؟.
سلمى: نعم؟.
شادي: مبسوطة من الي عملتيه؟.
نظرت اليه قبل ان تهتف يغتة.
سلمى: ايوة مبسوطة ياشادي, انت ايه حكايتك؟, مبسوطة, واستني؟, انت عايز مني ايه؟, ايه قصدك بالظبط؟, كنت فاكر اني هعمل ايه؟, هفضل استناك ياشادي؟, انت فاكرني لسه بحبك؟, وهو انت تستاهل للدرجة دي الواحد يضحي علشانك؟, ولا يضيع مستقبله عليك, انت ايه يعني متخانق مع مراتك, مانت مسيرك ترجعلها, مانت كل مرة بترجعلها, انا نفسي افهم انتو منين بتحبو بعض وبتعذبو بعض بالشكل دا, انا لو ربنا رزقني بحد بحبه عمري ماكنت هسيبه او ازعله, لكن انتو لا مبتقدروش النعمة, مش حاسين ان ناس كتير تمنى الي انتو فيه , ارجع ..ارجع ياشادي لمراتك زي ماكل مرة بتعمل , هتعدو تعيطو شوية وتتصالحو, انتو مالكوش الا بعض, انا ليا احمد ادعيلي , لو بتعزني بجد ادعيلي اعرف احبه واسعده, وابعد عني بقى انت عايز مني ايه, انا تعبت من ملاحقتك ليا زي النحلة انا مش ملكك ولا ملك حد, انا حرة اعمل الي انا عايزاه, ولو فاكر ان انا كنت هفضل مستنياك تبقى اهبل لان انا مش هوقف حياتي عليك.
وانصرفت عنه في غضب.
*************************
جلس شادي بقلق ينتظر ندى بغرفة الصالون التي انفتحت بغتة ودخلتها ندى في بطء, ثم اغلقت الباب خلفها في توتر.
شادي: ....انتي طلبتيني؟....
التفتت اليه ندى وجلست ببطء.
شادى: انتي مش هتتكلمي يعني؟ ,جايباني عشان تسكتي؟.
ندى: انا جايباك عشان عايزة اسمع انت هتقولي ايه؟.
جلس شادي امامها وهو يقول .
شادي: انا جاي عشان اقلك ارجعي.....
ندى: انت عايزني؟.
شادي: اه.
ندى: ليه؟.
قال بحيرة.
شادي: عشان احنا بنحب بعض, وعشان.... احنا بنحب بعض.
ندى: ولما احنا بنحب بعض مالنا؟؟.
شادي: معرفش.
ندى: بقى انت بتحبني انت, انت موقفتش جمبي لحظة من يوم الي حصل.
هتف.
شادي: لاحول ولا قوة الا بالله, وهو انتي سبتيني؟؟, انتي كنتي بتصديني مرة واتنين وتلاتة وبتبعديني عنك, وانا حاولت اكلمك واجيلك وانتي الي طردتيني, وسايباني قاعد لوحدي, محسساني انه مش ابني الي راح دا.
ندى: وهو مش انت الي سبتني عشان سلمي.
شادي: ييييييه, دا انتي مجنونة بقى, يادي سلمى الي واجعالك دماغك دي, طلعي الصراصير دي من دماغك, انا وسلمى مافيش بينا اييي حاجة, سلمي يا ستي اتخطبت, ارتحتي كدا؟؟؟؟.
ندى: اااااااه, قول كده بقى, انت مجتليش من فراغ بقى, انت جيت عشان ست الهانم اتخطبت, ملقتش غيري خلاص, قلت ارجع للهبلة العبيطة الي بتصدقني دايما,وطبعا لو مكانتش اتخطبت مكنتش شفت جلالتك.
صاح وهو يضرب كفا بكف في عصبية.
شادي: اللله يخرب بيت سلمى على بيت الي جابوها يا شيخة طلعيها بقى من ام دماغك, انتي ايه مبتتعبيش؟, وانا الي راجع متهبب عشان ارجعك بيتك, انتي مش عايزة لا نتصالح ولا نتفاهم ولا حاجة انا مش عارف انتي عايزة ايه؟,انـــــــتـــــي عايــــــــــزة ايـــــــــــه؟.
قالت بشيطنة.
ندى: عايزة اتطلق.
شادي: يعني انتي هترتاحي كده مثلا؟.
ندي: اه.
شادي: حاضر ياندى, انا هعملك الي انتي عايزاه.
وانصرف فتهاوت هي على احدى المقاعد في حزن شديد.
**********************
شادي: بقت غبية اوي ياهاني, والله بقى انا زهقت يعني هي عايزة تتطلق انا هطلقها لو هي عايزة كده, انا مبقتش مستحمل نكد.
هاني: تطلق مين يابني هو انت رايح تطلق بنت خالتك؟, دي ندى الي انت وقفت قدام ماما عشانها وحاربت كل حاجة, سهل اوي كده يعني تسيبها.
شادي: والله ساعات بندم اني وقفت قدام ماما,هو انا عملت كل دا عشان اعيش في نكد ليل مع نهار؟, كنت متخيل اني مش ممكن هقدر اعيش من غير ندى, ودلوقتي مبقتش قادر اعيش مع ندى خلاص, العيشة معاها بقت جحيم.
هاني: يادي النيلة انت بتخوفني ليه؟....بس لا لا لا انا هموت لو متجوزتش نيرمين, انا مجنون بيها ياشادي, انا لما ببعد عنها او لما بطلع مأمورية بحس اني مش طايق ننفسي, لا يا شادي انتو حاجة واحنا حاجة.
شادي: انا مش عارف اعمل ايه بجد, انا لسه بحبها اكيد, بس الحياة بينا بقت لا تطاق.
قال هاني وهو يخرج من الشرفة داخلا البيت في الظلام .
هاني: ولا يهمك انت اقلبها بس وهي هترجع تتصل بيك تقولك ياحبيبي تعالي خدني روحني البيت, ماهي كل مرة بتعمل كده.
وبينما هو يدخل الصالون سمع صوتا يفاجئه بهمس.
الام: هو شادي وندى اتخانقو؟.
انزعج هاني وانتفض في جزع ما ان سمع صوت امه, وقال.
هاني: بسم الله الرحمن الرحيم , انتي خضتيني.
جذبته من ذراعه الى احدى الغرف وقالت وهي تدفهع للجلوس.
الام: هي اتخانقت معاه برضة لما راح يصالحها؟, هي البت دي مش هتبطل الي بتعمله؟, مش كفاية سايباله البيت بقالها شهر وقاعدة عند اهلها.
هاني: انت عايزة منه ايه؟.
الام: قولي قالك ايه؟.
هاني: على شرط, تيجي تنزلي تشوفي نيرمين ومامتها.
الام: دا على جثتي.
قال وهو يقوم.
هاني: يبقى دوريلك على حد تاني يقولك الي حصل.
امسكته من ذراعه ثانية وهي تجلسه.
الام: خلاص خلاص, هعملك الي انت عايزه, بس قولي ايه الي حصل.
هاني: ماشي هقولك, بس توعديني ماتتدخلي!!.
لمعت عيناها بشدة وهي تقول بخبث.
الام: وانا عمري ما اتدخلت في حاجة الا عشان المصلحة؟؟.
**************************
صاحت هالة بندى في غيظ.
هالة: انتي فعلا بني ادمة غبية ومفيش حاجة ترضيكي يعني الراجل جالك لحد عندك يصالحك ويرجعك بيتك معززة مكرمة وانتي قلتيله لا.
ندى: انتي مش فاهمة حاجة, انتو كلكو مش فاهمين حاجة, شادي مرجعش الا لما سلمى اتخطبت.
هالة: يييييه يادي سلمى , هي مش سلمى دي الي انتي فضلتي طول عمرك تغيري منها وهو اثبتلك مرة واتنين انه بيحبك انتي, لانه فعلا بيحبك انتي ولا انتي ناوية على خراب بيتك ولا انتي عايزة ايه بالظبط.
ندى: انتو مش فاهمين حاجة, انتو كلكو مش فاهمين, الحاجات دي مش بانه بيرجعلي في كل مرة, الحاجات تتحس وبتبان وانا شايفاها في كل تصرفات شادي,شادي معجب بيها.
هالة: خلاص يا ستي كان معجب وراحت لحال سبيلها ايه المشكلة يعني؟, عدي الحاجات الصغيرة دي ياندى.
ندى: مين قال انها حاجات صغيرة, انتو مش فاهمين حاجة.
هالة: انا الي انا فاهماه دلوقتي ان بابا عايز يموتك عشان الي عملتيه امبارح دا, وقالك هو انتي مالكيش راجل يترد عليه عشان تقولي الكلام دا بنفسك.
ندى: بصو بقى انتو مش هتتدخلو في حياتي, انا حرة واعمل الي انا عايزاه.
هالة: انتي هتضيعي نفسك عشان شوية غباء في دماغك, ربنا يهديكي.
******************
جلست نسمة امام هايدي في بيتها وهي تضع حقيبتها وتبتسم.
نسمة: انا استغربت لما لقيتهم بيقولولي انك سبتي الشغل, قلت اجي اطمن عليكي.
هايدي: انتي يا بنتي مش قلتلك اني ناوية.
نسمة: بس مقلتيش انه قريب كده.
هايدي: اصل انا والله كنت مقدمة على شغل عند خالي في تركيا, وقلت ان الاوان اسافر اشوف حالي بقى بعيد عن هنا.
نسمة: هتسافري؟,....لوحدك؟.
هايدي: لا مش لوحدي هعد عند خالي, وبعدين هعد اعمل ايه هنا ياننسمة مانتي شايفة, انا كل الناس هنا بتضايقني وبتتريأ عليا, نصهم مش مصدقين اني اتغيرت, والنص التاني مش عايزني اتغير ومنساليش انا كنت ايه, ومهما غيرت في تليفونات او بعدت عنهم برضة ورايا, انا تعبت , تعبت من كل حاجة هنا, محتاجة ابعد عشان الناس تنساني شوية, وعشان اعرف ارتاح.
نسمة: بجد مش عارفة انصحك بايه, بس انتي الي عارفة ايه هيريحك, انا لقيتك غبتي شوية قلت اتصل بيكي لقيت موبايلك اتغير, وتليفون البيت طبعا اهل النوم هنا مبتردوش, فكنت معدية من تحت قلت اطلع اشوفك.
هايدي: والله فرحتيني يا نيسو, اخبار هالة وليلو ايه؟, واخبار ندى ايه؟.
نسمة: والله ندى دي مش مريحانا وقالت لشادي عايزة اتطلق وقاعدة عندنا لغاية دلوقتي.
هايدي: يا عيني , والله البنت دي حياتها غريبة يا اما محسودة, فيها حاجة.
نسمة: ربنا يهديها بس ويعدي المشكلة دي على خير.

» إجراءات أمنية مشددة بكفر الشيخ بعد قطع "رجلى" بلطجى(قبل ما تدخلوا الصورة اللي جوه مش مناسبة للجميع فياريت اللي مايقدرش علي هذه النوعية من الصور مايدخلش)
» اعلان الحرب ( للولاد )
» اللي جرحوني ؟؟؟؟؟
» انت لست رجلا ؟؟...... مش انا اللي بقول
» ايه هي المواد اللي عندك ؟